1 SAMUELE 12

₁Samuele a re ho Baiseraele bohle: “Bonang, ke mametse tsohle tseo le ileng la mpolella tsona. Ke le neile khosi e tla le busa. ₂Joale khosi eo e tla le etella pele. 'Na ke se ke tsofetse, 'me moriri oa ka o se o le moputsoa. Bara ba ka ba na le lōna. Ke ile ka le etella pele ho tloha bocheng ba ka ho fihlela kajeno. ₃Ke 'na enoa: Nqōseng kapele ho Morena, le kapele ho motlotsuoa oa hae. Ke mang eo ke nkileng pholo ea hae? Kapa ke mang eo ke nkileng tonki ea hae? Kapa ke mang eo nkileng ka mo qhekanyetsa? Ke mang eo nkileng ka mo hatella? Ke mang eo nkileng ka amohela tjotjo ho eena, e le hore ke tle ke ikhakanyetse molato oa hae? Mpolelleng, 'me ke tla e khutlisetsa ho mong'a eona.”

₄Sechaba sa re: “Ha u e-s'o ka u re qhekanyetsa, kapa u re hatella, kapa u amoha motho eng kapa eng.”

₅Samuele a re ho bona: “Kajeno Morena ke paki, le motlotsuoa oa hae ke paki ea hore ha lea fumana ke nkile letho.”

Sechaba sa re: “Morena ke paki!”

₆Eaba Samuele o re ho sechaba: “Morena ea ileng a khetha Moshe le Arone, bona ba ileng ba nyolla bo-ntat'a lōna naheng ea Egepeta, le eena ke paki. ₇Ka baka leo, emang, e le hore ke le qose kapele ho Morena, ho latela liketso tsohle tse lokileng tsa Morena, tseo a li etselitseng lōna le bo-ntat'a lōna.

₈“Ha Jakobo a se a fihlile Egepeta, bo-ntat'a lōna ba ile ba ipiletsa ho Morena, eaba Morena o rōmela bo-Moshe le Arone, 'me bao ba ntša bo-ntat'a lōna naheng ea Egepeta, ba ba ahisa sebakeng sena.

₉“Empa ba ile ba lebala Morena Molimo oa bona. Morena a neelana ka bona matsohong a Sisera, e leng molaoli oa mabōtho a Hasore. A neelana ka bona le matsohong a Bafilesita, le matsohong a khosi ea Moabe, 'me bao ba ba loantša. ₁₀Ba ipiletsa ho Morena, ba re: ‘Re sitiloe, hobane re furaletse Morena. Re sebelelitse bo-Baale, le bo-Asetarote. Empa joale ak'u re namolele matsohong a lira tsa rōna, 'me re tla u sebeletsa.’ ₁₁Morena a rōma bo-Jerubaale, le Bedane, le Jafeta, le Samuele, 'me a le namolela matsohong a lira tsa lōna kahohle, eaba le phela ka khotso.

₁₂“Eitse ha le bona hore Nahashe, khosi ea Baamone, oa le futuhela, la re ho 'na: ‘Che, re batla khosi e tla re busa,’ empa Morena Molimo oa lōna, e ne e le eena khosi ea lōna. ₁₃Joale, ka baka leo, bonang khosi eo le ikhethetseng eona, eo le ikōpetseng eona; Morena o le neile eona. ₁₄Haeba le ka tšaba Morena, la mo sebeletsa, la mamela lentsoe la hae, la se ke la fetohela melao ea hae, 'me lōna le khosi e le busang la latela Morena Molimo oa lōna, le tla atleha. ₁₅Empa haeba le sa mamele lentsoe la Morena, le fetohela melao ea Morena, o tla le loantša, joalokaha a loantšitse bo-ntat'a lōna.

₁₆“Ka baka leo, emang, le bone ntho ena e kholo, eo Morena a tla e etsa moo le ntseng le bona. ₁₇Na kajeno hase letsatsi la ho hèla koro? Ke tla ipiletsa ho Morena, 'me o tla rōmela lialuma le pula. Le tla tseba, le be le bone, hore bokhopo ba lōna, boo le bo entseng kapele ho Morena, ka ho ikōpela khosi, bo boholo.”

₁₈Joale Samuele a ipiletsa ho Morena, 'me ka lona letsatsi leo Morena a rōmela lialuma le pula. Sechaba sohle sa tšaba Morena le Samuele haholo.

₁₉Eaba sechaba sohle se re ho Samuele: “Rapella bahlanka ba hao ho Morena Molimo oa hao, hore re se ke ra shoa, hobane ka ho ikōpela khosi, re ekelitse bobe bo bong holim'a libe tsohle tsa rōna.”

₂₀Samuele a re ho sechaba: “Le se ke la tšaba. Ruri, lōna bohle, le entse bobe bona bohle. Empa le se ke la furalla Morena; le sebeletse Morena ka lipelo tsa lōna tsohle. ₂₁Le se ke la kheloha, la latela lintho tsa mafeela, tse ke keng tsa le thusa ka letho, kapa tsa le namolela, hobane ke mafeela. ₂₂Morena a ke ke a furalla sechaba sa hae, ka lebaka la lebitso la hae le leholo, hobane Morena o ratile ho le etsa sechaba sa hae. ₂₃Ha e le 'na ho ke ke ha etsahala hore ke siteloe Morena ka ho phetsa ho le rapella. Ke tla le ruta se molemo le se lokileng. ₂₄Le tšabe Morena feela, le mo sebeletse ka 'nete le ka lipelo tsa lōna tsohle. Elelloang lintho tse kholo, tseo a le etselitseng tsona. ₂₅Empa haeba le tla 'ne le etse bokhopo, lōna, le khosi ea lōna, le tla timela.”