1Abiea a shoa, 'me a epeloa Motseng oa Davida. Asa, mora oa hae, a mo hlahlama. Mehleng ea hae naha ea e-ba le khotso ka lilemo tse leshome.
Puso ea Asa khosi ea Juda
2Asa a etsa tse molemo le tse lokileng mahlong a Morena Molimo oa hae. 3A heletsa lialetare tsa melimo ea bohata, a felisa libaka tseo ho rapelloang melimo ea bohata ho tsona, a pshatla le lifika tseo ba li khumamelang, a thua le litšoantšo tsa Ashera. 4A laela sechaba sa Juda hore se sebeletse Morena Molimo oa bo-ntat'a sona, le hore se bōlōke melao ea hae le litaelo tsa hae. 5Metseng eohle ea Juda a felisa libaka tsohle tseo ho neng ho rapelloa melimo ea bohata ho tsona, a felisa le lialetare tseo ho neng ho chesetsoa mekubetso ho tsona, 'me 'muso oa e-ba le khotso.
6A haha metse naheng ea Juda, 'me a e haheletsa. Naha e ne e e-na le khotso, lilemong tseo ho se na lintoa, hobane Morena o ne a mo neile boiketlo.
7Eaba Asa o re ho sechaba sa Juda: “A re haheng metse ena, re e haheletse ka marako, re a etsetse litora, le likhoro, le mekoallo, naha ena e sa ntsane e busoa ke rōna. Re sebelelitse Morena Molimo oa rōna; re mo sebelelitse, 'me eena o re neile khotso kahohle.” Ba haha metse eo, 'me ba atleha.
8Asa o ne a e-na le lebōtho la bahlabani ba likete tse makholo a mararo, ba tsoang naheng ea Juda, ba neng ba hlometse ka lithèbè le marumo, le ba likete tse makholo a robeli, ba tsoang naheng ea Benjamine, ba neng ba hlometse ka lithèbè le liqha. Bahlabani bana kaofela e ne e le bahale.
9Sera oa Mokushe a ba futuhela ka lebōtho la bahlabani ba milione, le ka likariki tsa ntoa tse makholo a mararo, a ba a ea fihla Maresha. 10Asa a tsoa ho ea mo khahlanyetsa, lithekō tsa talimana li le ka khohlong ea Sefata, haufi le Maresha.
11Eaba Asa o ipiletsa ho Morena Molimo oa hae, o re: “Morena, ke ntho e nyenyane ho uena ho thusetsa ea fokolang ho ea matla. Re thuse Morena Molimo oa rōna, hobane re u tšepile. Re futuhela lebōthohali lena ka lebitso la hao. Oho, Morena, u Molimo oa rōna, ho se be motho ea ka u hlōlang.”
12Joale Morena a etsa hore Bakushe ba hlōloe ke bo-Asa le bahlabani ba Juda. Bakushe ba baleha. 13Asa le bahlabani ba hae ba ba phalalisa ho ea fihla Gerare, 'me Bukushe ba hlōloa hoo ba ileng ba sitoa le ho boea sekoele. Ba hlōloa ke Morena le lebōtho la hae. Bahlabani ba Juda ba hapa haholo. 14Ba timetsa metse eohle e pota-potileng Gerare, hobane Morena o ne a ile a kenya baahi ba eona letsoalo. Ba hapa lintho tsohle metseng eo, etsoe metse eo e ne e e-na le lintho tse ngata. 15Ba futuhela balisana ba mehlape ea likhomo. Ba futuhela le metebo, ba hapa likhutšoane, le likamele tse ngata, eaba ba khutlela Jerusalema.
