Davida o tlotsoa hore e be khosi
1Morena a re ho Samuele: “U tla llela Saule ho le hokae, ha e le moo ke mo furaletse, hore e se be khosi ea Iseraele? Tlatsa lenaka la hao ole, 'me u tsamaee. Ke tla u rōmela ho Jese oa Betlelehema, hobane ke ikhethetse khosi har'a bara ba hae.”
2Samuele a re: “Ke tla ea joang? Haeba Saule a ka utloela taba ena o tla mpolaea!”
Morena a re: “U tle u nke sethole, u re: ‘Ke tlile ho etsetsa Morena sehlabelo.’ 3Ebe u bitsetsa Jese sehlabelong sena, 'me ke tla u tsebisa seo u tla se etsa. U tla ntlotsetsa eo ke tla u bolella eena.”
4Samuele a etsa seo Morena a mo laetseng sona, 'me a fihla Betlelehema. Baholo ba motse oo ba mo khahlanyetsa ba ntse ba thōthōmela, 'me ba re: “Na u tlile ka khotso?”
5Eaba Samuele o re: “E, ke tlile ka khotso, ho tla etsetsa Morena sehlabelo. Itlhoekiseng, le tle le 'na sehlabelong.” A hloekisa Jese le bara ba hae, a ba bitsetsa sehlabelong.
6Ha ba se ba fihlile, Samuele a bona Eliabe, 'me a re: “Ruri motlotsuoa oa Morena ke enoa kapele ho Morena.”
7Empa Morena a re ho Samuele: “U se ke ua talima sebōpeho sa hae, kapa bophahamo ba seemo sa hae, hobane ha ke mo amohele. Morena ha a talime joalokaha motho a talima. Motho o talima sebōpeho se kantle, athe Morena eena o talima pelo.”
8Eaba Jese o bitsa Abinadabe, a re a fete kapele ho Samuele, empa Samuele a re: “Le enoa Morena ha a ea mo khetha.”
9Jese a re Shamma a fete kapele ho Samuele. Samuele a boela a re: “Le enoa Morena ha a ea mo khetha.” 10Jese a re bara ba hae ba supileng ba fete kapele ho Samuele, empa Samuele a re ho Jese: “Le ho bona bana Morena ha a ea khetha.” 11Samuele a re ho Jese: “Na ha u sa na bara ba bang?”
Jese a re: “Oa ho fela o sa le teng, feela eena ke molisana oa linku.”
Samuele a re ho Jese: “Rōma motho a e'o mo lata, hobane re ke ke ra ba ra ja a e-s'o ka a fihla mona.”
12Jese a rōma motho ho mo lata, 'me a tla le eena. O ne a le mosehla ka lebala, mahlo a hae a le matle, sebōpeho sa hae sa khahleha.
Joale Morena a re: “Ema, u mo tlotse, hobane enoa ke eena.” 13Samuele a nka lenaka la ole, 'me a mo tlotsa bana babo ba ntse ba le teng. Ho tloha ka letsatsi leo, ho ea pele, Moea oa Morena oa theohela holim'a Davida ka matla. Eaba Samuele oa tsamaea, o boela Rama.
Saule o hlorisoa ke moea o litšila
14Joale Moea oa Molimo o ne o se o tlohile ho Saule, 'me moea o litšila, o rōmetsoeng ke Morena, o mo tšoenya.
15Eaba bahlanka ba Saule ba re ho eena: “Bona, moea o litšila, o tsoang ho Morena, oa u tšoenya. 16Monghali oa rōna, ak'u laele hore rōna bahlanka ba hao, ba nang le uena mona, re batle monna eo e leng seletsi sa sebele sa harepa, e le hore ha moea ona o litšila, o tsoang ho Molimo, o u fihlela, a tle a e letse, ebe ua hlaphoheloa.”
17Saule a re ho bahlanka ba hae: “Mpatleleng monna ea tsebang ho letsa hantle, le mo tlise ho 'na mona.”
18E mong oa bahlankana a araba, a re: “Ke bone mora oa Jese oa Betlelehema, ea tsebang ho letsa harepa hantle. Ke monna oa senatla, le mohlabani ea sebete, ebile ke kheleke ha a bua. Ke monna ea sebōpeho se khahlehang, 'me Morena o na le eena.”
19Saule a rōmela maqosa ho Jese, a re: “Nthōmelle Davida, mora ao hao, eo e leng molisana oa linku.” 20Jese a nka tonki e belesitsoeng bohobe, le lekuka la veine, le potsanyane, 'me a rōma mora oa hae Davida ho li isetsa Saule.
21Davida a fihla ho Saule, a ema kapele ho eena. Saule a mo rata haholo, 'me ea e-ba eena mojari oa lihlomo tsa Saule. 22Saule a rōmela molaetsa ho Jese, a re: “Kea u rapela: Ak'u lumelle Davida hore a lule le 'na, a ntšebeletse, hobane kea mo rata.”
23E ne e ee ere ha moea o litšila, o tsoang ho Molimo, a fihletse Saule, Davida a nke harepa, a e letse, ebe Saule oa hlaphoheloa, o phela hantle; moea o litšila oo ebe o tsoa ho Saule.
