Solomone o kōpa bohlale
1Solomone, mora oa Davida, a tsitsa 'musong oa hae; Morena Molimo oa hae, a ba le eena, 'me a mo phahamisa haholo.
2Joale Solomone a bua le Baiseraele bohle, le balaoli ba bahlabani ba sekete, le ba bahlabani ba lekholo, le baahlōli, le mahosana 'ohle a Baiseraele, e leng lihlooho tsa malapa abo bona. 3A tsamaea le sechaba sohle, a ea sebakeng sa borapeli se neng se le Gibeone, hobane Tente ea Molimo eo Moshe, mohlanka oa Morena, a neng a e etse ha a le lehoatateng, e ne le hona moo Gibeone. 4Feela Davida o ne a ile a nyolla areka ea Molimo Kiriate-Jearime, a e isa sebakeng seo a neng a e lokiselitse sona. O ne a e hlometse tente Jerusalema. 5Le aletare ea lethose eo Besalele, mora oa Uri, setlōhōlō sa Hure, a neng a e entse, o ne a e hlomme kapele ho Leaho la Morena moo bo-Solomone le sechaba ba neng ba e-ea teng ho ea bua le Morena. 6Solomone a hloella aletareng ea lethose, kapele ho Morena. Aletare eo e ne e le pel'a Tente ea Morena, 'me a etsetsa linyehelo tsa secheso tse sekete holim'a eona.
7Hona bosiung boo Molimo a iponahatsa ho Solomone, a re ho eena: “Kōpa seo u lakatsang hore ke u fe sona!”
8Solomone a re ho Molimo: “U bontšitse lerato le leholo ho Davida, ntate, 'me u entse hore ke be khosi, ke mo hlahlame. 9Joale Morena Molimo, tšepiso eo u e etselitseng Davida, ntate, e ke e phethahale, hobane ke mona u nkentse khosi ea sechaba se sengata joaloka lerōle la lefatše. 10Ak'u 'nee bohlale le tsebo, e le hore ke tle ke tsebe ho etella sechaba sena pele, hobane ke mang ea ka tsebang ho busa sechaba see sa hao se sekaale-kaale?”
11Molimo a re ho Solomone: “Kaha u kōpile se ka pelong ea hao, u sa ikōpela matlotlo, kapa maruo, kapa tlōtla, kapa hore lira tsa hao li timetsoe, kapa hore u phele halelele, u mpa u ikōpetse bohlale le tsebo, hore u tle u tsebe ho busa sechaba sa ka, seo ke u beileng ho ba khosi ea sona, 12ke u nea bohlale, le tsebo. Ke tla be ke u nee le matlotlo, le tlōtla, e leng tseo ho e-s'o be le khosi e kileng ea e-ba le tsona pele ho uena, kapa e tla ba le tsona kamorao ho uena.”
Matla le maruo a khosi Solomone
13Eaba Solomone o khutlela Jerusalema, a e-tsoa sebakeng sa borapeli se neng se le Gibeone, moo a neng a le kapele ho Tente ea Morena, 'me a fihla a busa Baiseraele.
14Solomone a khōbōkanya likariki tsa ntoa le bahlabani ba palamang. O ne a e-na le likariki tsa ntoa tse sekete le makholo a mane, le bahlabani ba palamang ba likete tse leshome le metso e 'meli, bao a ileng a ba bea metseng eo ho bōlōkoang likariki tsa ntoa ho eona, le Jerusalema moo a neng a le hona teng. 15Khosi ea etsa hore motseng oa Jerusalema, silefera le khauta li be ngata joaloka majoe, le lifate tsa likedare li be ngata joaloka lifate tsa monokotšoai tse phuleng. 16Bahoebi ba khosi Solomone ba ne ba mo rekela lipere Egepeta le Kuoe. 17Kariki ea ntoa e ne e rekoa ka silefera e ke etsang boima ba likilo tse supileng, pere eona e le silefera e boima bo ka bang kilo le halofo. Bahoebi ba ne ba rekisetsa likhosi tsohle tsa Bahete le tsa Baarame lipere tsena.
