Alekesandere Epifanese o etsa Jonathane moprista e moholo
1Ka selemo sa lekholo le mashome a tšeletseng, Alekesandere Epifanese, mora oa Antiokose, a fihla Potolemaise ka sekepe 'me a hapa motse oo. A amoheloa ka thabo, 'me teng a qala ho busa. 2Ha khosi Demeteriose a utloa tsena a bokella mphi e kholohali, a mo futuhela. 3Demeteriose a romela molaetsa oa khotso ho Jonathane ka mangolo, 'me a mo phaphatha ka 'ona, 4hobane a ne a re: “A re etseng khotso le batho bao, pele ba ka etsa selekane le Alekesandere ho re loantša; 5hobane Jonathane o tla hopola bokhopo bohle boo re mo etselitseng bona, eena le bana babo, esita le sechaba sa habo.” 6Ka baka leo Demeteriose a mo fa tumello ea ho thea mphi, ho e hlomella ka libetsa le ho etsa selekane le eena. A laela hore batšoaruoa ba ka Qhobosheaneng ea Jerusalema ba lokolleloe Jonathane. 7Joale Jonathane a ea Jerusalema, a bala lengolo leo moo a utluoang ke bohle, esita le ke batho ba Qhobosheane. 8Bao ba tšoha haholo ha ba utloa hore khosi e mo file tumello ea ho thea mphi. 9Batho ba Qhobosheane ba lokollela Jonathane batšoaruoa; eena a ba fetisetsa ho batsoali ba bona.
10Jonathane a aha Jerusalema, a ba a qalella ho tsosa motse le ho o nchafatsa. 11A laela baokameli ba mesebetsi ho haha marako a motse bocha le ho sireletsa thaba ea Sione ka lerako ho pota-pota, ba ntse ba sebelisa majoe a betliloeng. Ba etsa joalo. 12Balichaba ba neng ba lula liqhobosheaneng tse neng li hahiloe ke Bakidese ba baleha; 13e mong le e mong a tloha moo a neng a lula teng, a boela ha habo. 14Ke Bete-Sure feela moo methoaelana e furaletseng Molao oa Moshe le litaelo tsa oona e ileng ea sala; hobane ke hona teng feela moo ba neng ba ka fumana ho sireletseha.
15Khosi Alekesandere a utloela litšepiso tsohle tseo Demeteriose a li etselitseng Jonathane. Batho ba ba ba 'molella lintoa tseo Jonathane le bana babo ba li loanneng, liketso tsa bonatla tseo ba li entseng, esita la mathata ao ba ileng ba a mamella. 16Alekesandere a re: “Ebe motho ea joalo re sa tla mo fumana kae? A re mo etseng motsoalle le molekane oa rona.” 17A mo ngolla lengolo, a le romela ho eena le e-na le molaetsa ona:
18“Khosi Alekesandere o lumelisa ngoana oabo Jonathane. 19Re utloile litaba tsa hao tsa hore u mohlabani ea shahlileng, ea ka lokelang ho ba motsoalle oa rona. 20Ka baka leo rea u thonya kajeno hore u be moprista e moholo oa sechaba sa heno, 'me u bitsoe motsoalle oa khosi. U tla ba maikutlo a le mang le a rona, u boloke setsoalle le rona.”
A ba a mo romella seaparo se perese sa borena le mofapahlooho oa khauta.
21Jonathane a apara liaparo tse halalelang ka khoeli ea bosupa ea selemo sa lekholo le mashome a tšeletseng, ka mokete oa Maphephe. A bokella mabotho, a a hlahlella boieane ba lihlomo.
Jonathane o lehlakoreng la Alekesandere Epifanese
22Ha Demeteriose a utloa litaba tsena, a hlabeha haholo, a ba a re: 23“Ao! Re ile ra etsa joang, hore ebe Alekesandere o se a re siisitse ka ho fumana setsoalle le thuso ho Bajuda? 24Le 'na ke tla ba ngolla mantsoe a khothaletso, ke be ke ba tšepise tlotla le limpho, hore ba tle ba fetohe bathusi ba ka.” 25Ka baka leo a ba ngolla molaetsa ona:
“Khosi Demeteriose o lumelisa sechaba sa Bajuda. 26Le hlomphile litumellano tsa lona le rona, 'me le ntse le tsoela pele setsoalleng, le bile le sa nka lehlakore la lira tsa rona. Ke sena seo re se utloileng, 'me se re thabisitse. 27Re re joale le tsoela pele ho tšepahala ho rona, 'me re tla le buseletsa ka tse molemo bakeng sa seo le re etsetsang sona. 28Re tla le lokolla litšoanelong tse ngata, re be re le ekeletse ka limpho. 29Ho tloha joale kea le imolla, 'me ke lokolla Bajuda bohle likhafeng, le lekhethong la letsoai le la mefapahlooho. 30Hape le sebakeng sa ho ntša karolo ea boraro ea lijothollo, le ea bobeli ea kotulo ea litholoana, tse lebisoang ho 'na, kea le lokolla ho tloha kajeno ho fihlela; ha ke na ho ntšetsoa tsena naheng ea Juda, esita le literekeng tse tharo tse kopantsoeng le eona, tseo e neng e le tsa Samaria le Galelea, ho tloha tsatsing la kajeno ho isa neng.
