Mpho e etsetsoang balumeli ba Jerusalema
1Tabeng ea koleke e etsetsoang balumeli, le lōna le etse joalokaha ke laetse likereke tsa Galatia. 2Ka tsatsi le qalang beke, e mong le e mong oa lōna a bee ho hong kathōko ha hae, ho ea kamoo a sitsitsoeng kateng; likoleke li etsoe ke e-s'o fihle. 3Ha ke fihla, ke tla rōmela bao le ka ba khethang ka mangolo hore ba ise limpho tsa lōna tsa mohau Jerusalema. 4Haeba ho hlokeha hore le 'na ke ee, ke tla ea le bona.
Merero ea maeto
5Ke tla feta le ho lōna ha ke potolohile Masedonia, hobane ke ntse ke potoloha Masedonia. 6Mohlomong ke tla hlola le lōna, ke qete mariha, le tle le nthuse ho tsoela pele maetong a ka. 7Ha ke lakatse ho le fapohela feela ke feta, hobane ke ikemiselitse ho lula le lōna nako e itseng, ha Morena a rata. 8Ke tla ba mona Efese ho fihlela ka Pentekonta, 9hobane teng ke buletsoe monyetla o moholo, o atlehang, empa ho bile ho na le ba bangata ba nkhanyetsang.
10Haeba Timothea a ka fihla, le etse hore a lule le lōna a se na tšabo, hobane o sebetsa mosebetsi oa Morena joaloka 'na. 11Ho se be ea mo nyelisang, le mpe le mo fetisetse ho 'na ka khotso, hobane 'na le bana babo rōna re mo lebeletse.
12Ha e le ngoan'abo rōna Apolosi, ke mo kōpile haholo hore a tle ho lōna le bana babo rōna, empa e ne e se thato ea hae ho hang ho tla hona joale. O tla tla mohla a fumanang sebaka.
Kōpo ea ho qetela le litumeliso
13Falimehang, tieang tumelong, emang senna, matlafalang. 14Etsang tsohle ka lerato.
15Joale ke sa na le kōpo, bana beso. Lea tseba hore lelapa la Setefanase ke letsibolo bolumeling naheng ea Akaea, 'me le ikabetse ho sebeletsa balumeli. 16Ikokobeletseng ba joalo, esita le bohle ba sebetsang, ba fufuleloang 'moho le bona. 17Ke thabetse ho fihla ha Setefanase, le Foretunafose, le Akaikuse, hobane ke bona ba nthusitseng bosieong ba lōna. 18Ba khatholotse moea oa ka le ea lōna. Ananelang ba joalo.
19Likereke tsa Asia lia le lumelisa. Akulase le Prisilla le kereke e kenelang ha bona ba le lumelisa haholo Moreneng. 20Bana babo rōna bohle baa le lumelisa. Lumelisanang ka kako e halalelang.
21Ke 'na Paulosi ea ngotseng litumeliso tsena ka letsoho la ka.
22Haeba ho e-na le ea sa rateng Morena, a ke a rōhakehe. Marana tha! Morena, tloo!
23Mohau oa Morena Jesu o ke o be le lōna.
24Lerato la ka le be le lōna bohle ho Kreste Jesu.
