Davida o ja bohobe bo halalelang
1Davida a fihla Nobe, ho moprista Ahimeleke. Ahimeleke a tla a ntse a thōthōmela, a tlil'o khahlanyetsa Davida. A re ho Davida: “Ke ka baka la'ng ha u le mong, u se na le motho e mong?”
2Davida a re ho moprista Ahimeleke: “Khosi e ntaetse hore ke etse ho hong, 'me ea re ho 'na: ‘U se ke ua bolella motho seo ke u rōmileng sona, le seo ke u laetseng sona.’ Ke itse bahlanka ba ka ba e'o kopana le 'na sebakeng se seng. 3Ekaba ho jeoa'ng? Na u na le linkhoa tse hlano? Ak'u mphe tsona, kapa u mphe eng le eng eo u nang le eona.”
4Moprista a araba Davida, a re: “Ha ke na bohobe bo ka jeoang, haese bohobe ho halalelang feela. Ebe bahlanka ba hao ha baa robala le basali?”
5Davida a araba moprista, a re ho eena: “E se e le matsatsi a mararo re sa kopane le basali. Ha ke tloha hae, bahlanka ba ka ba ne ba ntse ba hloekile, le hoja re ne re inketse leeto feela; kajeno ba tla hloeka le ka ho fetisisa, hobane ba tla ja bohobe bo halalelang.”
6Eaba moprista o fa Davida bohobe bo halalelang, hobane bo jeoang bo ne bo le sieo, haese feela bohobe bo halalelang, bo neng bo tsoa tlosoa kapele ho Morena, ho beoa bo bocha ha boo bo tlosoa.
7Hona mohlang oo, ho ne ho e-na le monna e mong oa bahlanka ba Saule, ea neng a tlamehile ho itlhahisa kapel'a Morena. Lebitso la hae e ne e le Doege oa Moedomo, e le mookameli oa balisana ba Saule.
Sabole ea Goliate
8Davida a re ho Ahimeleke: “Na ha u na lerumo kapa sabole? 'Na ha kea tla le sabole ea ka, kapa lihlomo tsa ka, hobane thōmo ea khosi e ne e potlakile.”
9Moprista a re: “Sabole ea Goliate oa Mofilesita, eo u 'molaetseng ka khohlong ea Ela, e teng mona, e phuthetsoe ka lesela, katlas'a setipe. Haeba u e nka, e nke, hobane ha ho e 'ngoe ntle ho eona.”
Davida a re: “Ha ho e kang eona; 'nee eona.”
Davida o balehela Gate
10Ka lona letsatsi leo Davida a ema, a baleha ka baka la ho tšaba Saule, a ba a ea fihla ho Akishe, khosi ea Gate. 11Bahlanka ba Akishe ba re ho eena: “Na eo hase Davida, khosi ea naha ee? Na basali ha baa ka ba 'mina metjekong, ba re:
“ ‘Saule o bolaile ba hae ba likete,
Davida eena o bolaile
ba kete tsa likete?’ ”
12Davida a bōlōka mantsoe ana ka pelong ea hae, a tšaba Akishe, khosi ea Gate haholo. 13Moo batho ba 'monang, Davida o ne a ee a iketsise; ere ha ba mo tšoara a itlhantše, a ngoapake mamati a khoro ea motse, a tlohele liqhènqhè li lutlele litelung tsa hae.
14Eaba Akishe o re ho bahlanka ba hae: “Ha le ntse le bona hore motho eo oa hlanya, ke ka baka la'ng ha le ntse le mo tlisa ho 'na? 15Na ha ke na mahlanya, hoo le ka ntlisetsang motho eo hore a tl'o hlanyetsa ho 'na? Na ke motho oa ho kena ka tlung ea ka eena eo?”