31“Jerusalema eona e tla ba sebaka se halalelang, se nang le bolokolohi, 'moho le mathoko a eona: linyehelo tsa karolo e le 'ngoe ho tse leshome le linyehelo tse ling e tla ba tsa eona. 32Ke boetse ke khaotsa boikarabelo ba ka Qhobosheaneng e Jerusalema; ke bo nea moprista e moholo, hore a ikhethele balebeli ba eona ba tla lula ka ho eona. 33Mojuda e mong le e mong, ea neng a isitsoe e le motšoaruoa kae kapa kae 'musong oa ka, a e-tsoa naheng ea Juda, ke mo lokolla ntle ho ho lefelloa letho. Hape, bohle ba lokolloa makhethong a likhomo. 34Matsatsi 'ohle a mekete, a Sabatha, a ho thoasa ha khoeli, matsatsi 'ohle a khethehileng, le a mararo a tlang pele le ka mora' mekete, e ke e be matsatsi a bolokolohi le a teselo ho Bajuda bohle ba ahileng 'musong oa ka. 35Ha ho motho ea tla ba le matla a ho ba lefisa, esita le ho ba tšoenya tabeng efe kapa efe.
36“Ho tla ngolisoa mphing ea khosi Bajuda ba ka bang likete li mashome a mararo, 'me ba tla amohela moputso o ntseng o tšoana le oa mabotho 'ohle a khosi. 37Ba bang ba bona ba tla lula liqhobosheaneng tse kholo tsa khosi. Ba bang ba tla fuoa boikarabelo litabeng tsa mantlha tsa 'muso. Ba tla ikhethela batho ba habo bona ho ba baokameli le batsamaisi ba bona, 'me ba phele ho latela melao ea bona, joalokaha khosi e laetse hore ho etsoe joalo naheng ea Juda.
38“Ha e le malebana le litereke tse tharo tse kopantsoeng le Judea, tseo e neng e le tsa naha ea Samaria, li hle li kopane le Judea 'me li be tlas'a puso e le 'ngoe; li se mamele motsamaisi e mong haese moprista e moholo. 39Motse oa Potolemaise le tikoloho ea oona, ke fana ka oona e le mpho ho Tempele ea Jerusalema, e le ho lefella litšenyehelo tse ka hlahelang Tempele.
40“Ke boetse ke tšepisa hore, ka selemo le selemo, ke tla fana ka mpho ea chelete ea likoatipana tse likete li leshome le metso e mehlano tsa silefera tsa polokelo ea khosi, tse tsoang libakeng ka ho fapana. 41Lipokello tsa lichelete tse hlahisitsoeng ke hobane 'muso, ho fapana le seo o neng o se etse lilemong tse fetileng, o sa ka oa lefa letho bakeng sa Tempele, basebeletsi ba 'muso ba tla li lefa ho tloha hona joale bakeng sa mesebetsi ea Ntlo ea Molimo. 42Ho feta moo, chelete ea likoatipana tse likete tse hlano tsa silefera, eo e neng e le lekhetho bakeng sa leruo la Tempele la selemo le selemo, ha e sa tla ntšuoa hobane e lokela ho ea ho baprista ba etsang litšebeletso. 43Mang kapa mang ea ka tšabelang ka Tempeleng e Jerusalema kapa libakeng tse ka meeling ea eona, e le ka lebaka la hobane a e-na le molato oa lekhetho la khosi kapa ka mabaka a mang, a ke a lokolloe, 'me a fuoe leruo lohle leo e leng la hae 'musong oa ka. 44Litšenyehelo tse tla hlahisoa ke ho tsosa bocha Tempele kapa ho e ntlafatsa li tla lefuoa ka lichelete tsa khosi. 45Le litšenyehelo tsa ho tsosa bocha marako a Jerusalema, le ho e sireletsa ho pota, li tla lefuoa ka lichelete tsa khosi; 'me le litšenyehelo tsa ho haha marako a metse ea Judea li tla ntšuoa mokotleng oa eona joalo.”
