1 BAKORINTHE 3

₁Bana beso, 'na ke sitiloe ho bua le lōna joalokaha ke ne nka bua le batho ba nang le Moea o Halalelang, empa ke buile le lōna joalokaha le le ba lefatše, joaloka masea ho Kreste. ₂Ke le fepile ka lebese e seng ka lijo tse thata, hobane li ne li ka le sita. Esita le joale li ntse li ka le sita, ₃hobane le ntse le le ba lefatše. Ha e le mona le sa na le mohōnō le liqabang har'a lōna, na hoo ha ho supe hore le ba lefatše, 'me le laoloa ke tsa botho? ₄Ha e mong a re: “'Na ke oa Paulosi,” 'me e mong a re: “'Na ke oa Apolosi,” na ha le ee ka tsa botho?

₅Hantle-ntle Apolosi ke eng? Paulosi eena ke eng? Ke basebeletsi feela bao le lumetseng ka baka la bona, ba sebelitseng ho ea kamoo Morena a abetseng e mong le e mong oa bona kateng. ₆'Na ke ile ka lema, Apolosi eena a noesetsa, empa ke Molimo ea melisitseng. ₇Ka hona ea lemang hase letho, le ea noesetsang hase letho, empa eo e leng letho ke Molimo ea melisang. ₈Ea lemang le ea noesetsang baa tšoana, 'me e mong le e mong o tla amohela moputso ho ea ka mosebetsi oa hae. ₉Rōna re sebetsa 'moho le Molimo; lōna le tšimo ea Molimo, le mohaho oa Molimo.

₁₀Ka mohau oo Molimo a nketselitseng oona ke ile ka etsa mothèo joaloka sehahi se bohlale; e mong a haha holim'a oona. Empa e mong le e mong a hlokomele hore na o haha joang. ₁₁Ha ho ea ka etsang mothèo o mong kantle ho o seng o le teng, e leng Jesu Kreste. ₁₂Ha ba bang, ba hahang holim'a mothèo ona, ba ka sebelisa khauta, kapa silefera, kapa majoe a bohlokoa, ba bang lehong, kapa joang, kapa lehlaka, ₁₃mosebetsi oa e mong le e mong oa bona o tla pepeseha. Letsatsi la Kreste le tla o hlahatsa. Le tla tla ka mollo, 'me mollo oo o tla hlahloba boleng ba mosebetsi oa e mong le e mong. ₁₄Haeba mosebetsi oa e mong ea hahileng holim'a mothèo o sa senyehe, o tla amohela moputso. ₁₅Haeba mosebetsi oa e mong o e-cha, o tla mo senyehela, empa eena o tla pholosoa, joaloka ea fetileng har'a mollo.

₁₆Na ha le tsebe hore le tempele ea Molimo, le hore Moea oa Molimo o ahile ka ho lōna? ₁₇Ha motho a heletsa tempele ea Molimo, Molimo o tla mo timetsa, hobane tempele ea Molimo ea halalela, 'me tempele eo ke lōna.

₁₈Ho se be ea ithetsang. Ha e mong har'a lōna a ikhopola hore o na le bohlale ba lefatše lena, a ke a fetohe sethoto, e le hore a tle a hlalefe. ₁₉Bohlale ba lefatše lena ke bothoto mahlong a Molimo. Etsoe Mangolo a re:

₂₁Kahoo ho se be ea ithorisang ka batho. Tsohle ke tsa lōna, ₂₂e ka ba Paulosi, kapa Apolosi, kapa Kefase, kapa lefatše lena, kapa bophelo, kapa lefu, kapa tse teng, esita le tse tlang. Tsena tsohle ke tsa lōna, ₂₃lōna le ba Kreste, 'me Kreste ke oa Molimo.