Puso ea Josiea, khosi ea Juda
1Josiea o ne a e-na le lilemo tse robeli ha a qala ho busa. A busa ka lilemo tse mashome a mararo a motso o mong, a le Jerusalema. 2A khahlisa Morena, a tsamaea mehlaleng eohle ea Davida, ntat'ae-moholo, a se ke a kheloha.
Josiea o loantša borapeli ba balichaba
3Ka selemo sa borobeli sa puso ea hae, Josiea a qala ho sebeletsa Molimo oa Davida, ntat'ae-moholo, le hoja a ne a sa le monyenyane. Ka selemo sa leshome le metso e 'meli a qala ho hloekisa Juda le Jerusalema, ka ho felisa libaka tsa bona, tseo ho rapelloang melimo ea bohata ho tsona, le ka ho felisa litšoantšo tsa Ashera, le litšoantšo tse betliloeng, le litšoantšo tse bōpiloeng. 4A thua lialetare tsa bo-Baale, a heletsa le litšoantšo tsa melimo ea bohata, tse neng li le kaholimo ho tsona. A senya litšoantšo tsa Ashera, le litšoantšo tse betliloeng le litšoantšo tse bōpiloeng. Tsena a li silakanya, a li etsa thuethue, 'me a e qhalla holim'a mabitla a batho ba neng ba li etsetsa mahlabelo. 5A chesetsa masapo a baprista holim'a lialetare tsa bona, 'me a hloekisa Juda le Jerusalema. 6A etsa joalo metseng ea ba morabe oa Manase, le oa Efraime, le oa Simeone, ho ea fihla ho oa Nafthali, le masuping a e pota-potileng. 7Ha a se a helelitse lialetare, a sentse le litšoantšo tsa Ashera, a silakantse le litšoantšo tse betliloeng, a robakile le litšoantšo tsohle tsa melimo ea bohata naheng eohle ea Iseraele, eaba o khutlela Jerusalema.
Buka ea Molao ea fumanoa
8Ka selemo sa mashome a mabeli sa puso ea Josiea, ha a se a hloekisitse naha le Tempele, a rōma Shafane, mora oa Asaleea, le Maasiea, mookameli oa motse, le Jōoa, mora oa Jōoakase, e leng mongoli oa liketsahalo, ho lokisa Tempele ea Morena Molimo oa hae.
9Ha ba fihla ho Hilekiea, Moprista e Moholo, ba mo nea chelete e neng e tlisitsoe Tempeleng ea Morena, eo Balevi ba neng ba lebela monyako ba ileng ba e bōkella ho ba morabe oa Manase, le oa Efraime, le ho masalla 'ohle a Iseraele, le ho bohle ba morabe oa Juda, le ba morabe oa Benjamine, le ho baahi ba Jerusalema. 10Chelete ena ba e nea basebetsi ba neng ba hlokomela Tempele ea Morena, 'me bao ba e nea basebetsi ba neng ba lokisa le ho nchafatsa Tempele ea Morena. 11Ba e nea le libetli tsa mapolanka, le lihahi, hore li reke majoe a betliloeng, le lifate tse tla etsa libalaka, le maballo a matlo ao likhosi tsa Juda li ileng tsa a tlohella hore a senyehe.
12Banna bao ba etsa mosebetsi ka botšepehi. Ba ne ba okametsoe ke Jahate le Obadiea bao e neng e le Balevi ba bara ba Merari, le Sekariea le Meshulame, ba bara ba Kohate. Balevi ba neng ba e-na le tsebo ea liletsa, 13ba ne ba hlokomela ba thōthang thepa, ba okametse le ba etsang mesebetsi eohle. Balevi ba bang e ne e le bangoli, le babōlōki ba libuka, le balebeli ba menyako.
14Ha ba ntša chelete e neng e tlisitsoe ka Tempeleng ea Morena, moprista Hilekiea a fumana Buka ea Molao oa Morena, e neng e ngotsoe ke Moshe. 15Hilekiea a bua le Shafane, eo e neng e le mongoli, a re: “Ke fumane Buka ea Molao ka Tempeleng ea Morena!” Hilekiea a nea Shafane buka eo.
16Shafane a isa buka eo ho khosi, a ba a bolella khosi, a re: “Bahlanka ba hao ba entse tsohle tseo u ba laetseng tsona. 17Ba ntšitse chelete e neng e le ka Tempeleng ea Morena, 'me ba e neile baokameli le basebetsi.” 18Shafane eo e neng e le mongoli, a bolella khosi, a re: “Moprista Hilekiea o 'neile buka ena.” Eaba Shafane o e balla khosi.