46Ha Jonathane le sechaba ba utloa mantsoe ana, ba se ke ba kholoa kapa ho a amohela, kaha ba hopola bokhopo bohle boo Demeteriose a kileng a bo etsa Iseraele, le kamoo a neng a ba hlorisitse habohloko kateng. 47Ba ikhethela ho tšepa Alekesandere, hobane e bile oa pele ho ba le bona ka mantsoe a khotso, 'me ba e-ba bathusani le eena kamehla.
48Joale khosi Alekesandere a bokella mphi e kholo, 'me a lara malebana le Demeteriose. 49Khosi tsena tse peli tsa futuhelana ka ntoa, eaba mabotho a Demeteriose aa baleha; Alekesandere a a phalalisa, a a hlola. 50Alekesandere a loana ka matla ho fihlela letsatsi le likela; ha e le Demeteriose, a bolaoa hona tsatsing leo.
51Joale Alekesandere a romela maqosa ho Potolemea, khosi ea Egepeta, ka molaetsa ona:
52“Ke se ke khutletse 'musong oa ka, 'me ke lutse teroneng ea bo-ntate. Ke nkile puso, ke ripitlile Demeteriose 'me ke hapile naha ea rona. 53Re futuhelane le Demeteriose, 'me re mo ripitlile, eena le mabotho a hae; 'me joale ke lutse teroneng ea hae ea borena. 54Ka baka lena, a re ke re hlome setsoalle. U 'nee morali oa hao e be mosali oa ka, 'na ke be mokhoenyana oa hao; 'me ke tla nyehela ho uena le ho eena ka limpho tse u tšoanelang.”
55Khosi Potolemea a mo araba, a re: “A letsatsi la nyakallo leo ka lona u khutletseng naheng ea bo-ntat'ao, 'me ua ba ua lula teroneng ea bona ea borena! 56Joale ke tla phetha joalokaha u kopile lengolong la hao; empa etsa hore re teane motseng oa Potolemaise, e le hore re tle re tsebane, 'me ke tla u etsa mokhoenyana oa ka ho latela kopo ea hao.”
57Ka hona Potolemea a tloha Egepeta le morali oa hae, Keleopatera, a tla fihla Potolemaise selemong sa lekholo le mashome a tšeletseng a metso e 'meli. 58Khosi Alekesandere a ea teana le eena; 'me Potolomea a mo nyalisa morali oa hae, Keleopatera. Ha etsoa mokete oa semetletsa oa lechato motseng oa Potolemaise, kamoo likhosi li etsang kateng.
59Eaba khosi Alekesandere o ngolla Jonathane ho mo memela ho tla teana le eena Potolemaise. 60Jonathane a tla, a khabile serena; a teana le likhosi tseo tse peli, a li fa 'moho le metsoalle ea tsona silefera le khauta, le limpho tse ling tse ngata. Likhosi tsa khahloa ke eena. 61Banna ba bang ba maseaqheme, ba neng ba e-tsoa Iseraele, banna ba khopo, ba kopana ho senyeletsa Jonathane; ba mo qosa ho khosi, empa ea se ke ea ba natsa. 62Khosi Alekesandere o bile a fana ka taelo ea hore Jonathane a hlobolisoe liaparo tsa hae, a apesoe tse perese tsa borena; ha etsuoa joalo. 63A lulisa Jonathane pel'a hae, 'me a re ho baokameli: “Mo nkeng, le ee le eena mapatlelong a motse, le bolelle sechaba sohle hore ho se be motho ea tla qosa Jonathane ka taba efe kapa efe, 'me ho se be motho ea tla mo tšoenya ka tsela efe kapa efe.” 64Eare ha baqosi ba hae ba bona tlotla eo a e etsetsoang ho latela khoeletso e entsoeng, le ho 'mona a apesoa mahali-hali a perese, ba baleha kaofela. 65Eaba khosi e mo tlotlisa ka ho mo kenya lenaneng la metsoalle ea eona e meholo, 'me e mo etsa molaoli le 'musi oa naha ea habo. 66Joale Jonathane a khutlela Jerusalema ka khotso le nyakallo.
