Ho kula le ho fola ha khosi Hesekiea
1Mehleng eo, Hesekiea a kulela lefu. Eaba moporofeta Esaea, mora oa Amose, o fihla ho eena, o re: “Morena o bua tjena: ‘Lōkisa tsa lelapa la hao, hobane u tla shoa; u ke ke ua hlola u phela.’ ”
2Joale Hesekiea a retelehela leboteng, a rapela Morena, a re: 3“Oho, Morena, kea u kōpa: Ak'u hopole kamoo ke u sebelelitseng kateng ka botšepehi, le ka pelo e se nang mano, 'me ka etsa tse lokileng mahlong a hao.” Eaba Hesekiea o lla habohlōkō.
4Esaea o ne a e-s'o tsoe ka lebaleng le kahare, ha lentsoe la Morena le fihla ho eena, le re: 5“Khutla, u e'o bolella Hesekiea, moetapele oa sechaba sa ka, u re ho eena: ‘Morena Molimo oa ntat'ao-moholo, Davida, o bua tjena: Ke utloile thapelo ea hao, 'me ke bone meokho ea hao. Bona, ke tla u folisa. Ka letsatsi la boraro u tle u nyolohele ka Tempeleng ea Morena. 6Ke tla eketsa litšiu tsa hao ka lilemo tse leshome le metso e mehlano. Uena, le ba motse ona, ke tla le namolela matsohong a khosi ea Asiria. Motse ona ke tla o sireletsa ka lebaka la ka, le ka lebaka la mohlanka oa ka Davida.’ ”
7Eaba Esaea o re: “Tlisang polokoana ea mangangajane a feiee!” Ba e nka, ba e tlamella holim'a lethōpa, 'me a fola.
8Joale Hesekiea a re ho Esaea: “Pontšo ea hore Morena o tla mpholisa, le hore ke tla be ke nyolohele ka Tempeleng ea Morena ka letsatsi la boraro, e tla ba efe?”
9Esaea a re: “Pontšo ea hore Morena o tla phethisa seo a se buileng ke ena: Na u rata ha moriti o ka chechella pele ka mehato e leshome, kapa o ka chechella morao ka mehato e leshome?”
10Hesekiea a araba, a re: “Ho bonolo hore moriti o chechelle pele ka mehato e leshome; e-re o chechelle morao ka mehato e leshome.”
11Eaba moporofeta Esaea o rapela Morena, 'me Morena a chechisetsa moriti morao ka mehato a leshome, eo o neng o se o e tsamaile holim'a letlapa le supang nako, le entsoeng ke Akase.
Maqosa a tsoang Babilona
12Ka eona nako eo, Merodake-Baladane, mora oa Baladane, khosi ea Babilona, a rōmela mangolo le limpho ho Hesekiea, hobane o ne a ile a utloela tsa ho kula ha hae. 13Hesekiea a thabela litaba tsa maqosa, 'me a a bontša matlotlo a ntlo ea hae. A a bontša silefera, le khauta, le linōko, le litlolo tsa bohlokoa, le ntlo ea hae ea lihlomo le tsohle tse ka matlōleng a hae. Ha hoa ka ha e-ba le letho le ka tlung ea hae, le 'musong oa hae, leo Hesekiea a sa kang a a bontša lona.
14Eaba moporofeta Esaea o fihla ho khosi Hesekiea, o re ho eena: “Banna baa ba itse'ng? Ba itse ba tsoa kae?”
Hesekiea a araba, a re: “Ba tsoa naheng e hōle, ea Babilona.”
15Moporofeta Esaea a re: “Ba bone eng ka tlung ea hao?”
Hesekiea a araba, a re: “Ba bone tsohle tse ka tlung ea ka. Ha ho letho ka matlōleng a ka, leo ke sa ba bontšang lona.”
16Eaba Esaea o re ho Hesekiea: “Mamela lentsoe la Morena: 17‘Mehla ea tla eo ka eona tsohle tse ka tlung ea hao, le tsohle tseo bo-ntat'ao ba li bōlōkileng ho fihlela joale, li tla isoa Babilona. Ha ho letho le tla sala,’ ho rialo Morena. 18Ba bang ba bara ba hao, ba tla tsoaloa ke uena, ba tla thōpuoa, e e'o ba bahlanka ka tlung ea khosi ea Babilona.”
19Eaba Hesekiea o re ho Esaea: “Lentsoe la Morena, leo u le boletseng, le lokile.” Ka pelong ea hae o ne a re: “Mehleng ea ka re tla phela ka khotso, re sireletsehile.”
Qetello ea puso ea Hesekia
20Liketso tse ling tsa Hesekia, le tsa bohlabani ba hae, le kamoo a ileng a etsa letšana, le mosele kateng, a kenya metsi ka motseng, li ngotsoe Bukeng ea Liketsahalo tsa Likhosi tsa Juda. 21Joale Hesekiea a shoa, 'me Manase, mora oa hae, a mo hlahlama.