19Eitse hoba khosi e utloe mantsoe a tsoang Bukeng ena ea Molao, ea hahōla liaparo tsa eona, 20ea laela Hilekiea, le Ahikama, mora oa Shafane, le Abadone, mora oa 'Mika, le Shafane eo e neng e le mongoli, le Asaea, mohlanka oa khosi, ea re: 21“Tsamaeang, le e'o mpotsetsa Morena, le botsetse le masalla a Iseraele, le a sechaba sa Juda, mabapi le mantsoe a tsoang bukeng ena e fumanoeng. Khalefo eo Morena a re halefetseng ka eona ea tlōkōma, hobane bo-ntat'a rōna ha baa ka ba mamela mantsoe a Morena ka ho se phethe tsohle tse ngotsoeng bukeng ena.”
22Joale Hilekiea le bao khosi e ba khethileng, ba ea ho Huleda, moporofeta oa mosali, mohats'a Shalōme, mora oa Tikefa, setlōhōlō sa Hasera, molebeli oa liaparo. Moporofeta eo o ne a ahile karolong e ncha ea Jerusalema. Ba fihla ba buisana le eena ka taba ena.
23Moporofeta a re ho bona: “Morena Molimo oa Iseraele, o bua tjena: ‘Bolellang monna ea le rōmmeng ho 'na, 24le re: Morena o re: Ke tla lihela sebaka sena le baahi ba sona koluoa, le lithōhako tsohle tse ngotsoeng bukeng eo ba ileng ba e balla khosi ea Juda. 25Ba mphuraletse, 'me ba cheselitse melimo e meng mokubetso, ba nkhalefisa ka mesebetsi eohle ea bona. Ka baka leo, khalefo ea ka e tla tlōkōmela sebaka sena, 'me e ke ke ea tingoa.’ 26Empa khosi ea Juda, e le rōmetseng ho tla e botsetsa Morena, le tle le e bolelle, le re: ‘Morena Molimo oa Iseraele, o bua tjena, malebana le mantsoe ao u a utloileng. 27Ka baka la hobane pelo ea hao e bile bonolo, ua ikokobeletsa Molimo, ha u utloa tsa hae tseo a li buileng ka sebaka sena le baahi ba sona, ua ikokobeletsa 'na, ua hahola liaparo tsa hao, ua ntšéla ka likhapha, le 'na ke utloile thapelo ea hao, ho rialo Morena. 28Ka baka leo, ke tla u isa ho bo-ntat'ao, u phomole lebitleng la hao ka khotso. U ke ke ua bona koluoa eo ke tla e lihela holim'a sebaka sena le baahi ba sona.’ ”
Eaba ba isetsa khosi litaba tsena.
Josiea o etsa selekane
29Khosi ea rōma maqosa ho e memela baholo bohle ba Juda le ba Jerusalema. 30Eaba khosi e nyolohela Tempeleng ea Morena, e e-na le banna bohle ba Juda, le baahi ba Jerusalema, le baprista, le Balevi, le sechaba sohle sa ba baholo le ba banyenyane. Moo ba ntseng ba utloa, khosi ea ba balla mantsoe 'ohle a buka ea selekane, e ileng ea fumanoa ka Tempeleng ea Morena. 31Khosi ea ema litulong tsa eona, ea etsa selekane kapele ho Morena, ea re e tla latela Morena, e bōlōke litaelo tsa hae, le litemoso tsa hae, le melao ea hae, ka pelo ea eona eohle, le ka moea oa eona oohle, ho phethisa mantsoe a selekane, a ngotsoeng bukeng ena.
32Ea laela hore bohle ba Jerusalema, le ba Benjamine, ba itlame ka selekane sena. Baahi ba Jerusalema ba etsa hona, ho ea ka selekane sa Molimo, Molimo oa bo-ntat'a bona.
33Eaba Josiea o tlosa manyala 'ohle linaheng tsohle tseo e neng e le tsa bana ba Iseraele. A etsa hore bohle ba fumanoang naheng ea Iseraele ba sebeletse Morena Molimo oa bona. Nakong eohle ea ho phela ha Josiea, ha baa ka ba kheloha, ba ile ba latela Morena Molimo oa bo-ntat'a bona.
