2 BO-MAKABEA 4

₁Simone ea boletsoeng kaholimo, ea ileng a tlalehela Apoloniose ka tsa matlotlo le tsa naha ea habo, o ile a 'na a etselletsa Oniase, joalokaha eka ke eena ea nyarositseng Heliodorose 'me ea mo baketseng mathata ao. ₂A se ke a tšaba ho bitsa moeki oa 'muso motho eo e neng e le mothusi oa motse o halalelang le mosireletsi oa sechaba sa habo le mocheseheli oa melao. ₃Tlhoeano ea tota, hoo e mong oa balateli ba Simone a ileng a bolaea batho ba bang. ₄Joale Oniase, ka ho elelloa kotsi ea tsekisano ena, le ka ho bona hore Apoloniose, mora oa Menesetheuse, molaoli oa Siria e Kholo le Fenisia, o ntse a eketsa moea o mobe oa Simone, ₅a ea ho khosi, e seng ho ba moqosi oa batho ba habo, empa a ntse a shebile molemo oa Bajuda bohle, oa sechaba ka kakaretso le oa motho ka mong. ₆O ne a bona hore, ntle ho bohato bo nkuoang ke khosi, ha ho mokhoa oo litaba tsa sechaba li ka lokisoang ka oona ka khotso, kapa Simone a tlohela booatla ba hae.

₇Ka mora' lefu la Seleukose, ha Antiokose, ea neng a bitsoa Epifanese, a mo hlahlame setulong sa borena, Jasone, ngoan'abo Oniase, a ipatlela boprista bo boholo ka mano. ₈A ea ho khosi ho buisana le eona, a e tšepisa chelete ea litalenta tsa silefera tse makholo a mararo le mashome a tšeletseng, le tse ling hape tse mashome a robeli tse tla tsoa mokotleng o mong. ₉Ho feta moo, a itlama ho eketsa ka tse ling hape tse lekholo le mashome a mahlano tseo e tla ba tsa khosi, ha eona e ka mo lumella ho hloma ntlo ea thapollo ea 'mele le sebaka sa kholiso ea bacha, le ho ngolisa baahi ba Jerusalema e le Baantiokia. ₁₀Hang hoba khosi e mo lumelle ka tsena, Jasone a inkela boprista bo boholo, 'me a laela hore ba sechaba sa habo ba phele ho ea ka mokhoa oa Bagerike. ₁₁A hlakola tseo likhosi li neng li li lumeletse Bajuda ka mohau ka baka la Johanne, ntat'a Eupolemose eane ea ileng a romeloa ho ea etsa setsoalle le selekane le Baroma. A felisa mokhoa oa ho phela o lumellanang le melao, 'me a tlisa mekhoa e mecha e fapaneng le Molao oa Moshe. ₁₂Ka thabo e kholo a hloma, tlas'a Qhobosheane, sebaka sa thapollo ea 'mele, 'me a isa bacha bohle ba khethehileng litlholisanong. ₁₃Ka baka la boikakaso bo tšabehang ba Jasone, motho ea khopo eo ebileng e neng e se moprista, tlhanyetso ea meetlo ea Segerike, le khatelo-pele ea mekhoa ea sehetene, tsa ipha matla; ₁₄hoo baprista, ba neng ba se ba sa ikhathatse ka tšebeletso ea aletare. Empa, ka ho nyelisa Tempele le ka ho se phethe mahlabelo, ba phallela sebakeng sa lipapali hang ha tšepe e lla, hore ba be le kabelo boitokisetsong ba tsona; e leng ntho e fapaneng le Molao. ₁₅Ba talima e se letho tseo bo-ntat'a bona ba neng ba li hlompha, 'me ba ikhethela tseo Bagerike ba ithorisang ka tsona. ₁₆Ka ho etsa joalo ba ipakela mathata, hobane bao ba neng ba batla ho latela metsamao ea bona, 'me ba rata ho tšoana le bona linthong tsohle, e ile ea e-ba lira le babolai ba bona. ₁₇Ruri ho tlola melao ea Molimo ka bokhopo ke ntho e mpe haholo. Lietsahala tsa nako e hlahlamileng ena li tla bontša sena.

