Alekimose o bua Judase hampe
1Ka morao ho lilemo tse tharo, Judase le batho ba hae ba utloa hore Demeteriose, mora oa Seleukose, o fihlile ka mphi e kholo le ka likepe koung ea Teripolise, 2le hore o hapile naha eo, hoba a timetse Antiokose le moalosi oa hae Lisiase.
3Joale motho e mong ea bitsoang Alekimose, ea bileng moprista e moholo, empa ea ileng a itšilafatsa ka boomo ka nako ea phetohelo ea Bajuda, a elelloa hore joang kapa joang a ke ke a pholoha kapa a fumana mokhoa oa ho sebeletsa hape aletareng e halalelang. 4Eaba selemong sa lekholo le mashome a mahlano a motso o mong, o ea ho khosi Demeteriose, 'me o mo hlahisetsa mpho ea mofapahlooho oa khauta, le palema le makala a mang a khauta, tseo e neng e le tloaelo ho li hlahisa e le tse tsoang Tempeleng. Letsatsing leo a se ke a re letho ka merero ea hae. 5Empa a 'na a fumana monyetla oa ho phetha tsa bohlanya ba hae, ha a bilelitsoe Lekhotleng la khosi ke Demeteriose, ea ileng a 'motsa hore na maikutlo a Bajuda ke afe, seo ba se rerileng ke sefe.
Alekimose a araba, a re: 6“Bao har'a Bajuda ba bitsoang Ba-Asidea, bao Judase Makabea e leng moeta-pele oa bona, ke bona ba fehlang lintoa 'me ba hlahisang mefere-fere, 'me ba sitisa sechaba sa 'muso ho phela ka khotso. 7Ha e le 'na, eitse hoba ke amohuoe boemo boo e neng e le ba bo-ntate, e leng boprista bo boholo, ka tla mona; 8hobane, pele ho tsohle, ke bouletse litaba tsa khosi, 'me hape ke batlela batho ba heso se leng molemo ho bona. Efela bohlanya ba bao ke tsoa ba bolela bo baketse moloko oohle oa habo rona bomalimabe. 9Oho khosi, hoba u batlisise taba ena, u ke u nke bohato ho pholosa naha ea habo rona le sechaba sa habo rona se kotsing ea ho timela; u etse joalo ka ho ea ka mosa oa hao le lerato la hao ho batho bohle. 10Ha feela Judase a ntse a phela, ha ho kamoo 'muso o ka bang le khotso kateng.”
Demeteriose o laela Nikanore ho hlasela Judase
11Eitse ha motho eo a qetile ho bua joana, metsoalle eohle e meng ea khosi, eo e neng e le batho ba hloileng Judase, ea phakisa ho mo phepheletsa ho Demeteriose. 12Joale hang enoa a khetha Nikanore, eo e neng e le molaoli oa litlou, ho ba 'musi oa Judea; a ba a mo romela, 13ka taelo ea ho bolaea Judase, ho qhalanya batho ba hae, le ho bea Alekimose setulong sa boprista bo boholo, Tempeleng e kholo ho feta tsohle. 14Eaba balichaba ba Judea ba neng ba balehile Judase, ba fihlellana ho Nikanore ka bongata, ba nahanne hore mathata le mahlomola a Bajuda e tla ba katlehiso ea litaba tsa bona.
15Eare ha Bajuda ba utloa hore Nikanore oa tla, 'me balichaba ba tla ba loantša, ba itšela ka mobu hloohong, ba etsa thapeli ho Ea ileng a ba khetha ho ba sechaba sa hae ho isa neng, 'me a sa ka a khaotsa ho thusa ka mokhoa o bonahalang bao e leng seabo sa hae. 16Eaba, ka taelo ea moetapele oa bona, ba tloha moo hang, 'me ba thulana le lira motseng oa Adasa. 17Simone, ngoan'abo Judase, o ne a se a futuhelane le Nikanore; empa tšosoa ke ho hlaha ka sekhahla ha lira, 'me a hloloa nakoana. 18Leha ho le joalo, Nikanore ea neng a utloile tsa bonatla ba batho ba Judase, le kamoo ba loanelang ka sebete naha ea habo bona kateng, a tšaba ho khaola litaba ka tšollo ea mali. 19Ka hona a romela ho bona Posidoniose, Theodotose le Matathiase ho hloma khotso le Bajuda.
20Hoba ho buisanoe halelele ka litlhahiso tse entsoeng, moetapele a tsebisa mabotho tsa tumellano, e ileng ea amoheloa ka kutloano ea bohle. 21Ha beoa letsatsi leo ka lona balaoli ba ka teanang ba le bang. Joale likariki tse peli tse hlahang liahelong, e 'ngoe ka nq'ena, e 'ngoe ka nq'ane, tsa atamelana, 'me ha tlisoa litulo tse ntle tsa borena. 22Judase eena, o ne a laetse hore banna ba bang ba neng ba se ntse ba hlometse ba ee ho ema libakeng tse lokelang, esere sera sa etsa bonokoane ka ho mo tsometsa. Empa balaoli bao ba babeli, ka ho buisana, ba fihlela kutloano. 23Nikanore a ba a hlola nakoana Jerusalema, 'me a se ke a etsa letho le belaetsang. Ho feta moo, a qhala matšoele a batho ba neng ba mo khobokanetse. 24O ne a batla ho ba le Judase kamehla, a ikutloa e le motsoalle e moholo oa hae. 25A mo eletsa ho nyala le ho ba le bana. Judase a nyala mosali, a iphelela khotsong, a natefeloa ke bophelo.
