Bafilesita ba hlōla Baiseraele
1Puo ea Samuele ea utloahala hohle naheng ea Iseraele. Baiseraele ba futuhela Bafilesita. Baiseraele ba hloma pel'a Ebenesere, Bafilesita bona ba hloma Afeke. 2Bafilesita ba etsa thekō ea ntoa, ba khahlanyetsa Baiseraele. Ntoa ea loèla, Bafilesita ba hlōla Baiseraele habohlōkō, 'me bahlabani ba likete tse 'ne ba Baiseraele ba bolaeloa hona moo. 3Ha bahlabani ba se ba khutletse liahelong, baholo ba Iseraele ba re: “Ebe ke ka baka la'ng ha Morena a entse hore re hlōloe ke Bafilesita kajeno? A re eeng Shilo, re e'o lata areka ea selekane sa Morena, e le hore Morena a tle a be har'a rōna, a re lopolle matsohong a lira tsa rōna.”
Bafilesita ba hapa areka
4Sechaba sa rōmela maqosa Shilo, a tla le areka ea selekane sa Morena oa mabōtho, ea lutseng holim'a likerubime. Bara ba babeli ba Eli, e leng Hofeni le Finease, ba tla le areka ea selekane sa Molimo. 5Eare ha areka ea selekane sa Morena e fihla liahelong, litlatse tsa Baiseraele bohle tsa hlaba holimo, ba hōoa haholo, hoo lefatše le ileng la luma.
6Ha Bafilesita ba utloa lerata la litlatse ba re: “Ebe lerata lee la litlatse tse kaale-kaale, liahelong tsa Baheberu, ke la eng?” Joale ba tseba hore areka ea Morena e fihlile liahelong. 7Bafilesita ba tšoha, ba re: “Molimo o fihlile liahelong!” Ba boela ba re: “A rōna bale! Maoba le maobane ho ne ho se ntho e tjena! 8A rōna bale! Ke mang ea tla re lopolla matsohong a melimo ee e matla? Melimo ena ke eona e neng e bolaee Baegepeta ka mefuta-futa ea lioa, lehoatateng. 9Matlafalang, lōna Bafilesita, le loane senna, le tle le se ke la ba makhoba a Baheberu, joalokaha le bona e bile makhoba a lōna. Ka baka leo, loanang senna!”
10Bafilesita ba loana, Baiseraele ba hlōloa. Mohlabani ka mong a balehele lapeng la hae. Ba ba etsa mofela, ha bolaoa Baiseraele ba litaaso ba likete tse mashome a mararo. 11Areka ea Molimo ea haptjoa; bara ba babeli ba Eli, e leng Hofeni le Finease, le bona ba bolaoa.
Lefu la Eli
12Monna oa Mobenjamine oa selahla-marungoana a baleha thekōng ea ntoa, a ba a ea fihla Shilo ka lona letsatsi leo. Liaparo tsa hae li ne li tabohile, hlooho ea hae e tšetsoe ka lerōle. 13Ha a fihla, a bona Eli a lutse holim'a setulo, kathōko ho tsela, a lebeletse, hobane o ne a tšoenyehile moeeng, ka baka la areka ea Molimo. Monna eo ha a kena motseng a beha litaba, motse oohle oa lla sa 'mokotsane.
14Ha Eli a utloa lerata la seboko seo, a re: “Morusu o lerata oo ke oa eng?”
Monna eo a potlaka, a tla ho Eli a fihla a 'molella. 15Eli o ne a e-na le lilemo tse mashome a robong a metso e robeli, mahlo a hae a foufetse, a se a sa bone. 16Monna eo a re ho Eli: “Ke 'na ea tsoang thekōng ea ntoa; ke balehile teng hona kajeno.”
Eli a re ho eena: “Ho etsahetse life, ngoan'aka?”
17Selahla-marungoana sa araba, sa re: “Baiseraele ba balehile Bafilesita. Bahlabani ba entsoe mofela; bara ba hao ba babeli, Hofeni le Finease, le bona ba shoele, 'me areka ea Molimo e hapiloe.”
18Eare ha eo a bua ka areka ea Molimo, Eli a oa setulong sa hae ka sanketse, a oela khorong ea motse, a robeha molala, a shoa, hobane e ne e le monna-moholo oa pesola. E ne e ile ea e-ba moahlōli oa Baiseraele ka lilemo tse mashome a mane.
19Ngoetsi ea Eli, e leng mohats'a Finease, e ne e le moimana, a se a le lekhatheng le ho itšihlolla. Eare ha a utloa litaba tsa hore areka ea Molimo e hapiloe, le hore matsal'ae Eli le monna oa hae le bona ba shoele, a tšoaroa ke mahlaba a pelehi hang-hang, 'me a beleha. 20Ha a le lekhatheng la ho shoa, basali ba neng ba eme pel'a hae ba re: “Se tšabe letho, hobane u belehile mora.” Empa a se ke a ba araba, leha e le ho natsa seo ba se buang.
21Mosali eo a rea ngoana eo lebitso la Ikabode, a re: “Tlōtla e tlohile ho Baiseraele,” hobane ho hapiloe areka ea Molimo, ho shoele matsal'ae le monna oa hae. 22A boela a re: “Tlōtla e tlohile ho Baiseraele, hobane ho hapiloe areka ea Molimo!”
