Moprista e moholo Alekimose le letšolo la Nikanore
1Selemong sa lekholo le mashome a mahlano a motso o mong, Demeteriose, mora oa Seleukose, a tloha Roma ka sekepe le banna ba seng bakae, a fihla motseng o lebopong la leoatle 'me a iketsa khosi hona teng. 2Ha a qala ho kena tlung ea borena ea bo-ntat'ae, mabotho a tšoara Antiokose le Lisiase ho ba tlisa ka pele ho khosi. 3Empa eare ha khosi e utloa taba ena, ea re: “Ba tloseng, ha ke rate le ho ba bona.” 4Ka baka leo bahlabani ba ba bolaea, 'me Demeteriose a lula teroneng ea hae.
5Joale batho bohle ba khopo le bakoenehi ba Iseraele ba tla ka pele ho khosi, ba eteletsoe pele ke Alekimose, ea neng a rata ho ba moprista e moholo. 6Ba qosa sechaba ho khosi, ba re: “Judase le bana babo ba timelitse metsoalle eohle ea hao, 'me ba re qhalanyelitse ka ntle ho naha ea habo rona. 7Joale ak'u romele motho eo u mo tšepang, hore a e'o bona litšenyo tseo Judase a re etselitseng tsona le naha ea khosi; batho bao ba tle ba fumane kotlo 'moho le bohle ba ba thusang.”
8Ka baka leo Demeteriose a khetha Bakidese, e mong oa metsoalle ea khosi, ea neng a busa mose oane ho noka ea Euferatese. E ne e le e mong oa ba baholo sechabeng, a tšepahala le ho khosi. 9A mo romela 'moho le Alekimose ea malimabe, eo a ileng a ba a mo etsa moprista e moholo 'me a mo laela ho iphetetsa ho bana ba Iseraele. 10Ba tsamaea, ba kena ka mphi e kholo naheng ea Judea, Bakidese a romela maqosa ho Judase le bana babo ka molaetsa oa bolotsana oa khotso. 11Empa bao ba se ke ba natsa mantsoe ao ka letho, hobane ba ne ba bona hore o tlile ka mphi e kholo.
12Joale mokhatlo oa Litsebi tsa Molao oa kopana le Alekimose le Bakidese ho batla le bona tsela ea ho sebelisana ka toka. 13Har'a bana ba Iseraele ke Ba-Asidea ba pele ba ileng ba kopa khotso ho bona; 14hobane ba ne ba re: “Moprista oa leloko la Arone o tlile le mabotho, 'me eena a ke ke a re etsa hampe.” 15Alekimose a bua le bona mantsoe a khotso, a ba a ba hlapanyetsa, a re: “Ha re na ho leka le ho le ntša kotsi, lona esita le metsoalle ea lona.” 16Ba mo tšepa; empa a laela hore ho tšoaroe ba mashome a tšeletseng ba bona, 'me a ba bolaea ka letsatsi le le leng; ho latela Mangolo a reng:
17“Ba qhalile litopo
tsa bahalaleli ba hao,
ba tšolotse mali a bona
ho pota Jerusalema eohle,
'me ha ho motho ea ba patang.”
18Joale tšabo le thothomelo ea e-ba teng sechabeng sohle, hobane se ne se re: “Hase batho ba nang le 'nete le toka, hobane ba sentse litumellano, 'me ba robile kano eo ba e entseng.” 19Eaba Bakidese o tloha Jerusalema, a ea lara Bete-Saite. A romela batho ho tšoara Bajuda ba bangata ba neng ba mo setse morao, 'moho le ba bang hape ba sechaba; a re ba bolaoe, ba be ba lahleloe ka lelumeleng le leholo. 20A bea naha tlas'a Alekimose, 'me a mo siela mphi ho mo thusa. Eaba Bakidese o khutlela ho khosi.
21Alekimose a itsekella ho ba moprista e moholo. 22Bohle ba neng ba ferekanya sechaba ba ikopanya le eena; ba laola naha ea Juda, 'me ba hlekefetsa Baiseraele haholo. 23Joale Judase a bona bokhopo bo entsoeng har'a bana ba Iseraele ke Alekimose le ba khemang le eena, bo bileng bo fetang le bo entsoeng ke balichaba. 24A pota le libaka tsohle tsa Judea, a ntse a iphetetsa holim'a banna ba neng ba setse Alekimose morao; a ba hanela ho tsoela naheng. 25Ha Alekimose a bona hore Judase le ba mo tlatsitseng ba ntse ba ipha matla, a bile a hlokomela hore o se a ke ke a ba thiba, a khutlela ho khosi 'me a ba qosa ka liqoso tse se nang 'nete.