Nikanore e e-ba sera sa Judase hape
26Eitse ha Alekimose a hlokomela kutloano e phethehileng ea Nikanore le Judase, a ipatlela kopi ea tumellano ea bona, a ea ho Demeteriose, 'me a mo phetela hore Nikanore o na le merero e fapaneng le ea 'muso; hobane o khethile moeki oa 'muso, Judase, ho ba mohlahlami boemong ba metsoalle ea khosi. 27Eaba khosi, ka ho halefisoa hampe le ho qholotsoa ke liketselletso tsa motho eo ea khopo hampe-mpe, e ngolla Nikanore ho 'molella hore ha e khotsofale ka litumellano tsena, 'me e mo laela hore hang a romele Makabea e le motlamuoa Antiokia.
28Ha Nikanore a bala lengolo lena, a ferekana, hobane o ne a sa rate ho etsa litumellano le Judase, motho ea sa kang a etsa letho le sa lokang, lefeela. 29Empa kaha a sitoa ho hanyetsa khosi, a lebella monyetla oa ho phetha taelo ena ka bomene-mene bo itseng. 30Ha e le Makabea, a elelloa hore Nikanore e ne e se e se eane oa maobane kaha o ne a se a se mahlong joaloka pele. A utloisisa hore phelisano ena e hlokang mofuthu ha e na ho ba tsoela molemo. Joale a khobokanya batho ba hae ba bangata, 'me a ipatela Nikanore.
31Eitse ha Nikanore a lemoha hore motho eo o nyopisitse merero ea hae ka bohlale, a ea Tempeleng e halalelang, e kholo ho feta tsohle, ka nako eo ka eona baprista ba ka nyehelang ka mahlabelo a kamehla, 'me a ba laela ho neelana ka Judase ho eena. 32Bona ba mo hlapanyetsa hore ha ba tsebe moo motho eo a 'matlang a leng teng. 33Nikanore a otlollela Sehalalelo letsoho la hae, 'me a hlapanya, a re: “Haeba le ke ke la 'neela Judase e le motlamuoa, ke tla ripitla tu Sehalalelo sena, ke heletse aletare, ke tle ke hahele Dionisiose tempele e tlotlehang sebakeng sona sena.” 34Ha a buile joana, a tsamaea. Eaba baprista ba otlollela matsoho a bona leholimong, ba rapela eo e bileng Moqobeli oa sechaba sa habo bona kamehla, ba re: 35“Uena Morena oa ntho tsohle, ea sa hlokeng letho, u khahliloe ke hore Tempele ea bolulo ba hao e be har'a rona. 36Ka hona, oho Morena ea halalelang, mohloli oa khalalelo eohle, boloka ntlo ena, e sa tsoa hloekisoa, e hloekile ho isa khale.”
Rasise o shoela naha ea habo
37Joale Rasise, e mong oa baholo ba Jerusalema, a tlalehoa ho Nikanore ka hore ke serati sa sechaba sa habo, motho ea lebitso le letle, eo ka baka la lerato la hae a bitsoang Ntat'a Bajuda. 38Motho enoa o ne a qositsoe ka hore o phela ka Sejuda nakong tsa ho qala tsa phetohelo; o ne a itihetse ka setotsoana tšireletsong ea tumelo ea Sejuda. 39Eaba Nikanore, ka ho rata ho totobatsa lehloeo leo a hloileng Bajuda ka lona, o romela bahlabani ba fetang makholo a mahlano ho ea mo tšoara; 40hobane o hopotse hore, ka ho tšoara motho eo, o tla bakela Bajuda tsietsi e kholo. 41Eitse ha lebotho le le lekhatheng la ho hapa tora eo Rasise a neng a le ka ho eona, 'me bahlabani ba pshatla lemati le kapele, ba laeloa ho le chesa. Joale Rasise a bona hore o patisitsoe kahohle, a itlhaba ka sabole ea hae. 42A ikhethela ho shoa ka bokhabane ho e-na le ho oela liatleng tsa ba khopo bao le ho hlompholloa ka mokhoa o sa lokeleng boemo ba hae.
43Empa kaha, ka lebaka la potlako, a ile a fosa ho itlhaba hantle, 'me joale sekhakhatha se se se kene ka monyako, a khoroha ka sebete ho ea lerakong. A ikakhela senna holim'a letšoele, 44le ileng la apoha kapele, 'me eena a oela lepatlelong, moo ho neng ho se na batho. 45Ere kaha a ne a ntse a phefumoloha, a raoha a tletse bohale, mali a hae a e-tsoa ka bongata, a le maqeba a tšabehang 'meleng oohle oa hae. A phunyeletsa har'a letšoele leo, 'me a ea ema holim'a selongoana. 46O ne a se a batla a feletsoe ke mali, ha a ntša mala a hae; a a betsetsa holim'a letsoele ka liatla tse peli a ntse a rapela Mong'a moea le bophelo, hore a boele a 'museletse tsona hape. Eaba o falla lefatšeng lena ka mokhoa ona.
