Puso ea Josiea, khosi ea Juda
1Josiea o ne a e-na le lilemo tse robeli ha a qala ho busa. A busa ka lilemo tse mashome a mararo a motso o mong, a le Jerusalema. Lebitso la 'm'ae e ne e le Jedida, morali oa Adaea, ea tsoang motseng oa Bosekate.
2Josiea a khahlisa Morena, a tsamaea mehlaleng eohle ea Davida, ntat'ae-moholo, a se ke a e kheloha.
Buka ea Molao ea fumanoa
3Ka selemo sa leshome le metso e robeli sa puso ea hae, khosi Josiea a rōma mongoli oa hae Shafane, mora oa Asaleea, setlōhōlō sa Meshulame; a mo rōma Tempeleng ea Morena, a re: 4“Tsamaea, u e'o bolella Hilekiea, Moprista e Moholo, hore a bale chelete e tlisitsoeng ka Tempeleng ea Morena, eo balebeli ba monyako ba e amohetseng ho sechaba. 5Chelete ena ba e nee basebetsi ba hlokomelang Tempele ea Morena, 'me bao ba lefe ba etsang mosebetsi oa ho thiba likheo tsa Tempele ea Morena. 6Ba e nee libetli tsa mapolanka, le lihahi, le libetli tsa majoe; ba reke le mapolanka le majoe a betliloeng, ho lokisa Tempele.” 7Ka baka la botšepehi ba bona, ha baa ka ba botsoa letho mabapi le chelete eo ba e neiloeng.
8Eaba Hilekiea, Moprista e Moholo, o re ho Shafane, eo e neng e le mongoli: “Ke fumane Buka ea Molao ka Tempeleng ea Morena.” Hilekiea a nea Shafane buka eo, 'me Shafane a e bala. 9Joale Shafane eo e neng e le mongoli, a fihla ho khosi, a e tliselitse molaetsa, a re: “Bahlanka ba hao ba bōkeletse chelete e neng e le ka Tempeleng. Ba e neile basebetsi ba hlokomelang Tempele ea Morena.” 10Shafane, eo e neng e le mongoli, a bontša khosi buka, a re: “Buka ena ke e neiloe ke Hilekiea, Moprista e Moholo.” Eaba Shafane o e balla khosi.
11Eitse hoba khosi e utloe mantsoe a tsoang Bukeng ena ea Molao, ea hahola liaparo tsa eona. 12Khosi ea laela moprista Hilekiea, le Ahikama, mora oa Shafane, le Akabore, mora oa 'Mikiea, le Shafane eo e neng e le mongoli, le Asaea, mohlanka oa khosi, ea re: 13“Tsamaeang, le e'o mpotsetsa Morena, le botsetse le sechaba, le morabe oohle oa Juda, mabapi le mantsoe a tsoang bukeng ena e fumanoeng. Khalefo eo Morena a re halefetseng ka eona ea tlōkōma, kaha bo-ntat'a rōna ba sa ka ba mamela mantsoe a buka ena, leha e le ho phetha tse ho itsoeng re li etse.”
14Joale moprista Hilekiea, le Ahikama, le Akabore, le Shafane, le Asaea, ba ea ho Hulada, moporofeta oa mosali, mohats'a Shalōme, mora oa Tikefa, setlōhōlō sa Harahase, molebeli oa liaparo tsa Tempele. Moporofeta eo o ne a ahile karolong e ncha ea Jerusalema. Ba fihla ba buisana le eena.
15Moporofeta a re ho bona: “Morena Molimo oa Iseraele, o bua tjena: ‘Bolellang monna ea le rōmmeng ho 'na, le re: 16Ke tla lihela sebaka sena le baahi ba sona koluoa, ho ea ka lipolelo tse ngotsoeng bukeng eo khosi ea Juda e tsoa e bala. 17Ke kahobane ba mphuraletse, ba chesetsa melimo e meng mokubetso, ba nkhalefisa ka mesebetsi eohle ea bona. Ka baka leo, khalefo ea ka e tla tlōkōmela sebaka sena, 'me e ke ke ea tingoa. 18Empa khosi ea Juda, e le rōmetseng ho tla e botsetsa Morena, le tle le e bolelle, le re: Morena Molimo oa Iseraele, o bua tjena malebana le mantsoe ao u a utloileng. 19Ka baka la hobane eitse ha u utloa mantsoe ao ke a buileng ka sebaka sena le baahi ba sona, a hore se tla fetoha lesupi, se rohakehe, ua hahola liaparo tsa hao, pelo ea hao ea e-ba bonolo, ua ikokobeletsa Morena, ua ntšèla ka likhapha, le 'na ke utloile thapelo ea hao,’ ho rialo Morena. 20‘Ka baka leo he, ke tla u isa ho bo-ntat'ao, u phomole lebitleng la hao ka khotso. U ke ke ua bona koluoa eo ke tla e lihela holim'a sebaka sena.’ ”
Eaba ba isetsa khosi litaba tsena.