26Joale khosi ea romela Nikanore, e le e mong oa balaoli ba tummeng ba hae, e bileng e le sera sa Baiseraele se ba hloileng haholo, 'me ea mo laela ho ea ripitla sechaba seo. 27Nikanore a ea Jerusalema ka mphi e kholo, 'me a romela molaetsa oa bolotsana oa khotso ho Judase le bana babo, a re: 28“Ho se be ntoa pakeng tsa ka le lona. Ke tla tla ke felehelitsoe ke banna ba seng bakae, ho ipuela le lona ka khotso.” 29A fela a tla ho Judase, ba lumelisana ka khotso. Athe sera se ne se rerile ho mo tšoara. 30Judase a tseba hore o ne a tlile ho eena ka mano; a qala ho mo tšaba, a ba a itherela ho se hlole a kopana le eena hape. 31Ha Nikanore a elelloa hore leqheka la hae le sibolotsoe, a hla a futuhela Judase ka ntoa, haufi le motse oa Kafarasalama. 32Bahlabani ba ka bang makholo a mahlano ba lehlakore la Nikanore ba bolaoa, 'me ba setseng ba balehela motseng oa Davida.
33Ka morao ho moo, Nikanore a nyolohela thabeng ea Sione. Ba bang ba baprista le baholo ba sechaba ba tsoa ka Tempeleng ho tla mo lumelisa ka khotso le ho mo bontša mahlabelo a licheso a etselitsoeng khosi. 34Empa eena a ba soma, a ba tšeha, a ba tlontlolla, a ba buela ka boikhohomoso. 35Ka khalefo e kholo a ba hlapanyetsa, a re: “Ntle ho hore Judase le mabotho a hae ba neeloe matsohong a ka hona joale, ha nka ka khutla ke ntse ke phela, ke tla tla chesa Ntlo ena.” A ba a tsoa a halefile haholo.
36Joale baprista ba khutlela ka Tempeleng, ba ema ka pele ho aletare le Sehalalelo, ba lla, ba re: 37“Uena ea khethileng ntlo ena hore e khetheloe Lebitso la hao, le hore e be ntlo ea thapelo le ea likopo ho sechaba sa hao, 38ak'u iphetetse holim'a motho enoa le holim'a mabotho a hae, e le hore ba bolaoe ka sabole. Ak'u hopole linyefolo tsa bona, u se ke ua liehisa kotlo ea bona.”
39Nikanore a tloha Jerusalema, a ea lara haufi le Bete-Horone, moo a ileng a khahlametsoa ke mabotho a Siria. 40Judase eena a lara Adasa le bahlabani ba kete li tharo. Joale Judase a rapela, a re: 41“Ha maqosa a khosi ea Baasiria a bua linyefelo, lengeloi la hao le ile la bolaea ba likete li lekholo le mashome a robeli e metso e mehlano ba bona. 42Ak'u fenye joalo mphi ena e ka pele ho rona kajeno. Ak'u etse hore batho bohle ba bone hore Nikanore o rohakile Tempele ea hao: mo ahlole ho lekana bokhopo ba hae.”
43Limphi tsa futuhelana letsatsing la leshome le metso e meraro la khoeli ea Adare. Mabotho a Nikanore a fenngoa, 'me ea e-ba eena oa pele ea bolaoang ntoeng eo. 44Ha ba mabotho a Nikanore ba bona hore o shoele, ba lahla lihlomo tsa bona, ba baleha. 45Bajuda ba ba phalalisa letsatsi lohle, ho tloha Adasa ho ea fihla Gesere; 'me ba ba lelekisa joalo ba ntse ba letsa literompeta tsa mokhosi. 46Batho ba tsoa metseng eohle ea Judea e ka mathoko, ba kopela babalehi hare, ba ba khutlisetsa ho balelekisi; 'me bohle ba bolaoa ka sabole, hoo ho seng le ea mong oa bona ea ileng a sala.
47Eaba Bajuda ba nka thepa ea bona le khapo ea bona, ba khaola Nikanore hlooho le letsoho le letona, leo a neng a le tsoka ka boikhohomoso. Ba isa letsoho lena le hlooho Jerusalema, 'me ba li fanyeha pontšeng haufi le motse. 48Sechaba sa nyakalla haholo 'me sa ketekela letsatsi leo e le letsatsi le leholo la thabo. 49Ha beoa taelo ea hore letsatsi lena le ketekeloe selemo le selemo, ka la leshome le metso e meraro la khoeli ea Adare. 50Naha ea Juda ea qala ho ba le khotso matsatsi a se makae.
