Simone o etella pele chaba sa Bajuda
1Simone a utloela hore Terifone o ne a bokella mphi e kholo, ho hlasela le ho ripitla naha ea Juda. 2A ba a bona hore batho ba thothomela ke tšabo; ka baka leo a nyolohela Jerusalema, a phutha sechaba kaofela, 3a se khothatsa, a re ho sona: “Lona lea tseba hore na ke lintho tse kholo bo bokae tseo 'na le bana beso le lelapa leso re li entseng ho sireletsa Molao oa Moshe 'moho le Sehalalelo. Le tseba hape lintoa le mathata ao re fetileng har'a 'ona. 4Ke ka mabaka ana bana beso bohle ba timetseng, ba ntse ba sireletsa Iseraele 'me ho bile ho setse 'na ke le mong. 5Ka baka leo, hona joale ha ke ikutloe nka qenehela bophelo ba ka, ka tsela efe kapa efe ha re tobane le litsietsi. Ha ke fete bana beso ka letho. 6Empa ke tla ema ke pheteletse sechaba sa heso le Sehalalelo le basali ba lona le bana ba lona; hobane lichaba tsohle, ka baka la lehloeo, li re kopanetse ho re ripitla.”
7Batho ba tsoha molota ha ba utloa mantsoe ana. 8Ba hooa ka lentsoe le phefa, ba re “U moeta-pele oa rona! U hlahlame bana beno Judase le Jonathane! 9Loana lintoa tsa rona, 'me tsohle tseo u tlang ho re laela ho li etsa, re tla li etsa.” 10Ka baka leo Simone a bokella bahlabani bohle; a ba a potlaka ho phetha mosebetsi oa marako a motse oa Jerusalema, le ho o sireletsa ka mahlakore 'ohle. 11Eaba o romela Jonathane, mora oa Abosalome, motseng oa Jopo, a e-na le lebotho le leholoanyane. Eo a leleka baahi ba motse oo, 'me a lula hona teng.
12Joale Terifone a tloha Potolemaise ka mphi e kholo ho ea kena naheng ea Juda, 'me Jonathane o ne a le teng har'a bona, a lebetsoe ka thata. 13Simone a tla lara Adida, malokana le thota. 14Terifone a utloela hore Simone o hlomamisitsoe bakeng sa ngoan'abo Jonathane, le hore o se a le tseleng ho mo hlasela ka ntoa. Ka baka leo a romela ho eena maqosa a re: 15“Ngoan'eno Jonathane re mo tšoaretse melato eo a e entseng, ha a ntse a le setulong sa boetapele, ea ho se lefe lekhetho leo polokelo ea 'muso e le hlokang. 16Re romelle hona joale litalenta tse lekholo tsa silefera, 'moho le bara ba ngoan'eno ba babeli, ba be litlamong ho rona, e le bopaki ba hore, ha re mo lokolla, ha a na ho re fetohela. Ha le ka etsa joalo, re tla mo lokolla.”
17Le hoja Simone a ne a utloisisa hore ke mantsoe a bolotsana, leha ho le joalo, a romela chelete le bara ba batloang, esere a tsosa bora sechabeng, se ka tlohang sa re: 18“Jonathane o bolailoe, kahobane Simone a ile a hana ho romela chelete le bana.” 19Ka baka leo a romela bana 'moho le litalenta tse lekholo; empa Terifone a roba litšepiso tsa hae, a se ke a lokolla Jonathane.
20Ka morao ho moo, Terifone a tla, a kena naheng ea Juda ka morero oa ho e ripitla, 'me a potoloha ka tsela e lebang Adora. Simone le mabotho a hae ba 'na ba leka ho mo loantša sebakeng se seng le se seng seo a neng a feta ho sona. 21Ba neng ba qabelletsoe Qhobosheaneng ea Jerusalema ba pheella nako le nako ho romella melaetsa ho Terifone hore a ba phallele ka lijo ka tsela e tlolang le lehoatateng. 22Joale Terifone a hlopha lebotho lohle la hae la bapalami ho ea teng; empa bosiung boo lehloa la khetheha haholo, 'me ba hloloa ho ea Jerusalema ka lebaka leo. A mpa a tsamaea, a ea naheng ea Gileade. 23Ha ba atamela Basekama, a bolaea Jonathane, ea ileng a patoa hona moo. 24Eaba Terifone oa khutla, 'me o boela ha habo.
25Simone a romela batho ho ea lata masalla a setopo sa Jonathane, ngoan'abo; a se pata Modine, motseng oa bo-ntat'ae. 26Sechaba sohle sa Iseraele sa mo llela haholo, 'me sa e-ba bofifing ka matsatsi a mangata. 27Joale Simone a haha sefika holim'a mabitla a ntat'ae le bana babo. A etsa hore se phahame hoo se neng se bonahala motho a le hole; a se haha kapele le kamorao ka lejoe le kutlutsoeng. 28A haha le lipiramiti tse supileng tse shebaneng bakeng sa ntat'ae le 'm'ae le bana babo ba bane. 29A li etsetsa khabiso ea litšiea tse telele tse li pota-potileng. Hore e tle e be khopotso e sa feleng, a laela hore, holim'a litšiea tseo, ho betloe litšoantšo tsa lihlomo le tsa liketsoana, tse neng li ka bonoa ke bohle ba fetang ka sekepe leoatleng. 30Ke lona lebitla la sefika leo Simone a ileng a le haha Modine, 'me le ntse le le teng esita le kajeno.
