Ataleea o bolaea ba lelapa la khosi ea Juda
1Ha Ataleea, 'm'a Akasiea, a bona hore mora oa hae o shoele, a tsamaea, a ea bolaea bana bohle ba lelapa la khosi. 2Empa Jehosheba, morali oa khosi Jehorame, khaitseli ea Akasiea, a nka Jōoashe, mora oa Akasiea, a mo ntša har'a bara ba khosi, ba neng ba lōkela ho bolaoa. A mo pholosa ho Ataleea, a mo pata kamoo ho bolokoang liphate kateng hammoho le mohōlisi oa hae, 'me eaba ha a bolaoe. 3Ka lilemo tse tšeletseng, ha Ataleea a ntse a busa naha eo, Jehosheba a pata Jōoashe ka Tempeleng ea Morena.
Jōoashe o etsoa khosi
4Ka selemo sa bosupa, Jehoeada a rōma maqosa ho ea bitsa balaoli ba ba makholo, le balebeli ba khosi. Ba ba tlisa ho eena Tempeleng ea Morena. Jehoeada a etsa selekane le bona, a ba hlapantšetsa ka Tempeleng ea Morena, 'me a ba bontša mora oa khosi. 5Eaba oa ba laela, o re: “Seo le tla se etsa ke sena: Sehlopha sa pele sa lihlopha tse tharo, se kenang mosebetsing ka Sabatha, se tla lebela le ntlo ea khosi. 6Sehlopha sa bobeli se tla lebela khorong ea Sure, sa boraro sona se lebele khorong e kamorao ho ntlo ea balebeli. Le tla lebela ntlo ea khosi ho e sireletsa. 7Lihlopha tsa lōna tse peli, tse phomolang ka Sabatha, li tla lebela Tempele ea Morena, li sireletse khosi. 8Le tla teela khosi hare, motho le motho a tšoere lihlomo tsa hae. Ea tla leka ho le phunyeletsa a bolaoe! Le be le khosi hohle moo e eang teng.”
9Balaoli ba ba makholo ba phetha kahohle kamoo moprista Jehoeada a neng a ba laetse kateng; motho le motho a tla le balebeli ba hae ba kenang mosebetsing ka Sabatha, le ba phomolang ka Sabatha, ba ea ho moprista Jehoeada. 10Moprista a nea balaoli ba ba makholo marumo a khosi Davida, le lithèbè tsa hae, tse neng li le ka Tempeleng ea Morena. 11Balebeli ba ema ba teetse khosi hare, e mong le e mong a tšoere lihlomo tsa hae; thekō ea bona ea tloha ntlheng e ka letsohong le letona la Tempele, ho isa ntlheng e ka letsohong le letšehali, ba pota-pota Tempele le aletare.
12Joale moprista Jehoeada a hlahisa mora oa khosi, a mo roesa mofapahlooho, a mo nea le Buka ea Molao. Eaba Jōoashe oa tlotsoa, o etsoa khosi. Sechaba sa opa mahofi, sa re: “Khosi e ke e re phelele!”
Lefu la Ataleea
13Ha Ataleea a utloa litlatse tsa balebeli le tsa sechaba, a tla ho sona ka Tempeleng ea Morena. 14Ha a fihla, a bona khosi e eme pel'a tšiea, ho latela moetlo, mahosana le baletsi ba literompeta ba le pel'a khosi, le sechaba sohle se nyakaletse, se letsa literompeta. Ataleea a hahōla liaparo tsa hae, a hōoeletsa, a re: “Bohlabaphieo! Bohlabaphieo!”
15Empa moprista Jehoeada a laela balaoli ba ba makholo, e leng baokameli ba mabōtho, a re ho bona: “Mo ntšetseng kantle ho mabala a Tempele! Motho ea tla mo sala morao le 'molaee ka sabole!” Moprista o ne a ile a inahana, a re: “Ha a tšoanele ho bolaeloa mabaleng a Tempele ea Morena.” 16Eaba baa mo tšoara, ba mo ntša ka tsela ea lipere, e kenang ka tlung ea khosi, 'me ba 'molaela hona moo.
Jehoeada o etsa liphetoho
17Joale moprista Jehoeada a etsa selekane pakeng tsa Morena, le khosi, le sechaba, hore e be sechaba sa Morena. A se etsa le pakeng tsa khosi le sechaba. 18Sechaba sohle sa naha eo sa kena ka tempeleng ea Baale, sa e heletsa, sa thuakanya lialetare le litšoantšo tsa hae, sa li etsa thuè-thuè, sa bolaela Matane, moprista oa hae, kapele ho lialetare.
Moprista Jehoeada a khethela Tempele ea Morena balebeli. 19Jehoeada a nka balaoli ba ba makholo, le balebeli ba ntlo ea khosi, hammoho le sechaba sohle, ba tlosa khosi Tempeleng ea Morena. Ba tsamaea ka tsela e fetang khorong ea balebeli, ba ea tlung ea khosi, 'me khosi ea fihla ea lula setulong sa bokhosi. 20Kamor'a hoba Ataleea a bolaeloe pel'a ntlo ea khosi ka sabole, sechaba sohle sa naha eo sa nyakalla, motse oa e-ba le khotso.
21Jōoashe o ne a e-na le lilemo tse supileng ha a qala ho busa.
