Komello mehleng ea Elia
1Elia, ea neng a ahile Tishebe e Gileade, a re ho Akabe: “Ka Morena Molimo oa Iseraele ea phelang, eo ke mo sebeletsang, ho ke ke ha lala phoka, kapa ha na pula ka lilemo tsena, haese ka taelo ea ka.”
2Lentsoe la Morena la fihla ho Elia, la re: 3“Tsamaea, u lebe nq'a bochabela, u e'o ipata pel'a molatsoana oa Kerite, o ka bochabela ho Jorodane. 4U tla noa metsi a molatsoana oo, 'me ke se ke laetse makhoaba hore a u fepe.”
5Elia a tsamaea, a etsa joalokaha Morena a mo laetse, a ea lula pel'a molatsoana oa Kerite, o ka bochabela ho Jorodane. 6Hoseng le mantsiboea makhoaba a ne a ee a mo tlisetse bohobe le nama, 'me Elia o ne a e-noa metsi a molatsoana oo. 7Kamora' nakoana molatsoana oo oa e-psha, hobane pula e ne e sa ne.
Elia le mohlolohali oa Sarepeta
8Lentsoe la Morena la fihla ho Elia, la re: 9“Tsamaea, u ee Sarepeta e Sidone, u e'o lula teng. Ke se ke laetse mosali e mong oa mohlolohali hona moo, hore a u fepe.” 10Eaba Elia oa tsamaea, o ea Sarepeta. Eitse ha a fihla khorong ea motse oo, a fumana mosali oa mohlolohali a ntse a roalla patsi. Elia a hōoeletsa, a re: “Kea u kōpa: Ak'u ntlele le metsinyana ka mohope, ke tl'o noa.” 11Eare ha mosali a re oa ea, Elia a boela a mo hōoeletsa, a re: “Kea u kōpa: Ak'u ntlisetse le thathana ea bohobe.”
12Mosali eo a re: “Ka Morena Molimo oa hao ea phelang, ha ke na leha e le thathana feela. Phofshoana eo ke nang le eona ka lefisoaneng ke e ka tlalang seatla; le ole ha e sa le kae ka lekukeng. Ke thonaka lichachana tse seng kae, hore ke e'o pheha, 'na le moshanyana oa ka re tle re je, re ntan'o ichoella.”
13Eaba Elia o re ho mosali eo: “U se ke ua tšaba; tsamaea u e'o etsa kamoo u boletseng kateng, empa pele ho tsohle, nketsetse moqathane, u o tlise koano, ebe joale u etsetsa uena le moshanyana oa hao. 14Morena Molimo oa Iseraele, o re: ‘Phofo e ka lefisoaneng, le ole e ka lekukeng, li ke ke tsa fela, ho fihlela mohl'a Morena a nesang pula lefatšeng.’ ”
15Mosali eo a tsamaea, a etsa kamoo Elia a mo laetseng kateng. Mosali eo, le moshanyana oa hae, le Elia, ba 'na ba e-ba le lijo ho-ea-ho-ile. 16Phofo e ka lefisoaneng, le ole e ka lekukeng, tsa fela tsa se ke tsa fela, joalokaha Morena a ne a boletse ka molomo oa Elia.
17Kamorao ho tsena, mosali eo oa mohlolohali, e leng mong'a lelapa, a kuleloa ke moshanyana eo oa hae, hoo moshanyana eo a bileng a shoa. 18Mosali eo a re ho Elia: “Ekaba u ntsekisa'ng, motho oa Molimo? Na u tletse hore sebe sa ka se hopoloe, 'me moshanyana oa ka a shoe?”
19Elia a re ho eena: “Mo tlise koano!” Elia a nka setōpō sefubeng sa mosali, a se isa ka kamoreng e kaholimo, moo eena Elia a neng a lula teng, a fihla a se bea holim'a bethe ea hae. 20Elia a ipiletsa ho Morena, a re: “Morena Molimo oa ka, na u fela u otlile le mohlolohali eo ea nthotseng, ka ho bolaea moshanyana oa hae?” 21A paqama holim'a setōpō ka makhetlo a mararo, a ipiletsa ho Morena, a re: “Morena Molimo oa ka, kea u rapela! Moea oa ngoana enoa a o ke o khutlele ka ho eena hape.” 22Morena a mamela thapelo ea Elia, moea oa ngoana oa khutlela ka ho eena, 'me a phela.
23Eaba Elia o nka ngoana, o mo theolela ka kamoreng e katlase, o mo nea 'm'ae. Elia a re: “Bona, mora oa hao oa phela!”
24Mosali a re ho Elia: “Ka ketso ena, kea tseba joale hore u moporofeta oa Molimo, le hore seo Molimo a se bolelang ka molomo oa hao ke 'nete.”
