Sefela sa Anna
1Anna a rapela, 'me a re:
“Pelo ea ka
e nyakalletse Morena,
ke tsoha molōta ka baka la Morena;
molomo oa ka
o tseba ho soma lira tsa ka,
hobane ke nyakalalitsoe
ke topollo ea hao.
2“Ha ho ea halalelang
joaloka Morena,
hobane ha ho e mong
kantle ho uena,
ha ho mosireletsi
ea kang Molimo oa rōna.
3“Khaotsang lipuo
tsa boikhōhōmōso,
boikalatiso bo se tsoe
melomeng ea lōna,
hobane Morena
ke Molimo ea tsebang tsohle,
liketso tsohle li ahlōloa ke eena.
4“Liqha tsa bahale ba linatla
li robehile,
ba khothometsehileng
ba boetse ba matlafalitsoe.
5Ba neng ba khōra,
ba sebeletsa bohobe,
ba neng ba lapa baa khōra;
e, nyōpa e tsoetse bana ba supile,
ea belehileng haholo
o setse a itlhōphere.
6“Morena oa bolaea,
o bile oa phelisa;
o theolela Qalong ea bafu,
a b'a nyolle teng hape.
7Morena oa futsanehisa,
o bile oa ruisa,
oa kokobetsa,
o bile oa phahamisa.
8Mafutsana o a nyolla a le lerōleng,
bahloki o ba nyolla ba le moraheng,
o ba lulisa 'moho le mahosana,
terone ea tlōtla e be lefa la bona;
hoba tšiea tsa lefatše
ke tsa Morena,
o theile lefatše holim'a tsona.
9O tataisa maoto a bahalaleli ba hae,
athe ba khopo ba tla timella lefifing,
hobane motho
ha a hlōle ka matla a hae.
10Lira tsa Morena
li tla tamukanngoa,
ha Raliphahama
a thoathoaretsa a le leholimong;
Morena o tla ahlōla batho bohle,
a matlafatse khosi ea hae,
a tsose Motlotsuoa oa hae,
a mo tsose molota!”
11Elekana a khutlela Rama, tlung ea hae, 'me moshanyana a sala a sebeletsa Morena, kapele ho moprista Eli.
Bokhopo ba bara ba Eli
12Bara ba Eli e ne e le banna ba khopo, ba sa tsotelleng Morena, 13kapa moetlo o laolang tšebelisano ea baprista le sechaba. Ha motho ofe kapa ofe a nyehela ka sehlabelo, mohlanka oa moprista o ne a ee a tle a nkile fereko e meno a mararo, ha nama e ntse e phehiloe. 14Mohlanka eo a hlabe ka eona ka paneng, kapa ka ketleleng, kapa ka sejaneng, kapa ka pitseng. Nama eohle eo fereko e tlang e e hlabile e ne e ee e nkoe ke moprista. Ba ne ba ee ba etse joalo ho Baiseraele bohle ba neng ba e-tla moo Shilo. 15E, le pele ba chesa mafura, mohlanka oa moprista o ne a ee a tle, a re ho monna ea etsang sehlabelo: “Fana ka nama e tla besetsoa moprista, hobane ho uena a ke ke a nka nama e phehiloeng, haese e tala feela.”
16Haeba monna eo a ka re ho mohlanka: “Ak'u ba tlohele ba chese mafura pele, ebe joale uena u nka kamoo u ratang kateng,” mohlanka oa moprista o ne a ee a re: “Che, mphe eona hona joale, ho seng joalo ke tla inkela eona ka likhōka.”
17Sebe sa bahlankana bana se ne se le seholo haholo mahlong a Morena, hobane bara bao ba Eli ba ne ba hlompholla linyehelo tsa Morena.
18Empa Samuele a sebeletsa Morena, ho tloha boshanyaneng ba hae. O ne a itlama ka setipe se entsoeng ka lesela la lene. 19Ka selemo se seng le se seng 'm'ae o ne a ee a mo etsetse kojoana, a mo tlisetse eona ha a nyoloha le monna oa hae ho tla nyehela ka sehlabelo sa selemo se seng le se seng. 20Eli o ne a ee a hlohonolofatse Elekana le mosali oa hae, 'me a re: “Morena a fe mosali enoa bana ka baka la mpho eo a e etselitseng Morena.” Ebe ba ea lapeng ha bona. 21Ruri Morena a hopola Anna, a emōla, a beleha bara ba bararo le barali ba babeli. Moshanyana Samuele eena a hōlela kapele ho Morena.
