2 LIKHOSI 25

₁Ka letsatsi la leshome la khoeli ea leshome, ka selemo sa borobong sa puso ea Sedekiea, Nebukadenesare, khosi ea Babilona, a futuhela Jerusalema ka mabōtho a hae 'ohle, a fihla a hloma pel'a motse. Ba haha liqhobosheane ho o pota-pota. ₂Motse oo oa etsetsoa thibella ho fihlela ka selemo sa leshome le motso o mong sa puso ea khosi Sedekiea. ₃Ka letsatsi la borobong la khoeli ea bone selemong sona seo, tlala e ne e se e le kholo har'a motse, hoo sechaba sa naha eo se neng se se se hloka le thathana ea bohobe feela.

₄Baahi ba motse oo ba phunya likheo marakong, bahlabani bohle ba baleha bosiu, ba tsoa ka khoro e pakeng tsa marako a mabeli, e pel'a tšimo ea khosi. Bakalatiea ba ne ba ntse ba pota-potile motse oo. Khosi ea nka tsela e lebang phuleng. ₅Bahlabani ba Bakalatiea ba phalalisa khosi, ba e tšoara ha e le liphuleng tsa Jeriko. Bahlabani bohle ba khosi ba e qhalanela, ea sala e le inotši. ₆Eaba Bakalatiea ba tšoara khosi Sedekiea, ba mo isa ho khosi ea Babilona, eona e le Ribela, moo ba ileng ba mo ahlōlela hona teng. ₇Ba bolaea bara ba Sedekiea moo a ntseng a ba shebile, eena ba mo honya mahlo, ba mo tlama ka mahlaahlela a lethose, ba mo isa Babilona.

₈Ka letsatsi la bosupa la khoeli ea bohlano, e leng ka selemo sa leshome le metso e robong sa puso ea Nebukadenesare, khosi ea Babilona, Nebusaradane, molaoli oa balebeli, e leng mohlanka oa khosi ea Babilona, a tla Jerusalema. ₉Nebusaradane a chesa Tempele ea Morena, le ntlo ea khosi, le matlo 'ohle a Jerusalema, le matlo 'ohle a banna ba mabitso. ₁₀Bahlabani bohle ba Bakalatiea, ba neng ba e-na le molaoli oa balebeli, ba heletsa marako a pota-potileng Jerusalema. ₁₁Joale Nebusaradane, molaoli oa balebeli a thōpa batho ba neng ba setse motseng, le baphaphathehi ba ileng ba ineela ho khosi ea Babilona, le masalla a litsebi tsa mosebetsi oa matsoho. ₁₂Empa molaoli oa balebeli a siea mafutsana a naha eo hore a leme masimo a morara le masimo a lijo.

₁₃Litšiea tsa lethose, le litšehetso tsa tsona, le tanka ea lethose eo baprista ba tollang ka ho eona, tsena li ne li le ka Tempeleng ea Morena, 'me Bakalatiea ba li pshatla, ba nka lethose la tsona, ba le isa Babilona. ₁₄Lipitsa, le likharafu, le litima-mabone, le likhaba, le lintho tsohle tse entsoeng ka lethose, tseo ho neng ho sebeletsoa ka tsona, ba li nka. ₁₅Molaoli oa balebeli a nka le lipane, le likotlolo, le lintho tse ling tse entsoeng ka khauta, le tse entsoeng ka silefera.

₁₆Boima ba lethose lohle le entseng litšiea tse peli, le tanka, le litšehetso tseo Solomone a neng a li etselitse Tempele ea Morena, bo ne bo ke ke ba lekanngoa. ₁₇Bophahamo ba tšiea e le 'ngoe e ne e le limethara tse robeli. Kaholim'a eona ho ne ho e-na le kōtōla ea lethose, bophahamo ba eona e ka ba methara le halofo. Moqhaka oa eona, le likharenate tse pota-potileng kōtōla, kaofela li ne li entsoe ka lethose. Le tšiea ea bobeli e ne e tšoana le ena ea pele ka mokhabiso.

₁₈Molaoli oa balebeli a thōpa Seraea, Moprista e Moholo, le Sofonea, letsoho la Moprista e Moholo, le balebeli ba bararo ba monyako oa Tempele. ₁₉Hona motseng moo a ba a thōpa molaoli ea neng a okametse bahlabani, le banna ba bahlano, ba bao e neng e le baeletsi ba khosi, bao a fumaneng ba ntse ba le moo motseng. A thōpa le mongoli e moholo oa molaoli oa mabōtho, ea neng a hlabela sechaba sa naha eo mokhosi, le banna ba mashome a tšeletseng ba baahi ba naha eo, ba neng ba le teng moo motseng. ₂₀Nebusaradane, molaoli oa balebeli, a thōpa batho bana, a ba isa Ribela, ho khosi ea Babilona. ₂₁Khosi ea Babilona ea ba khakhatha, ea ba bolaela hona moo Ribela, naheng ea Hamate.

Eaba ka mokhoa o joalo Bajuda ba ntšoa naheng ea bona.

₂₂Nebukadenesare, khosi ea Babilona, a khetha Gedaleea, mora oa Ahikama, setlōhōlō sa Shafane, hore e be eena 'musi oa Bajuda ba ileng ba sala moo. ₂₃Ha balaoli bohle ba mabōtho, 'moho le bahlabani ba bona, ba utloa hore khosi ea Babilona e khethile Gedaleea hore e be 'musi, batho bana ba ea ho Gedaleea, a le Misepa: Ishemaele, mora oa Netaniea, le Johanane, mora oa Karea, le Seraea, mora oa Tanehumete oa Monetofa, le Jaasaneea, mora oa monna ea ahileng Maaka; ba ea le bahlabani ba bona. ₂₄Gedaleea a ba hlapanyetsa, 'moho le bahlabani ba bona, a re: “Le tla iphelela hantle. Le se ke la tšaba ho ba bahlanka ba Bakalatiea. Ahang naheng ena, le sebeletse khosi ea Babilona.”

₂₅Empa ka khoeli ea bosupa Ishemaele, mora oa Netaniea, setlōhōlō sa Eleshama oa lelōko la khosi, a tla a e-na le banna ba leshome, a fihla a bolaea Gedaleea, a bolaea le Bajuda le Bakalatiea ba neng ba e-na le eena moo Misepa. ₂₆Sechaba sohle sa ba baholo le banyenyane, le balaoli ba mabōtho, sa balehela Egepeta, hobane se ne se tšaba Bakalatiea.

₂₇Ka letsatsi la mashome a mabeli a metso e supileng, ka khoeli ea leshome le metso e 'meli, selemong sa mashome a mararo a metso e supileng sa ho kenngoa chankaneng ha Jehoeakine, khosi ea Juda, Efile-Merodake, khosi ea Babilona, a qala ho busa. A hauhela Jehoeakine, khosi ea Juda, a mo lōkōlla chankaneng. ₂₈Efile-Merodake a mo tšoara hantle, a mo nea hlompho e fetang eo a neng a e nea likhosi tse ling tseo a li thōpileng. ₂₉Jehoeakine a hlōbōla liaparo tseo a neng a li apara ha a le chankaneng, 'me a jela tafoleng e le 'ngoe le khosi ka matsatsi 'ohle a ho phela ha hae. ₃₀Ka letsatsi le leng le le leng, khosi ea Babilona ea mo nea chelete ea ho iphelisa, ho fihlela a e-shoa.