2 LIKETSAHALO 6

₁Joale Solomone a re: “Morena o itse o tla lula kahar'a lefifi le letšo-letšo. ₂Empa ke u hahetse Tempele, e leng sebaka seo u tla lula ka ho sona kamehla eohle.”

₃Eare sechaba sohle sa Iseraele se sa eme moo, khosi ea retelehela ka ho sona, ea se hlohonolofatsa. ₄Eaba khosi e re: “Ho bokoe Morena Molimo oa Iseraele, ea phethahalitseng seo a neng a se tšepise Davida, ntate, a re: ₅‘Ho tloha mohla ke ntšang sechaba sa ka Egepeta, ha ho motse, har'a merabe ea Iseraele, oo nkileng ka o khetha hore ke hahe Tempele eo ke tla lula ho eona ho oona, 'me ha ke e-s'o khethe motho hore e be 'musi oa sechaba sa ka sa Iseraele. ₆Empa ke khethile Jerusalema hore ke tle ke khumamelloe teng, 'me ke khethile Davida hore a buse sechaba sa ka sa Iseraele.’

₇“E ne e le takatso ea Davida, ntate, ho hahela Morena Molimo oa Iseraele Tempele, moo a tla khumamelloa teng. ₈Empa Morena a re ho Davida, ntate: ‘Ke hantle ha u ile ua lakatsa ho nkhahela Tempele; ₉leha ho le joalo, hase uena ea tla nkhahela Tempele, empa mora oa hao, ea tsoang lethekeng la hao, ke eena ea tla nkhahela eona.’

₁₀“Joale Morena o phethahalitse polelo eo a neng a e bue, hobane ke tsoetsoe tlung ea Davida, ntate. Ke lutse terone ea Iseraele joalokaha Morena a ne a tšepise, 'me ke bile ke hahetse Morena Molimo oa Iseraele Tempele. ₁₁Ke kentse areka ka ho eona, e leng areka eo selekane sa Morena, seo a neng a se etse le bana ba Iseraele, se leng ka ho eona.”

₁₂Eaba Solomone o ema kapele ho aletare ea Morena, moo sechaba sohle sa Iseraele se ntseng se bona, a phakalatsa matsoho. ₁₃Solomone o ne a hahile sethala sa lethose. Bolelele ba sona e ne e ka ba limethara tse peli le halofo, bophara ba sona e ka ba limethara tse peli le halofo, ha bophahamo ba sona e ne e ka ba methara le halofo. O ne a se beile bohareng ba lebala. A hloella holim'a sona, a nt'o khumama moo sechaba sohle sa Iseraele se ntseng se 'mona, a phahamisetsa matsoho a hae leholimong, ₁₄a re:

“Oho, Morena Molimo oa Iseraele, ha ho Molimo ea kang uena leholimong le lefatšeng; ea bōlōkang selekane, ea hauhelang bahlanka ba hae ba latelang melao ea hae ka lipelo tsa bona tsohle. ₁₅U bōlōkile tšepiso eo u neng u e etsetse mohlanka oa hao Davida, ntate. U bile u ne u bue ka molomo oa hao, 'me ka letsatsi lena u phethahalitse polelo eo ka matla a hao.

₁₆“Joale uena Morena Molimo oa Iseraele, ak'u bōlōke tšepiso eo u neng u e etsetse mohlanka oa hao Davida, ntate, ua re: ‘U ke ke ua hloka mohlahlami ea tla lula teroneng ea Iseraele, ha feela bara ba hao ba ka hlokomela metsamao ea bona, ba latela melao ea ka joalokaha u ile ua etsa.’ ₁₇Oho, Morena Molimo oa Iseraele, polelo ea hao, eo u neng u e bolelle mohlanka oa hao Davida, e ke e phethahatsoe.

₁₈“Empa na, ruri, Molimo o tla hle a ahe lefatšeng le batho? Bona, haesitana le maholimo a maholo hakana-kana a sa u lekane, ebe joale Tempele ee, e hahiloeng ke 'na, eona e ka u lekana joang? ₁₉Leha ho le joalo, oho, Morena Molimo oa ka, ak'u mamele thapelo le thapeli ea mohlanka oa hao, u utloe sello le thapelo, e leng tseo mohlanka oa hao a u rapelang ka tsona kajeno. ₂₀Bosiu le motšeare mahlo a hao a ke a lebele Tempele ena, e leng sebaka seo u buileng ka sona, ua re: ‘'Na ke tla ba teng mona.’ Ka baka leo, ak'u utloe thapelo eo mohlanka oa hao a tla e etsa a talimile sebakeng sena. ₂₁Ak'u mamele kōpo ea mohlanka oa hao, le ea sechaba sa hao sa Iseraele, ha se rapela se talimile sebakeng sena. Mamela u le leahong la hao le leholimong, 'me ha u utloa, u se tšoarele.

