Moea oa Molimo le moea oa Sera sa Kreste
1Baratuoa, le se ke la lumela mang kapa mang ea reng o na le Moea. Le mpe le hlahlobe hore na moea oo oa bona o tsoa ho Molimo, hobane hohle lefatšeng ho tletse baporofeta ba bohata. 2Le tla tseba moea o tsoang ho Molimo ka sena: Moea o mong le o mong o pakang Jesu Kreste ea tlileng e le motho, o tsoa ho Molimo; 3athe moea o mong le o mong o sa pakeng, Jesu ha o tsoe ho Molimo. Moea o joalo ke oa Sera sa Kreste, seo le utloileng hore sea tla, se seng se bile se le teng hona joale lefatšeng.
4Lōna bana ba ka, le ba Molimo, 'me le hlōtse baporofeta bao, hobane ea nang le lōna o moholo ho feta ea nang le ba lefatše. 5Bona ke ba lefatše; kahoo ba bua tsa lefatše, 'me lefatše lea ba mamela. 6Rōna re ba Molimo. Ea tsebang Molimo oa re mamela, empa eo e seng oa Molimo ha a re mamele. Ke ka sena re tsebang moea oa 'nete le moea oa bokhelohi.
Molimo ke lerato
7Baratuoa, a re rataneng, hobane lerato le tsoa ho Molimo. Mang le mang ea nang le lerato o tsoetsoe ke Molimo, 'me o tseba Molimo. 8Ea se nang lerato ha a tsebe Molimo, kaha Molimo ke lerato. 9Seo lerato la Molimo le bonahalitsoeng ka sona ho rōna ke sena: Molimo o ile a rōmela Mora oa hae ea inotši lefatšeng, hore re tle re phele ka eena. 10Seo lerato le leng sona ke sena: hase hore ke rōna ba ratileng Molimo, empa ke eena ea re ratileng, a ba a rōmela Mora oa hae, hore e be nyehelo ka baka la libe tsa rōna. 11Baratuoa, ha e le moo Molimo a re ratile joalo, le rōna re tšoanetse ho ratana. 12Ha ho ea kileng a bona Molimo le ka mohla. Ha re ratana, Molimo o phela ka ho rōna, 'me lerato la hae le phethehile ka ho rōna.
13Seo re tsebang ka sona hore re phela ka ho eena, le eena o phela ka ho rōna, ke sena: o re neile Moea oa hae. 14Rōna re bone, 'me re paka hore Ntate o rōmile Mora hore e be Mopholosi oa lefatše. 15Mang le mang ea pakang hore Jesu Kreste ke Mora oa Molimo, Molimo o phela ka ho eena, le eena o phela ka ho Molimo. 16Rōna re tsebile, ebile re lumetse lerato leo Molimo a nang le lona ho rōna.
Molimo ke lerato. Ea phelang leratong o phela ka ho Molimo, le Molimo o phela ka ho eena. 17Seo lerato le tla be le phethehile ka sona ka ho rōna ke sena: re tla ba sebete mohl'a letsatsi la kahlōlo, hobane bophelo ba rōna lefatšeng bo tšoana le ba Kreste. 18Tšabo ha e eo leratong, empa lerato le phethehileng le qhala tšabo, hobane tšabo e tsamaea le kotlo. Ea nang le tšabo ha aa phetheha leratong.
19Rōna re na le lerato, hobane eena o re ratile pele. 20Ha e mong a re: “Ke rata Molimo,” empa a hloile ngoan'abo, o leshano, hobane ea sa rateng ngoan'abo, eo a 'monang, ha a ka ke a rata Molimo eo a e-song ho 'mone. 21Taelo eo Kreste a re neileng eona ke ena: Ea ratang Molimo, eka khona a rate le ngoan'abo.
