Ho boela ho khakoloa Tempele
1Makabea le batho ba hae, ba eteletsoe pele ke Morena, ba boela ba hapa Tempele le motse. 2Ba ripitla lialetare tseo balichaba ba neng ba li hahile mapatlelong, hammoho le libaka tsa bona tse halalelang. 3Eitse hoba ba hloekise Tempele, ba haha aletare e ncha. Joale ha ba khoarilitse mollo ka mahakoe, ba nyehela sehlabelo, se neng se khaotse ho etsoa, e se e le lemo tse peli; ba boela ba tlisa mokubetso le mabone le bohobe bo halalelang. 4Ha ba phethile litšebeletso tsena, ba rapela Morena ba rapaletse fatše, hore a se lumele le ka mohla hore ba oele bomalimabeng bo kang bona; empa, ha ba ka tšoha ba mo siteloa hape, ba mpe ba otloe ke eena ka mohau, le ho se neeloe balichaba ba tala, ba nyefolang. 5Joale ka lona letsatsi leo Tempele e silafalitsoeng ka lona ke balichaba, hona tsatsing leno, ha etsoa tlhoekiso ea Tempele, e le ka letsatsi la mashome a mabeli a metso e mehlano la khoeli ea Kiseleve. 6Ba keteka matsatsi a robeli ka thabo, joalokaha ho etsoa moketeng oa Maphephe; ba hopola hore pelenyana ho moo ba ile ba etsa mokete oa Maphephe ba phela lithabeng le mahaheng joaloka liphoofolo tsa naha. 7Ka hona, ho leboha ea neng a phethahatsa tlhoekiso ea Qalo ea hae, ba mo tlotlisa ka lifela ba tšoere mare a khabisitsoeng, makala a matala le lipalema. 8Phutheho eohle ea etsa tlhahiso, 'me ea laela kamora' boutu, hore sechaba sohle sa Bajuda se ketekele matsatsi ao, selemo le selemo.
Potolemea Makerone oa ipolaea
9Ke se ke boletse mokhoa oo Antiokose ea bitsoang Epifanese a ileng a shoa ka oona. 10Joale ke tla qaqisa tse amanang le Antiokose Eupatore, mora oa motho eo ea khopo, re ntse re khutsufatsa litaba tsa bobe bo ileng ba hlaha ka lintoa. 11Eitse ha a amohetse 'muso, a bea Lisiase ho ba motsamaisi oa litaba, 'me a mo etsa le molaoli e moholo oa Siria e Kholo le Fenisia. 12Ha e le Potolemea, ea bitsoang Makerone, e bile eena oa pele ea ileng a sebetsa Bajuda ka toka. A etsa joalo ka baka la hobane, pele, ba ne ba etsoa hampe, 'me a leka ho lokisa litaba tsa bona ka khotso. 13Ka baka leo a qosoa ho khosi Eupatore ke metsoalle ea eona. Hangata o ne a bitsoa moeki kahobane a siile Sipera, eo Filometore a neng a mo entse 'musi oa eona, a fetela ho Antiokose Epifanese. Ka tsela ena a itšenyetsa tlhompho e neng e lokela boemo ba hae. A ipolaea ka chefu.
Judase Makabea o hlola Baidumea
14Gorgiase ha a entsoe 'musi oa naha, o ne a hira bahlabani, 'me a loantša Bajuda kamehla. 15Le teng Baidumea, bao e neng e le beng ba liqhobosheane tsa bohlokoa, ba 'na ba tuba Bajuda; 'me ka ho amohela ba lelekiloeng Jerusalema, ba leka ho etsa hore ntoa e se khaotse. 16Eaba Makabea le batho ba hae, hoba ba kope Molimo ka lithapelo ho ba mothusi oa bona, ba hlasela liqhobosheane tsa Baidumea. 17Ba futuha ka sekhahla, ba hapa libaka tseo, ba ntse ba chechisa ba neng ba loana ba le holim'a marako, 'me ba bolaea bohle ba oelang liatleng tsa bona. Ba bolaea ba seng ka tlase ho likete tse mashome a mabeli.