₂₂“Ha motho a siteloa oa habo, 'me a tlisoa kapele ho aletare ea hao, ka Tempeleng ena, ho thoe a hlapanye hore ha a na molato, ₂₃u utloe u le leholimong, 'me u ahlōlele bahlanka ba hao; u tsoe ea khopo, o mo jarise molato oa hae, u lōkōlle ea se nang molato, u mo ahlōlele ho ea ka ho hloka molato ha hae.

₂₄“Ha sechaba sa hao sa Iseraele se ka hlōloa ke lira, kahobane se u sitetsoe, 'me eba se khutlela ho uena, se bolela hore ke uena Molimo, se u rapela, se u kōpa se le ka Tempeleng ena, ₂₅u se utloe u le leholimong, 'me u se tšoarele sebe sa sona, u se khutlisetse naheng eo u neng u e nee bo-ntat'a sona.

₂₆“Ha letsatsi le eme, pula e sa ne, hobane sechaba sa hao se u sitetsoe, 'me eba se rapela se talimile Tempeleng ena, se bolela hore ke uena Molimo, se furalla sebe sa sona ha u se otla, ₂₇u se utloe u le leholimong, 'me u tšoarele bahlanka ba hao, e leng sechaba sa hao sa Iseraele, sebe sa bona. Ak'u ba rute tsela e lokileng, eo ba tla tsamaea ka eona. Naha ea hao eo u e neileng sechaba sa hao, hore e be lefa la sona, u e nesetse pula.

₂₈“Haeba naha e e-na le sekoboto, ho e-na le lefu la seoa, le lebabo, le boroku, le litsie kapa bookholane, eba lira tsa sechaba sena li etsetsa metse ea sona thibella, leha ho ka ba le seoa sefe le sefe, kapa maloetse afe le afe, ₂₉thapelo kapa kōpo efe le efe, e etsoang ke motho ofe le ofe, kapa sechaba sa hao sohle sa Iseraele, kamoo motho ka mong a ka susumetsoang ke matšoenyeho a hae le litlokotsi tsa hae kateng, eba o otlollela matsoho a hae Tempeleng ena, ₃₀u utloe u le leahong la hao le leholimong, u ba tšoarele. Motho ka mong u mo putse ho ea ka liketso tsa hae, hobane u tseba pelo ea hae. Ke uena, 'me ke uena feela, ea tsebang lipelo tsa batho. ₃₁Etsa hore ba tle ba u tšabe, ba tsamaee litseleng tsa hao ka matsatsi 'ohle, ha ba ntse ba phela naheng eo u neng u e nee bo-ntat'a rōna.

₃₂“Le molichaba, eo e seng oa sechaba sa hao sa Iseraele, ea tsoang naheng e hole ka baka la ho utloa lebitso la hao le leholo, le kahobane a utloile ha ho boleloa matla a hao, 'me a bona letsoho la hao le otlolohileng, a rapela a talimile Tempeleng ena, ₃₃u mo utloe o le leahong la hao le leholimong. Molichaba eo u mo etsetse tsohle tseo a li kōpang ho uena, e le hore lichaba tsohle tsa lefatše li tle li tsebe lebitso la hao, li u tšabe, joalokaha sechaba sa hao sa Iseraele se u tšaba; li be li tsebe hore Tempeleng ena eo ke e hahileng, ke moo u khumamelloang teng.

₃₄“Ha sechaba sa hao se futuhela lira tsa sona, hohle moo u ka se rōmelang teng, 'me se rapela se talimile motseng ona oo u o khethileng, le Tempeleng ena eo ke u hahetseng eona, ₃₅u utloe thapelo ea sona le kōpo ea sona u le leholimong, 'me u etse hore se hlōle.

₃₆“Haeba ba u siteloa, hobane ha ho motho ea sa sitoeng, u tla ba halefela, u neelane ka bona ho lira tsa bona, hore li ba hape, e be bathōpuoa ba tsona, li ba ise naheng ea tsona e hōle kapa e haufi. ₃₇Empa haekare ha ba le naheng eo ba isitsoeng ho eona e le bathōpuoa, ba baka, 'me hona naheng eo ea bathōpi ba bona ba u kōpa, ba re: ‘Re sitiloe, re khelohile, re entse bokhopo,’ ₃₈'me ba khutlela ho uena ka lipelo tsa bona tsohle, le ka meea ea bona eohle, ha ba ntse ba le naheng eo ea bathōpi ba bona; ha ba u rapela ba talimile naheng ena ea bona, eo u neng u e nee bo-ntat'a bona, le motseng ona oo u o khethileng, le Tempeleng ena eo ke u hahetseng eona; ₃₉u utloe thapelo le kōpo ea bona, u le leahong la hao le leholimong, 'me u ba sebeletse ka toka, u tšoarele sechaba sa hao se u sitetsoeng.

₄₀“Molimo oa ka, mahlo a hao a ke a be nchocho, le litsebe tsa hao li be lethoèthoè, u utloe lithapelo tse etsetsoang sebakeng sena.