2 BO-MAKABEA 12

₁Eitse ha lilekane tsena li entsoe, Lisiase a boela ho khosi, 'me Bajuda ba qala ho phetha mosebetsi oa temo. ₂Empa balaoli ba naha eo, e leng Timothea le Apoloniose, mora oa Genneose, Hieronimose le Demofone, 'me ka ntle ho bona, Nikanore, molaoli oa bahlabani ba bahiruoa ba Sipera, ba hlokisa Bajuda ho phela ka khotso le ka boiketlo. ₃Eaba baahi ba Jopo ba etsa bokhopo bo tšabehang. Ba mema Bajuda, ba neng ba ahile har'a bona, ho kena, 'moho le basali le bana ba bona, likepeng tseo ba neng ba li lokisitse; joalokaha eka ha ho bora pakeng tsa bona. ₄Ka ho ea ka qeto e entsoeng ke baahi bohle ba motse, Bajuda ba amohela memo ho bontša hore ba rata ho phelisana ka khotso, ba sa belaele ka letho. Empa ha likepe li se li le har'a leoatle, ba liheloa bolibeng, e le batho ba seng ka tlase ho makholo a mabeli.

₅Hang ha Judase a utloa sehloho se etselitsoeng ba sechaba sa habo, a fana ka litaelo ho batho ba hae; ₆'me eare hoba a rapele Molimo, moahloli ea nang le toka, a tsamaea le bona, a ea futuhela babolai bao ba bana babo. A chesa kou bosiu hammoho le likepe tse ho eona, 'me a bolaea ka sabole ba neng ba tšabetse ho tsona. ₇Empa kaha a fumane likhoro tsa Jopo li koetsoe, a tloha moo, a rerile ho khutla le ho ripitla motse oo kaofela.

₈Eitse ha a utloa hore baahi ba Jamnia le bona ba rata ho etsa Bajuda ba ahileng har'a bona joalo, ₉a futuhela Jamnia bosiu, a chesa kou le likepe, hoo khanya ea mollo e ileng ea bonoa esita le Jerusalema, e hole le motse oo, sebaka se etsang likilomethara tse mashome a mahlano.

₁₀Ha Judase le batho ba hae ba tlohile moo ba tsamaile likilomethara tse peli tseleng ea ho ea loantša Timothea, ba oeloa holimo ke Maarabia a ka fetang likete tse hlano tsa ba litaaso, le bapalami ba makholo a mahlano. ₁₁Ea e-ba ntoa e mahlo-matšo. Hoba, ka thuso ea Molimo, ba hlole lira tseo tse tsoang mahoatateng, tsona tsa kopa Judase ho etsa khotso, tsa mo tšepisa ho mo fa makhomo le ho mo thusa ka mokhoa ofe kapa ofe. ₁₂Judase, ka ho hopola hore Maarabia ao a ka ba le thuso ea sebele ho eena, ka linako tse ling, a lumela ho etsa khotso le 'ona, a a nea letsoho; eaba a khutlela litenteng tsa 'ona.

₁₃Judase a hlasela le motse oa Kasepine, e leng qhobosheane e sirelelitsoeng ka marako a matla haholo, baahi ba oona e le tšoele la merabe-rabe. ₁₄Ka ho tšepa ho tiea ha marako a oona le lijo tseo ba li bokeletseng, bona ba buisa batho ba Judase ka mokhoa o hlaha, ba ba nyefola; ba bile ba ba hlapaola 'me ba bua mantsoe a sa lokelang. ₁₅Judase le batho ba hae, hoba ba rapele Ea matla 'ohle, Mong'a lintho tsohle, eo ka ntle ho liramo le mechini e meng ea ntoa a ileng a heletsa marako a Jeriko mehleng ea Joshua, ba khorohela lerako la motse ka bohale. ₁₆Ba o hapa ka thato ea Molimo, ba ba ba etsa polao e ke keng ea boleloa, hoo letša le neng le le haufinyane le moo 'me le nang le bophara ba halofo ea kilomethara, le shebahetseng le tletse mali a ileng a phallela ho lona.

₁₇Ho tloha moo ba tsamaea sebaka sa likilomethara tse lekholo le mashome a mahlano, 'me ba fihla Kharakese, ho Bajuda ba bitsoang Batubiea. ₁₈Empa ba se ke ba fumana Timothea moo, hobane, kaha a sa atleha, o ne se a tlohile libakeng tseo, leha a siile mphi e matla haholo qhobosheaneng e 'ngoe. ₁₉Dosithea le Sosipatere, balaoli ba tlas'a Makabea, ba tsamaea 'me ba bolaea bahlabani ba siiloeng ke Timothea qhobosheaneng eo, e le ba fetang likete tse leshome. ₂₀Joale hoba Makabea a arole mara a hae ka limphi, a li khethela balaoli, 'me a phakisa a tsoma Timothea, ea neng a e-na le banna ba likete tse lekholo le mashome a mabeli a litaaso, le bapalami ba likete tse peli le makholo a mahlano. ₂₁Eitse ha Timothea a utloetse ho tla ha Judase, a etelletsa basali ba e-na le bana le thepa eohle pele ho ea motseng o bitsoang Karenaime, oo e neng e le sebaka se thata ho keneha le ho haptjoa, hobane likhoro tsohle li ne li patisane tikolohong ena. ₂₂Ha mphi ea pele ea Judase e hlahela, lira tsa qala ho tšaba, tsa tšosoa ke boiponahatso ba Molimo ea bonang tsohle. Tsa balehela ka nqa tsohle hoo hangata li ileng tsa ntšana kotsi, 'me tsa hlajoa ke lisabole tsa balekane ba tsona. ₂₃Judase a phalalisa ka matla batho bao ba khopo, a bolaea ka sabole 'me a timetsa banna ba ka bang likete tse mashome a mararo. ₂₄Timothea eena a oela liatleng tsa batho ba Dosithea le Sosipatere. Ka mano a kopa hore a lokolloe a phela, hobane o ne a tšoere ba bang ba batsoali ba bona le bana babo bona, 'me bona ba ne ba ka fenethoa. ₂₅Hoba a bue halelele ho ba tšepisa hore o itlama ho busetsa batho bao ba phela hantle, ba mo lokolla ho pholosa bana babo bona.

