Jehu oa tlotsoa
1Elisha, moporofeta oa Molimo, a bitsa e mong oa sehlopha sa baporofeta, a re ho eena: “Itlame letheka, u nke lenaka lena la ole, u ee Rama e Gileade. 2Ha u fihla teng u batle Jehu, mora oa Jehoshafate, setlōhōlō sa Nimeshi. U kene ka tlung, u mo qōlle har'a balekane ba hae, u mo ise ka kamoreng e kahare. 3Ebe u nka lenaka lena la ole, u e tšèla holim'a hlooho ea hae, u re: ‘Morena o bua tjena: Ke u tlotsitse hore u be khosi ea Iseraele.’ Joale u bule monyako, u balehe, u se ke ua lieha.”
4Joale mohlankana enoa oa moporofeta, a ea Rama e Gileade. 5Ha a fihla teng, a fumana balaoli ba mabōtho ba lutse. Eaba o re: “Monghali, ke na le molaetsa oa hao.”
Jehu a re: “Ke oa mang ha re le tjee?”
Mohlankana a re: “Ke oa hao monghali.”
6Jehu a ema, a kena ka tlung; mohlankana a mo tšèla ka ole hloohong, a re ho eena: “Morena Molimo oa Iseraele, o bua tjena: ‘Ke u tlotsitse hore u be khosi ea sechaba sa Morena, e leng sa Iseraele. 7U bolaee ba lelapa la mong'a hao Akabe, e le hore ke phetetse mali a bahlanka ba ka, baporofeta, le mali a bahlanka bohle ba Morena, ba bolailoeng ke Jesabele. 8Lelapa lohle la Akabe le tla timetsoa. Ke tla bolaea bohle ba batona ba lelapa la Akabe, ba ntseng ba phela naheng ea Iseraele, ebang ke makhoba kapa hase makhoba. 9Lelapa la Akabe ke tla le etsa seo ke neng ke se etse lelapa la Jeroboame, mora oa Nebate; le seo ke neng ke se etse lelapa la Basha, mora oa Ahiea. 10Lintja li tla jella setōpō sa Jesabele tšimong ea Jesereele, 'me ha ho ea tla mo epela.’ ” Eaba o bula monyako, oa baleha.
11Joale Jehu a tsoa, a ea ho bahlanka ba mong'a hae. E mong a re ho eena: “Molato ke'ng? Lehlanya lee le tlile ho uena ka life?”
Jehu a re ho bona: “Le ntse le mo tseba, le lipuo tsa hae lea li tseba.”
12Eaba ba re: “Ha re li tsebe. O ne a re'ng?”
Jehu a re: “O buile lintho tse ngata, a ba a re: ‘Morena o bua tjena, o re: Ke u tlotsitse hore u be khosi ea Iseraele.’ ”
13Eaba banna bohle ba hlōbōla liaparo tsa bona ka potlako, ba mo alla tsona holim'a mehato e nyolohang, ba letsa manaka, ba re: “Jehu ke khosi!”
Jehu o bolaea Jorame
14Joale Jehu, mora oa Jehoshafate, setlōhōlō sa Nimeshi, a rera Jorame. Ka nako ena bo-Jorame le Baiseraele bohle ba ne ba lebetse motse oa Rama e Gileade, hore Hasaele, khosi ea Arame, a se ke a o hapa. 15Empa khosi Jorame eena o ne a khutletse Jesereele ho ea ikoka maqeba ao a neng a a ntšitsoe ke Baarame, ha a ne a loana le Hasaele, khosi ea Arame. Eaba Jehu o re: “Haeba le lumela joalo, hlokomelang hore ho se be motho ea ka nyenyelepang, a tsoa motseng mona, a ea bolela taba ena koana Jesereele.” 16Jehu a palama kariki ea hae ea ntoa, a ea Jesereele, moo Jorame a neng a ntse a ikokela teng. Akasiea, khosi ea Juda, le eena o ne a theohetse Jesereele ho ea hloela Jorame.
17Sebōhōli se ne se eme holim'a tora ea Jesereele. Ha se bona sehlopha sa Jehu se ntse se e-tla, sa re: “Hlopha sa batho ke sane!”
Jorame a re: “E-re monna a palame pere, a e'o se khahlanyetsa, 'me a fihle a re ho sona: ‘Na le tla ka khotso?’ ”
18Eaba monna e mong o palama pere, o ea khahlanyetsa Jehu, 'me a fihla a re ho eena: “Khosi e re: ‘Na le tla ka khotso?’ ”
Jehu a re: “U nts'u re khotso? Ntšale morao!”
Sebōhōli sa bua, sa re: “Morōmuoa o fihlile ho bona, empa ha a bonahale ho khutla.”
