1Ha Jehoeakime a ntse a busa, Nebukadenesare, khosi ea Babilona, a mo futuhela, 'me a mo hlōla; Jehoeakime ea e-ba mohlanka oa hae ka lilemo tse tharo. Hamorao Jehoeakime a fetohela Nebukadenesare. 2Joale Morena a neella Jehoeakime ka mabōthoana a Bakalatiea, le a Baarame, le a Bamoabe, le a Baamone; a a rōmela Juda, ho ea e timetsa, 'me ha phethahala polelo ea Morena, eo a neng a e bue ka bahlanka ba hae, baporofeta. 3Tsena tsa etsahala ho Bajuda ka taelo ea Morena, hore a tle a ba hleke kapele ho mahlo a hae, ka baka la libe tsohle tseo Manase a neng a li etse. 4Hape e ne e le ka baka la mali a se nang molato, ao Manase a neng a a tšolle, a etsa hore mali a se nang molato a phalle kahohle Jerusalema; kahoo Morena a sitoa ho mo tšoarela.
5Liketso tse ling tsa Jehoeakime, le tsohle tseo a ileng a li etsa, li ngotsoe Bukeng ea Liketsahalo tsa Likhosi tsa Juda. 6Eaba Jehoeakime oa shoa, 'me Jehoeakine, mora oa hae, a mo hlahlama.
7Khosi ea Egepeta ea se ke ea hlola e futuha, hobane khosi ea Babilona e ne e hapile tsohle tseo e neng e le tsa khosi ea Egepeta, ho tloha molatsoaneng oa Egepeta, ho ea fihla nōkeng ea Eufratese.
Puso ea Jehoeakine, khosi ea Juda
8Jehoeakine o ne a e-na le lilemo tse leshome le metso e robeli ha a qala ho busa, 'me a busa ka likhoeli tse tharo, a le Jerusalema. Lebitso la 'm'ae e ne e le Nehusheta, morali oa Elenathane, eo hahabo e neng e le Jerusalema. 9Jehoeakine a etsa bobe mahlong a Morena, a latela tsohle tseo ntat'ae a neng a ile a li etsa.
10Ka eona nako eo, balaoli ba mabōtho a Nebukadenesare ba futuhela motse oa Jerusalema, ba o etsetsa thibella. 11Ha balaoli bao ba mabōtho a hae ba ntse ba etselitse motse oo thibella, Nebukadenesare a itlisa ka nama. 12Jehoeakine, khosi ea Juda, a tsoa motseng, a ea ineela ho khosi ea Babilona, a e-na le 'm'ae, le bahlanka ba hae, le mahosana a hae, le bahlanka ba hae ba mahaole.
Khosi ea Babilona ea mo thōpa ka selemo sa borobeli sa puso ea eona. 13Joalokaha Morena a ne a ile a bolela, Nebukadenesare a hahara matlotlo 'ohle a Tempele ea Morena, le matlotlo a ntlo ea khosi. A pshatla lintho tsohle tsa khauta, tseo Solomone, khosi ea Iseraele, a neng a li etselitse Tempele ea Morena. 14A thōpa baahi bohle ba Jerusalema, le mahosana 'ohle, le bahlabani bohle, kaofela e le bathōpuoa ba likete tse leshome. A thōpa le litsebi tsohle tsa mesebetsi ea matsoho, le malala 'ohle, ha se ke ha sala le ea mong, haese mafutsana a naha eo.
15A thōpa le Jehoeakine, le 'm'ae, le basali ba khosi, le bahlanka ba eona ba mahaole, le bahlabani ba naha eo, a ba tlosa Jerusalema, a ba isa bothōpuoeng Babilona. 16Bahlabani bohle ba likete tse supileng, le litsebi tsa mesebetsi ea matsoho, le malala a sekete; le bohle ba linatla, ba matšola-thèbè, le bona khosi Nebukadenesare a ba tlosa Jerusalema, a ba isa bothōpuoeng Babilona.
Puso ea Sedekiea, khosi ea Juda
17Khosi ea Babilona ea bea Mataneea, rangoan'a Jehoeakine, hore e be khosi ea Juda, 'me ea fetola lebitso la hae, ea mo rea la Sedekiea.
18Sedekiea o ne a e-na le lilemo tse mashome a mabeli a motso o mong ha a qala ho busa, 'me a busa ka lilemo tse leshome le motso o mong, a le Jerusalema. Lebitso la 'm'ae e ne e le Hamutale, morali oa Jeremia eo hahabo e neng e le Lebena. 19Sedekiea a etsa bobe mahlong a Morena, a latela tsohle tseo Jehoeakime a neng a ile a li etsa. 20Morena a halefela baahi ba Jerusalema le ba Juda, hoo a qeteletseng a ba lelekile kapele ho sefahleho sa hae.
Eaba Sedekiea o fetohela khosi ea Babilona.