Jonathane o hlola Apoloniose
67Selemong sa lekholo le mashome a tšeletseng a metso e mehlano, Demeteriose, mora oa khosi Demeteriose, a tloha sehleke-hlekeng sa Kerete, a tla naheng ea bo-ntat'ae. 68Ha khosi Alekesandere a utloa tsena, a tetebela moeeng, a ipoella Antiokia. 69Demeteriose a khetha Apoloniose, 'musi oa Siria e Kholo, ho ba molaoli oa mabotho. Eaba eo o bokella mphi e kholo, a ea lara mabapa le Jamnia, 'me a romela molaetsa ona ho Jonathane, moprista e moholo:
70“Ke uena feela ea emeletseng ho re loantša; u re tšehisa batho, u re fetotse sekhobo. Ke ka baka la'ng u ikentseng 'mampoli loting? 71Haeba u fela u tšepile mabotho a hao, ak'u tle koano thoteng mona, re tl'o ntšana mahanyetsi, hobane 'na ke tšehelitsoe ke batho ba metse. 72Botsa, 'me ke hona u tla ntseba hore na ke mang, le hore na ba nthusitseng ke bo-mang. Batho ba tla u joetsa hore ha ho kamoo le ka setlelang pel'a rona, hobane le bo-ntat'ao ba se ba ile ba phalalisoa habeli naheng ea bona. 73Joale u ke ke ua kopa ho loantša lebotho la ka la bapalami le mphi e kana-kana mona thoteng, moo ho seng lefika kapa lejoe kapa sona sebaka sa moo u ka tšabelang teng.”
74Ha Jonathane a utloa mantsoe a Apoloniose, a tlaloa ke pelo. A khetha bahlabani ba likete li leshome, 'me a tloha Jerusalema; 'me Simone, ngoan'abo, a ikopanya le eena ho mo thusa. 75A lara ka pele ho Jopo; empa batho ba motse ba mo koalla kantle, hobane ka motseng ho ne ho e-na le lebotho la Apoloniose la balebeli. Joale a hlasela Jopo. 76Batho ba motse, ke letsoalo, ba mo bulela; eaba Jonathane o hapa Jopo. 77Apoloniose ha a utloa tsena, a phutha bapalami ba likete li tharo 'moho le mphi e kholo ea litaaso; a leba nq'a Ashedode, a etsa sa mokana a fetela pejana. A hla a leba hona nahathote, hobane o ne a e-na le lebothohali la bapalami leo a neng a le tšepa.
78Jonathane a mo sala morao ho leba Ashedode, 'me limphi tsa thulana ka ntoa. 79Ka sekhukhu Apoloniose o ne a siile bapalami ba sekete morao. 80Jonathane a tseba hore ho na le ba mo laletseng ba hlaha kamorao, ha bapalami bana ba teela mphi ea hae hare, 'me ba e betsa ka litsenene ho tloha hoseng ho fihlela mantsiboea. 81Empa mabotho a Jonathane a loana senna joalokaha a ne a laetsoe, 'me lipere tsa ba lireng tsa ba tsa khathala. 82Eare ha lebotho la bapalami le feletsoe ke matla, Simone a tla fihla le mphi ea hae a futuhela mara a ba litaaso, a a fenya 'me a baleha. 83Bapalami ba phasalla hohle le nahathote. Ba balehela Ashedode 'me ba kena Bete-Dagone, e leng tempele ea molimo oa bona, hore ba pholohe. 84Jonathane a chesa Ashedode le metse e haufi, a ba a hapa thepa ea eona. Tempele ea Dagone a e cheseletsa le ba neng ba tšabetse ka ho eona. 85Palo ea ba bolailoeng ka sabole, ha e kopana le ea ba chesitsoeng ba ntse ba phela, e ne e batla e le likete tse robeli. 86Joale Jonathane a tloha moo, a ea lara pel'a Ashekelone, moo batho ba motse ba ileng ba mo khahlametsa ka tlhompho e kholo. 87Eaba Jonathane le bao a neng a e-na le bona ba khutlela Jerusalema, ba nkile thepa e ngata eo ba e hapileng.
88Ha khosi Alekesandere a utloa litaba tsena, a tlotlisa Jonathane le ho feta pele. 89A mo romela sepele sa khauta, seo e leng moetlo ho se fa seng le likhosi; a ba a mo nea Ekerone le mathoko a eona hore e be bohahae.