19Eaba Jorame o rōma monna oa bobeli ea palameng pere. Eo ha a fihla ho bona, a re: “Khosi e re: ‘Na le tla ka khotso?’ ”
Jehu a re: “U nts'u re khotso? Ntšale morao!”
20Sebōlōli sa bua, sa re: “Le eena o fihlile ho bona, empa ha a bonahale ho khutla. Kariki e qhōjoa ka lekharakhara le kang la ha ho qhōba Jehu, setlōhōlō sa Nimeshi, hobane eena o qhōba joaloka lehlanya.”
21Jorame a re: “Panang kariki ea ka ea ntoa!” Ba pana kariki ea hae ea ntoa. Bo-Jorame, khosi ea Iseraele, le Akasiea, khosi ea Juda, ba tsoa motseng, e mong le e mong a palame kariki ea hae ea ntoa. Ba tsoa ho ea khahlanyetsa Jehu, 'me ba teana le eena tšimong ea Nabote oa Mojesereele. 22Eare ha Jorame a bona Jehu, a re ho eena: “Jehu, na u tla ka khotso?”
Eo a mo araba, a re: “Khotso e ka ba teng joang, ha ho rapela melimo ea bohata ha 'm'ao, le ho loea ha hae, ho atile hakaale?”
23Ke ha Jorame a sokolla kariki ea hae, a baleha, a re ho Akasiea: “Akasiea ee! Hona ke bohlabaphieo!”
24Jehu a hula seqha sa hae ka matla a hae kaofela, a fula Jorame pakeng tsa mahetla, motsu oa ba oa ea tsoa pelong, 'me a re sihla! ka kariking ea hae ea ntoa. 25Eaba Jehu o re ho Bidekare, molaoli oa mabōtho a hae: “Mo nke, u mo lahlele har'a tšimo eno ea Nabote oa Mojesereele! Hopola mohla rōna le uena re neng re palame le Akabe, ntat'ae. Morena o ne a mo ahlōle ka mantsoe ana, a re: 26‘Ruri, maobane ke bone mali a Nabote, le mali a bara ba hae,’ ho rialo Morena: ‘Ke tla a phetetsa ka ho sebelisa uena, hona tšimong ena,’ ho rialo Morena. Ka baka lena he, mo nke, u mo lahlele har'a tšimo, ho ea ka polelo eo ea Morena.”
Jehu o bolaea Akasiea
27Ha Akasiea, khosi ea Juda, a bona hona, a baleha ka tsela e lebang Bethekane. Jehu a mo salama, a re: “Le eena enoa mo fulelleng ka kariking ea hae ea ntoa!” Ba mo fula ha a le moepeng o nyolohelang Gure, haufi le Jibeleame. Akasiea a balehela Megido, a ea shoela teng. 28Bahlanka ba hae ba mo nka ka kariki ea ntoa, ba mo isa Jerusalema, ba mo epela lebitleng la hae, ho bo-ntat'ae, Motseng oa Davida. 29Akasiea o ne a ile a qala ho busa Juda ha Jorame, mora oa Akabe, a tšoere selemo sa leshome le motso o mong a busa.
Mofumahali Jesabele oa bolaoa
30Ha Jehu a se a fihlile Jesereele, Jesabele a utloela taba ena. Eaba o ròma mahlo a hae ka pilo, o khabisa moriri oa hae, o hlaha ka fesetere, o talima kantle. 31Eare ha Jehu a kena ka khoro ea motse, Jesabele a re: “Na u tla ka khotso, uena Simeri, 'molai oa mong'a hao?”
32Jehu a talima fesetereng, a re: “Ke mang ea ka lehlakoreng la ka? Ke mang?” Eaba basebeletsi ba babeli kapa ba bararo baa mo talima. 33A re ho bona: “Mo lahleleng fatše!” Ba mo lahlela fatše. Mali a mang a hae a qaphaletsa lerako, le lipere, 'me kariki ea ntoa le lipere tsa mo khobotlela ka litlhako.
34Ha Jehu a se a kene, a fihla a ja, a noa, a nt'o re: “Tsamaeang, le e'o nka mosali eno ea rōhakehileng, le mo epele, hobane ke morali oa khosi!” 35Ba tsamaea, ba re ba ea mo epela, empa ba se ke ba fumana letho la setōpō sa hae haese lehata, le maoto, le liatla tsa hae feela. 36Ka baka leo, ba khutla, ba tla tsebisa Jehu. Eena a re: “Ena ke eona polelo ea Morena, eo a neng a e bue ka mohlanka oa hae Elia oa Tishebe, a re: ‘Lintja li tla jella setōpō sa Jesabele tšimong ea Jesereele. 37Mosohlo oa hae o tla tlala-tlala har'a tšimo ea Jesereele, joaloka khapane har'a naha, hoo batho ba sa tl'o hlola ba tseba le hore: Enoa ke Jesabele!’ ”