₁₈Eitse ha lipapali tse bang teng ka mora' lilemo tse hlano li etsoa motseng oa Tire khosi a le teng, ₁₉Jasone, motho eane ea litšila, a romela maqosa a baahi ba Jerusalema ba ipitsang Baantiokia ho ea li sheba. A ba fa chelete ea liderakema tse makholo a mararo tsa silefera, ho e isa teng bakeng sa sehlabelo se etsetsoang Herakelese. Empa ba e isitseng ba kopa hore e se ke ea sebelisoa bakeng sa sehlabelo, hobane e ne e le ntho e sa tšoaneleheng, e mpe e khetheloe mabaka a mang. ₂₀Ka mokhoa ona chelete ena, eo moromeli oa eona a neng a e khethetse sehlabelo se etsetsoang Herakelese, ea sebelisoa ho etsa likepe ka baka la tšusumetso ea ba neng ba e tlisitse. ₂₁Mohla Apoloniose, mora oa Menesetheuse, a ileng Egepeta a rometsoe moketeng oa peo ea khosi Filometore, Antiokose a tsebisoa hore khosi eo e ne e fetohile sera sa 'muso oa hae. Ka lebaka la ho rata ho sireletseha, a ea Jopo, a ba a fetela Jerusalema. ₂₂A amoheloa ka mokhoa o motlehali ke Jasone le baahi ba motse; a kena ho oona a felehelitsoe ke ba tšoereng lirumola, har'a litlatse. Joale a tloha moo, a isa mphi ea hae ho ea lara Fenisia.

₂₃Lilemo tse tharo ka morao ho moo, Jasone a romela Menelaose, ngoan'abo Simone ea seng a boletsoe, ho isa chelete ho khosi le ho qetela ho lokisa litaba tse ling tsa bohlokoa. ₂₄Eena, ha a hlahisoa ho khosi, a ipontša pel'a eona a e-na le sebopeho sa motho ea khabane, 'me a iphumanela boprista bo boholo, hobane a ntšitse chelete ea litalenta tsa silefera e fetang ea Jasone ka makholo a mararo. ₂₅A khutla ka mangolo ao ka 'ona khosi e mo fang matla, empa ho se letho ho eena le lokelang boprista bo boholo, haese bohale ba motlatlapi ea sehloho le khalefo ea sebata se hlaha. ₂₆Joale Jasone, ea neng a amohile ngoan'abo boprista bo boholo ka mano, le eena a bo amohuoa ke e mong joalo, a ba a phalalisetsoa naheng ea Baamone. ₂₇Ha e le Menelaose, o ne a busa, empa ha aa ka a lefa letho la lichelete tseo a neng a li tšepisitse khosi, ₂₈leha Soseteratose, molaoli oa Qhobosheane, ea neng a beiloe ho ba 'mokelli oa lekhetho, a tlil'o li batla. Ka baka lena ba biletsoa bobeli ba bona pel'a khosi. ₂₉Menelaose a siea Lisimakose, ngoan'abo, ho hlokomela tsa boprista bo boholo sebakeng sa hae, 'me Soseteratose a khetha Keratese, molaoli oa Basipera, ho ba sebakeng sa hae.

₃₀Eitse ha tsena li etsahala, ke ha baahi ba Taresuse le ba Mallose e e-ba bafetoheli, hobane metse ea habo bona e ne e fanoe e le seroala ho Antiokise, mosali oa moqekoa oa khosi. ₃₁Khosi Antiokose ka hona a ea ka potlako eohle ho ea ba phoka, a siile Anderonikose, e mong oa matona a hae, sebakeng sa hae. ₃₂Eaba Menelaose, ka ho kholoa hore o fumane monyetla, a utsoa lintho tse ling tsa khauta tsa Tempele, a li fa Anderonikose; 'me tse ling a ea li rekisa Tire le metseng e kamathoko. ₃₃Ha Oniase a utloa 'me a tsebisisa taba ena, a mo nyatsa, hoba a fihle qalong ea setšabelo ea Dafanese, e neng e le haufi le Antiokia. ₃₄Joale Menelaose a nkela Anderonikose lekunutung, a mo qophella hore a e'o bolaea Oniase. Anderonikose a etsa ka mano, a ea ho Oniase, a mo tšoara ka letsoho ho mo lumelisa. A mo kholisa ka kano, leha Oniase a ne a 'melaela, hore a tsoe qalong ea setšabelo; 'me hang-hang a 'molaea, a sa tsotelle toka.

