Tse batlehang ho baokameli ba kereke
1Lentsoe lena ke la 'nete: Ha motho a lakatsa bookameli ba kereke, o lakatsa mosebetsi o motle. 2Mookameli oa kereke eka khona a hloke koli; e be monna ea nang le mosali a le mong, a be le boitšoaro linong, a be seli, a be le seriti, a thabele baeti, 'me a tsebe ho ruta. 3E se ke ea e-ba letahoa kapa ea leqhōkō, empa e be motho ea bonolo, ea sa rateng ntoa, le ea sa rateng chelete. 4A tsebe ho busa lelapa la hae hantle, 'me a etse hore bana ba hae ba mo mamele ka hlompho eohle. 5Haeba motho a sa tsebe ho busa lelapa la hae, a ka tseba joang ho hlokomela kereke ea Molimo? 6E se be motho ea sa tsoa sokoloha, esere a ikhōhōmōsa, 'me a oeloa ke kahlōlo joaloka Diabolosi. 7Eka khona a buuoe hantle ke ba kantle ho kereke, esere a oela ho tse mo tlontlollang, le lerabeng la Diabolosi.
Tse batlehang ho basebeletsi ba kereke
8Ka mokhoa o joalo, eka khona basebeletsi ba kereke ba be le boitlhompho, e se be bo-teme-peli, ba se hlanyetse lino, kapa ba ithuisa ka mano. 9Ba bōlōke sephiri sa tumelo ka letsoalo le khutsitseng. 10Ba hlahlojoe pele, 'me ha ba sa nyatsehe, ba sebeletse kereke.
11Basali le bona ba be le boitlhompho, ba se bue batho hampe, ba be le boitšoaro linong, 'me ba tšepahale linthong tsohle.
12Mosebeletsi oa kereke e be monna ea nang le mosali a le mong, 'me a tsebe ho busa bana le lelapa la hae hantle. 13Ba sebelelitseng kereke hantle ba tla iphumanela litulo tse hlomphehang, 'me ba bolele tsa tumelo ho Jesu Kreste ka sebete.
Sephiri sa tumelo ea rōna
14Ke u ngolla tsena ke ntse ke tšepile ho tla ho uena haufi. 15Empa haeba nka lieha, u se u ntse u tseba kamoo u tšoanetseng ho itšoara kateng ka tlung ea Molimo, e leng kereke ea Molimo ea phelang, tšiea le mothèo oa 'nete. 16Ha ho pelaelo, sephiri sa tumelo ea rōna se seholo:
“Kreste o ile a hlaha e le motho,
a pakoa ke Moea hore o lokile,
'me a bonoa ke mangeloi.
A phatlalatsoa har'a balichaba,
a lumeloa ke lefatše lohle,
'me a nkeloa tlōtleng.”