₂₆Eaba Judase o futuhela Karenaime le tempele ea Ataregatise, a laela ho fenetha batho ba likete tse mashome a mabeli a metso e mehlano moo. ₂₇Hoba a fenye 'me a timetse lira tseo, a isa mabotho a hae ho ea hlasela Eferone, motse o sirelelitsoeng, moo ho neng ho ahile Lisiase le letšoele la merabe-rabe teng. Liqhenqha tsa bahlankana, tse neng li eme ka pele ho marako, tsa loana ka matla. Ka hare ho motse ho ne ho e-na le mechini e mengata ea ntoa 'moho le libetsa tsa eona. ₂₈Empa eitse ha Bajuda ba rapetse Ea matla 'ohle, ea pshatlang matla a lira, ba ikhapela motse 'me ba bolaea ba likete tse mashome a mabeli a metso e mehlano ho batho ba neng ba le kahare. ₂₉Ho tloha moo ba phakisa ba ea Bete-Sheane, motse o hole le Jerusalema sebaka sa likilomethara tse lekholo le mashome a mabeli. ₃₀Bajuda ba neng ba ahile Bete-Sheane ba paka hore ba tšoeroe hantle ke baahi ba moo, ba ileng ba ba amohela ka mohau ka nako tsa mathata. ₃₁Joale Judase le batho ba hae ba leboha baahi ba motse oo, ba ba khothaletsa ho 'na e e-ba metsoalle ea sechaba sa habo bona. Eaba ba khutlela Jerusalema, kaha mokete oa Libeke o ne o le haufi.

₃₂Ka morao ho mokete oa Pentekonta, ba futuhela Gorgiase, molaoli oa Idumea, ka potlako. ₃₃Eitse ha eo a fihla ka ba litaaso ba likete tse tharo, le bapalami ba makholo a mane, ₃₄ntoa ea qhoma, 'me ha shoa Bajuda ba seng bakae. ₃₅Dosithea, mopalami ea matla oa lebotho la Batubiea, a tšoara Gorgiase ka kobo ea hae, a mo hulaka ka morero oa ho mo tšoara, a ntse a phela, motho eo ea rohakiloeng; empa mopalami e mong oa naha ea Therake a khorohela Dosithea, a mo poma sephaka. Eaba Gorgiase oa phonyoha, a balehela Marisa.

₃₆Ha e le bahlabani ba Esederiase, ba ne ba khathetse ke ho loana nako e telele; ka baka leo Judase a rapela Morena hore e be mothusi oa bona, le moetapele oa bona ntoeng. ₃₇A ba a qala, puong ea habo, ho bina lifela e le pina ea hae ea ntoa, a qhala bahlabani ba Gorgiase ka ho ba tsometsa.

₃₈Eitse ha Judase a phuthile makhotla a hae, a a isa motseng oa Odollame. Eare ha letsatsi la bosupa le fihla, ba itlhoekisa ka ho ea ka moetlo, 'me ba boloka Sabatha hona sebakeng seo. ₃₉Ka letsatsi le hlahlamang, banna ba Judase ba tsamaea ho ea tlosa litopo tsa ba bolailoeng, hoo e neng e le ntho e potlakileng, ba tle ba li pate le tsa bang ka bona, mabitleng a bo-ntat'a bona. ₄₀Ke moo ba ileng ba fumana, ka har'a liaparo tsa e mong le e mong oa ba bolailoeng, lintho tse khethetsoeng melimo ea bohata ea Jamnia, tseo Molao oa Moshe o li hanelang Bajuda. Ka ho bona hoo, ha totoballa bohle hore ke ka lebaka lena ba ileng ba bolaoa. ₄₁Eaba bohle ba boka mosebetsi oa Morena, moahloli ea nang le toka, ea senolang tse patehileng; ₄₂ba ba ba qala ho rapela, ba kopa Molimo hore sebe seo bafu bao ba se entseng, a se hlakole. Judase ea khabane a khothaletsa batho ho phema sebe, kaha ba bone ka mahlo se etsahetseng ka lebaka la libe tsa ba bolailoeng. ₄₃Eare hoba a bokelle bathong ba hae seabo sa chelete e ka etsang likete tse peli tsa liderakema, a e romela Jerusalema, hore ho tle ho nyeheloe ka sehlabelo bakeng sa sebe. Ka ho etsa ketso ena e ntle, ea bokhabane, o ne a ntse a hopotse tsoho ea bafu; ₄₄hobane hoja a sa ka a lumela hore ba bolailoeng ba tla boela ba tsoha, e ka be e bile ntho e se nang thuso, 'me ea lefeela, ho rapella bafu. ₄₅Athe kaha o ne a kholisehile hore moputso o motlehali o boloketsoe ba ithobaletseng tšabong ea Molimo, morero oa hae e ne e le o halalelang, oa borapeli. Ke ka hona a ileng a nyehela ka sehlabelo sena sa puseletso bakeng sa bafu, hore ba lopolloe libeng tsa bona.