31Ha e le Terifone, eena a hla a etsetsa khosi e leng mohlankana Antiokose bonokoane; a 'molaea. 32A nka sebaka sa hae, a ithoesa mofapahlooho oa borena ba Asia, 'me a tlisetsa naha eohle bomalimabe bo tšabehang.
33Empa Simone eena a 'na a haha bocha liqhobosheane tsa Judea, a li lika-liketsa ka tora tse telele ho pota, le ka marako a maholo, a nang le likhoro le mekoallo ea tsona; 'me a 'na a bokella lijo ka teng. 34Simone a boela a romela maqosa ho khosi Demeteriose, hore a mpe a lokolle naha, e se ke ea ntša makhetho, ho ea kamoo Terifone a e tlatlapileng kateng. 35Khosi Demeteriose a arabela kopo ea hae, a mo romella lengolo le reng:
36“Khosi Demeteriose o lumelisa Simone, moprista e moholo le motsoalle oa likhosi, le baholo le sechaba sa Bajuda. 37Re amohetse mofapahlooho oa khauta le lekala la palema leo le re romeletseng lona; 'me re ikemiselitse ho etsa khotso ea 'nete le lona, le ho ngolla basebeletsi ba 'muso oa rona hore ba le fe tšoea tabeng ea makhetho. 38Litumellano tsohle tse molemong oa lona, tseo re li entseng, li tla fela li phethahale li le joalo; 'me le liqhobosheane tseo le li hahileng li tla sala li ntse li le matleng a lona. 39Rea le tšoarela bakeng sa liphoso le litšito tseo le li entseng ho fihlela nakong ea joale; 'me re se re bile re hlakola molato oa lona oa lekhetho la mofapahlooho. Haeba ho sa na le lekhetho le leng leo re neng re le ntšetsoa Jerusalema, ha le sa tla ntšuoa. 40Haeba ho teng har'a lona ba bang ba ka lokelang ho ngolisoa e le bahlanka ba tšireletso ea rona, ba tla ngolisoa. Khotso e ke e be teng pakeng tsa rona.”
41Ka selemo sa lekholo le mashome a supileng, sechaba sa Iseraele sa imolloa mojarong oa balichaba. 42Batho ba qala ho ngola litumellanong le likonterakeng: “Selemong sa pele sa Simone, moprista e moholo, molaoli le moetapele oa sechaba sa Bajuda.”
43Matsatsing ao, Simone a lara ka pele ho Gasara, a lika-liketsa motse oo ka mabotho a hae. A etsa koloi e thulang marako; a e atametsa motseng, a thuthuka e 'ngoe ea litora tsa oona, a e hapa. 44Bahlabani ba neng ba palame koloi eo ba hla ba jethemela ka har'a motse, 'me ha qaleha morusu o tšabehang ka ho oona. 45Banna ba motse le basali le bana ba bona ba hahola liaparo, ba hloella holim'a marako, ba hoeletsa ka mantsoe a phefa, ba kopa Simone hore a ba etsetse khotso. 46Ba re: “Ak'u mpe u se ke ua re ahlola ho ea ka bokhopo ba rona, u mpe u re ahlole ho ea ka mohau oa hao.”
47Simone a fihlela litumellano le bona, a khaotsa ho ba loantša. Empa a ba tebela motseng, a hloekisa matlo ao melimo ea bohata e neng e beiloe ka ho 'ona; 'me joale a kena motseng ka lifela le lithoko. 48A hleka motseng lintho tsohle tse litšila; a ba a siea teng batho ba mamelang Molao oa Moshe. A matlafatsa marako a tšireletso, a ba a ikhahela teng ntlo ea borena.
49Batho ba ka Qhobosheaneng ea Jerusalema ba ne ba haneloa ho tsoa le ho ea rekisa kapa ho reka eng kapa eng naheng. Ka baka leo ba kenelloa ke tlala 'me ba bang ba shoa ke eona. 50Joale ba qala ho ipiletsa ho Simone hore a mpe a ba etsetse khotso. Eena a lumela, a mpa a ba leleka moo, a sala a hloekisa Qhobosheane ka ho tlosa ho eona melimo ea bohata. 51Ka letsatsi la mashome a mabeli a metso e meraro la khoeli ea bobeli, selemong sa lekholo le mashome a supileng a motso o mong, Bajuda ba kena Qhobosheaneng har'a litlatse ba tšoere makala a lipalema, ba letsa liharepa le meropa le likatara, ba bina lithoko le lifela; hobane sera se seholo se ne se ripitliloe, sa ba sa lelekoa naheng ea Iseraele. 52Simone a laela hore, selemo le selemo, letsatsi lena le ketekeloe e le la thabo. A sireletsa ka thata thaba ea Tempele, e sikileng le Qhobosheane, 'me Simone le batho ba hae ba aha moo. 53Simone a hlokomela hore mora oa hae, Jonathane, o se a kene bonneng; ka baka leo a mo etsa molaoli oa mabotho a hae 'ohle, a ba a mo ntšetsa motse Gasara.