₃₅Polao ea sehloho ea Oniase ea halefisa batho 'me ea ba utloisa bohloko, e seng Bajuda feela, empa le ba bangata ba balichaba. ₃₆Hoba khosi e khutle seterekeng sa Silesia, Bajuda ba Antiokia 'moho le Bagerike ba neng ba hloile bokhopo le bona, ba ea ho eona, ba lla ka polao e hlokang toka ea motho eo. ₃₇Antiokose a sareloa haholo, a ba utloela bohloko, a seka meokho ke ho hopola bohlale le metsamao e metle ea mofu. ₃₈Eaba, ka ho tlaloa ke khalefo, a laela hore Anderonikose a hlobolisoe tse perese, a taboleloe liaparo, 'me a tsamaisoe motseng ohle ho isoa hona sebakeng seo a neng a entse ketso ea hae ea bokhopo ho sona. Hona teng, 'molai oa Oniase a hlakoloa lefatšeng. Ka hona Morena a fa Anderonikose kotlo e mo lokelang.

₃₉Eitse hoba Lisimakose, ka kutloano le Menelaose, a utsoe ka makhetlo lintho tse halalelang Jerusalema, 'me menyenyetsi e utloahale ka motseng ea hore lintho tsa khauta tse ngata li se li isitsoe libakeng tse fapakaneng, matšoele a khobokanela ho hanyetsa Lisimakose. ₄₀Ha letšoele le hlahafala ke ho halefa haholo, Lisimakose a hlomella banna ba ka bang likete tse tharo. A qala ho sebelisa mahahapa, moetapele e le Auronose ea itseng, motho ea seng a tsofetse, a atetsoe ke litšiu le teng ke booatla. ₄₁Joale ha letšoele le bona hore Lisimakose oa futuha, ba bang ba phutha majoe, ba bang melamu, ba bang ba qotsa esita le molora o neng o le teng moo, 'me ba betsa batho ba Lisimakose ka tsona, har'a mofere-fere o moholo. ₄₂Ba kobesa ba bangata, ba bolaea ba seng bakae, 'me ba phalalisa bohle ba setseng. Ha e le lesholu la lintho tse halalelang, lona, ba le bolaela pel'a polokelo ea matlotlo a Tempele.

₄₃Ka morao ho moo ha e-ba le nyeoe e qosang Menelaose. ₄₄Hoba khosi e fihle Tire, banna ba bararo ba ileng ba romeloa ke Lekhotla la baholo la Bajuda ba qala ho mo qosa. ₄₅Menelaose ha a bona hore o se a hlotsoe, a tšepisa Potolemea, mora oa Dorimenese, chelete e ngata hore a 'muelle ho khosi. ₄₆Eaba Potolemea o isa Antiokose mathuleng, ba etsa sa mokana ba ikhatholla, a mo kholisa hore a koenehe. ₄₇Ka hoo khosi e ile ea lokolla Menelaose liqosong, eena eo e neng e le lebaka la bomalimabe bohle, 'me a ahlolela baqosi bao ba batho lefu; bao hoja ba bea litaba tsa bona esita le pel'a Basithia, ba ka beng ba fumanoe ba se na molato. ₄₈Ka mokhoa ona, ba neng ba emetse motse le sechaba sa habo bona le lintho tse halalelang ba fumana ka potlako kotlo e sa lokang. ₄₉Esita le baahi ba bang ba Tire, ka baka la lehloeo la bokhopo, ba lokisa lepato la bona ka mokhoa o motlehali. ₅₀Ha e le Menelaose, ka baka la meharo ea ba neng ba tšoere marapo, a sala setulong sa hae; bokhopo ba hae ba eketseha, a iketsa sera se seholo sa batho ba habo.