18Ba ka fetang likete tse robong ba ne ba tšabetse liqalong tse peli tse nang le tora e matlahali 'me tse nang le tsohle tse hlokahalang ho batho ba thibeletsoeng. 19Eaba Makabea o siea Simone le Josefa le Sakiea, le palo e lekaneng ea bahlabani ba hae, ho ntšetsa thibello pele, ha eena a leba libakeng tse ling, moo thuso e neng e hlokoa hang-hang. 20Empa batho ba Simone, ka baka la meharo, ba qekoa ka chelete ke ba bang ba neng ba lebela litora; 'me ha ba se ba amohetse liderakema tse mashome a supileng a likete, ba lumella ba bang ho phonyoha. 21Eitse ha Judase a tsebisitsoe tse etsahetseng, a bokella balaoli ba mphi, 'me a qosa batho bao ka hore ba rekisitse bana babo bona ka lebaka la chelete, ha ba lokolotse lira tse tla ba loantša. 22Eaba o laela hore ho bolaoe bao ba neng ba fetohile baeki; 'me a hapa litora tseo tse peli a sa liehe. 23Ka ho ba le katleho libetseng, a timetsa banna ba fetang likete tse mashome a mabeli liqhobosheaneng tseo tse peli.
Judase o hlola Timothea
24Joale Timothea, eo pele a neng a fentsoe ke Bajuda, o ne a bokeletse mabotho a bahlabani ba bahiruoa ba bangatahali, 'me a bokantse lebotho le leholo la bapalami ba tsoang Asia. A tla joalokaha eka o tla nka Judea ka mahahapa a libetsa. 25Eitse ha a atamela, Judase le batho ba hae ba rapela Morena, ba itšetse ka mobu lihloohong 'me ba ikhahlotse matheka ka tse mahoashe; 26ba nt'o ithapalatsa maotong a aletare, ba mo kopa ho ba hauhela, le ho ba sera sa lira tsa bona le mohanyetsi oa bahanyetsi ba bona, joalokaha molao o boletse. 27Eaba, ka morao ho thapelo, ba nka lihlomo tsa bona, ba tloha Jerusalema sebakanyana. Ha ba se ba le haufi le sera, ba emisa. 28Empa hang ha letsatsi le chaba, ba futuhelana, ka lehlakoreng le leng ba tšepile ho hlola e seng ka baka la sebete sa bona feela, empa haholo ka thuso ea Morena; athe ka ho le leng ba ikhethetse khalefo ea bona ho ba moetapele oa bona lintoeng. 29Eitse ha e loana ka bohale, lira tsa bona ho hlaha banna ba bahlano, ba tsoang leholimong ba kaletse lipitsi, ba boheha, litomo e le tsa khauta, ba tla etella Bajuda pele. 30Ba teela Judase hare, ba etsa hore a sitoe ho ntšoa leqeba ka ho mo sireletsa ka lihlomo tsa bona. Ba betsetsa metsu le mahalima lireng, hoo li ileng tsa fahloa, tsa ferekanngoa, 'me tsa qhalana har'a mofere-fere o tšabehang. 31Ho tsona, ha bolaoa ba likete tse mashome a mabeli le makholo a mahlano, 'moho le bapalami ba makholo a tšeletseng.
32Ha e le Timothea, eena a balehela qhobosheaneng e neng e sirelelitsoe ka thata, e bitsoang Gasara, eo molaoli oa eona e neng e le Kherease. 33Makabea le batho ba hae ba tla ba thabile, ba thibella qhobosheane eo matsatsi a mane. 34Empa ba neng ba le kahare, ka ho tšepa matla a sebaka seo, ba 'na ba nyefola hampe, ba hlapaolana. 35Eitse ha letsatsi la bohlano le chaba, bahlankana ba mashome a mabeli ba mphi ea Makabea, ba tlokoma ke khalefo ka baka la linyefolo tseo, ba futuhela lerako la qhobosheane senna, ba ratha ka bohale bohle ba neng ba oela liatleng tsa bona. 36Ka ho fumana monyetla joalo, ba bang le bona ba hloella lerakong ka nqane ho loantša ba thibeletsoeng, ba ea chesa litora; 'me mollong oo ba o hotelitseng, ba chesa banyefoli bao ba ntse ba phela. Sehlopha se seng sa pshatla mamati a likhoro, e le hore bahlabani ba setseng ba tle ba tsebe ho kena le ho hapa motse. 37Timothea o ne a ipatile ka lelumeleng; ba mo fumana 'me ba mo fenetha, 'moho le ngoan'abo Kherease le Apolofanese.
38Hoba tsena li phethahale, Bajuda ba boka Morena ka lifela, ba leboha ea etselitseng Iseraele tse kholo, 'me a ba nea tlholo.