22Eli o ne a se a tsofetse haholo. A utloa tsohle tseo bara ba hae ba neng ba ee ba li etse ho Baiseraele bohle, le kamoo ba neng ba ee ba robale le basali ba sebeletsang monyakong oa Tente ea Morena kateng. 23Eli a re ho bona: “Ke hobane'ng ha le etsa lintho tse tjee? Sechaba sena sohle se mpolella liketso tsa lōna tse mpe. 24Oee, bana ba ka, litaba tseo ke utloang sechaba sa Morena se li phatlalatsa hohle, ha li ntle ho hang. 25Ha motho a siteloa motho e mong, Molimo o tla mo ahlōla, empa haeba motho a ka siteloa Morena, ke mang ea tla 'muella?” Leha ho le joalo ba se ke ba mamela ntat'a bona, hobane Morena o ne a rerile ho ba bolaea.
26Moshanyana Samuele a 'na a hōla, 'me a 'na a rateha ho Morena le ho batho.
27Moporofeta oa Molimo a tla ho Eli, 'me a re ho eena: “Morena o bua tjena: ‘Na ha kea ka ka iponahatsa lapeng leno, ha bo-ntat'ao ba sa le Egepeta, e le makhoba tlung ea Faro? 28Na ha kea ka ka khetha ntat'ao har'a merabe eohle ea Iseraele hore e be moprista oa ka, a nyolohele aletareng ea ka ho ea chesa mokubetso, le ho apara setipe kapele ho 'na? Na ha kea ka ka abela lelapa leno linyehelo tsohle tsa secheso tsa bana ba Iseraele? 29Joale ke ka baka la'ng ha u hlompholla sehlabelo sa ka, le nyehelo ea ka, eo ke laetseng hore e etsoe ka leahong la ka, ebe u tlōtla bara ba hao ho mpheta, hore u inontše ka tse monate-nate tsa linyehelo tsohle tsa Baiseraele, e leng sechaba sa ka?’
30“Ka baka leo, Morena Molimo oa Iseraele, o re: ‘Ruri ke ne ke itse ntlo ea hao, le ntlo ea ntat'ao, e tsamaee kapele ho 'na kamehla eohle.’ Empa joale Morena o re: ‘Hoo ho ke ke ha hlola ho etsahala, hobane ke tla tlōtla ba ntlōtlang, empa ba 'nyelisang ke tla ba nyelisa. 31Bona, matsatsi aa tla ao ka 'ona ke tla khaola letsoho la hao, le letsoho la ntlo ea ntat'ao, hoo ho ke keng ha hlola ho e-ba le leqheku lapeng la hao. 32Ka leahong la ka u tla bona moprista e mocha, e moholo; u bone le tsohle tse molemo, tseo a tla li etsetsa Iseraele, empa ho ke ke ha hlola ho e-ba le leqheku lapeng la hao kamehla eohle. 33Feela hase banna bohle ba lelapa la hao bao ke tla ba tlosa aletareng ea ka, ho u llisa, le ho u utloisa bohlōkō, empa litlōhōlō tsohle tsa hao li tla shoa e sa le bahlankana.
34“ ‘Se tla etsahala ho bara ba hao ba babeli, e leng Hofeni le Finease, e tla ba pontšo ho uena: Bobeli ba bona ba tla shoa ka letsatsi le le leng. 35Ke tla ikhethela moprista ea tšepahalang, ea tla etsa se ka pelong ea ka le ka moeeng oa ka. Ke tla tiisa lelapa la hae, 'me le tla sebeletsa kapele ho motlotsuoa oa ka kamehla eohle. 36E mong le e mong oa lelapa la hao ea tla sala, o tla khumama kapele ho eena, a kōpe cheletana kapa sengoathoana sa bohobe, a re: “Kea u rapela: Ak'u nkhethe ke be e mong oa baprista, ke tle ke fumane thathana ea bohobe, ke je.” ’ ”
