Mosali oa Moshuneme o khutlela ha habo
1Elisha o ne a ile a laela mosali eo a neng a ile a tsosa mora oa hae bafung, a re: “Ema, u tsamaee, u falle le ba lelapa la hao, u e'o jaka moo u ka jakang teng, hobane Morena o laotse hore tlala e be teng ka lilemo tse supileng.” 2Mosali eo a ema, a etsa kamoo moporofeta oa Molimo a buileng kateng. A tloha le ba lelapa la hae, a ea jaka naheng ea Bafilesita ka lilemo tse supileng.
3Ha lilemo tse supileng li se li fetile, mosali eo a khutla naheng ea Bafilesita. A ea ipēha ho khosi, hore a buseletsoe ntlo ea hae le tšimo ea hae. 4Khosi e ne e ntse e buisana le Gehasi, mohlanka oa moporofeta oa Molimo, e re: “Kea u rapela: Ak'u mpolelle lintho tsohle tse kholo, tseo Elisha a li entseng.” 5Eare a sa ntsane a bolella khosi kamoo Elisha a neng a tsose motho bafung kateng, mosali eo mora oa hae a neng a tsosoe bafung a fihla, a ipēha ho khosi, hore a buseletsoe ntlo ea hae le tšimo ea hae.
Eaba Gehasi o re: “Mong'a ka, khosi ea ka, mosali eo ke eena enoa, le enoa ke eena mora oa hae, eo Elisha a neng a mo tsose bafung.”
6Ha khosi e botsa mosali eo, le eena a e bolella joalo. Eaba khosi e laela mohlanka e mong, e re ho eena: “Museletse tsohle tseo e neng e le tsa hae, le tsohle tse ileng tsa kotuloa tšimong ea hae, ho qala mohla a neng a tloha naheng ena, ho fihlela joale.”
Ho porofetoa lefu la Bene-Hadade
7Ha Elisha a fihla Damaseka, Bene-Hadade, khosi ea Arame, o ne a kula. Ha tsebisoa khosi, ha thoe: “Moporofeta oa Molimo o fihlile mona.”
8Khosi ea re ho Hasaele: “Nka mpho, u e'o e nea moporofeta eo oa Molimo, 'me a mpotsetse Morena, hore na ke tla fola?”
9Hasaele a ea ho moporofeta, a mo isetsa mpho ea lintho tsohle tse ntle, tsa Damaseka: E le liphahlo tse bofiloeng likameleng tse mashome a mane. Hasaele a fihla a ema kapele ho moporofeta, a re: “Mora oa hao, Bene-Hadade, khosi ea Arame, o nthōmile ho uena, o re: ‘Na ke tla fola?’ ”
10Elisha a re ho eena: “Tsamaea, u e'o 'molella hore o ne a ka 'na a fola; leha ho le joalo, Morena o mpontšitse hore o tla shoa.” 11Moporofeta oa Molimo a sitlōlela Hasaele mahlo, ho fihlela a ba a hlajoa ke lihlong, 'me eaba moporofeta oa Molimo oa lla.
12Eaba Hasaele o re: “U llela'ng, mong'a ka?”
Elisha a araba, a re: “Ke hobane ke tseba sehlōhō seo u tla se etsetsa bana ba Iseraele. U tla chesa liqhobosheane tsa bona ka mollo, u bolaee bahlankana ba bona ka sabole. Masea a bona u tla a pshatlanya fatše, baimana ba bona u ba phatlōle limpa.”
13Hasaele a re: “Ebe 'na, mohlanka oa hao, ntja e tjee, nka etsa ntho e kholo hakaalo?”
Elisha a mo araba, a re: “Morena o mpontšitse hore uena u tla ba khosi ea Arame.”
14Hasaele a tloha ho Elisha, a fihla ho mong'a hae. Mong'a hae a 'motsa, a re: “Elisha o itse'ng ho uena?”
Hasaele a araba, a re: “O mpolelletse hore ruri u tla fola.” 15Ka letsatsi le hlahlamang, Hasaele a nka lesela le morumo, a le ina metsing, a bipetsa Bene-Hadade ka lona, eaba oa shoa. Hasaele ea e-ba khosi sebakeng sa Bene-Hadade.
Puso ea Jehorame, khosi ea Juda
16Ka selemo sa bohlano sa puso ea Jorame, mora oa Akabe, khosi ea Iseraele, Jehorame, mora oa Jehoshafate, khosi ea Juda, a qala ho busa. 17Jehorame o ne a e-na le lilemo tse mashome a mararo a metso e 'meli ha a qala ho busa, 'me a busa ka lilemo tse robeli, a le Jerusalema. 18Kahobane mosali oa hae e ne e le morali oa Akabe, a tsamaea mehlaleng ea likhosi tsohle tsa Iseraele, joalokaha ba lelapa la Akabe ba ne ba ile ba etsa, 'me a etsa bobe mahlong a Morena. 19Leha ho le joalo, Morena a se ke a timetsa 'muso oa Juda ka baka la Davida, mohlanka oa hae, hobane a ne a mo tšepise hore eena, le litlōhōlō tsa hae, ba tla busa kamehla.
20Ka nako eo Jehorame a neng a busa ka eona, Baedomo ba mo fetohela, ba itōkolla pusong ea Juda, 'me ba ikhethela khosi. 21Eaba Jehorame o nka likariki tsa hae tsohle tsa ntoa, o tšelela Saire, Baedomo ba mo etsetsa sakana-la-nkope. A tsoha har'a bosiu, a e-na le balaoli ba likariki tsa ntoa, a phunyeletsa thekō ea Baedomo, 'me bahlabani ba hae ba balehela litenteng tsa bona. 22Haesale Baedomo ba itōkōlla pusong ea Juda, ho fihlela kajeno-ea-bokajeno. Ka eona nako eo, Lebena le eona ea fetohela Juda.
23Liketso tse ling tsa Jehorame, le tsohle tseo a ileng a li etsa, li ngotsoe Bukeng ea Liketsahalo tsa Likhosi tsa Juda. 24Jehorame a shoa, a epeloa le bo-ntat'ae, Motseng oa Davida. Akasiea, mora oa hae, a mo hlahlama.
Puso ea Akasiea, khosi ea Juda
25Ka selemo sa leshome le metso e 'meli sa puso ea Jorame, mora oa Akabe, khosi ea Iseraele, Akasiea, mora oa Jehorame, khosi ea Juda, a qala ho busa. 26Akasiea o ne a e-na le lilemo tse mashome a mabeli a metso e 'meli ha a qala ho busa, 'me a busa ka selemo se le seng feela, a le Jerusalema. Lebitso la 'm'ae e ne e le Ataleea, setlōhōlō sa Omeri, khosi ea Iseraele. 27Kahobane e ne e le mokhoenyana oa lelapa la Akabe, a tsamaea mehlaleng ea lelapa leo la Akabe; a etsa bobe mahlong a Morena, joalokaha ba lelapa la Akabe ba ne ba ile ba etsa.
28Bo-khosi Akasiea le khosi Jorame, mora oa Akabe, ba ea loantša Hasaele, khosi ea Arame, a le Rama e Gileade. Baarame ba ntša Jorame likotsi. 29Khosi Jorame a khutlela Jesereele, ho ea okoa maqeba ao a a ntšitsoeng ke Baarame ha ba le Rama, moo ba neng ba loantša Hasaele, khosi ea Arame.
Joale Akasiea, mora oa Jehorame, khosi ea Juda, a theohela Jesereele ho ea hloela Jorame, mora oa Akabe, hobane o ne a kula.
