Ho furalloe melimo ea bohata
1Bana beso, ke rata ha le tseba hore baholo-holo bohle ba rōna ba ne ba tsamaisoa ke leru, 'me bohle ba tšela leoatle. 2Bohle ba kolobetsoa lerung le leoatleng, hore e be balateli ba Moshe. 3Bohle ba ja sejo sa moea se tšoanang. 4Hape ba noa seno sa moea se tšoanang, hobane ba ile ba e-noa Lefikeng la moea le neng le ba latetse. Lefika leo ke Kreste. 5Empa Molimo ha aa ka a khahloa ke ba bangata ba bona, 'me ba ile ba shoela lehoatateng ka bongata.
6Tsena li etsahetse hore e be mohlala ho rōna, hore re se ke ra lakatsa tse khopo, joalokaha ba ne ba li lakatsa. 7Le se ke la sebeletsa melimo ea bohata, joaloka ba bang ba bona, hobane ho ngotsoe, ho thoe: “Sechaba sa lulela ho ja le ho noa, sa nt'o ema sa bapala.” 8Re se ke ra etsa bohlola, joalokaha ba bang ba bona ba ile ba bo etsa, 'me ka letsatsi le le leng ha ketoha ba likete tse mashome a mabeli a metso e meraro. 9Re se ke ra leka Morena, joalokaha ba bang ba bona ba ile ba mo leka, 'me ba bolaoa ke linōha. 10Hape le se ke la luma-luma, joalokaha le ba bang ba bona ba ile ba luma-luma, 'me ba timetsoa ke Motimetsi.
11Joale tsena li ile tsa etsahala ho bona, hore e be mohlala, 'me tsa ngolloa rōna ho re hlokomelisa, rōna bao mehla ea bofelo e re fihletseng. 12Ka baka leo, ea lekanyang hore o tsitsitse, a ele hloko, esere a oa. 13Ha ho meleko e kileng ea le hlahela, e fetang matla a botho. Molimo oa tšepahala, 'me a ke ke a lumela hore le lekoe ho feta matla a lōna. Ha le lekoa o tla le fa matla a ho mamella, le monyetla oa hore le tsebe ho hlōla.
14Ka baka leo, baratuoa ba ka, furallang tšebeletso ea melimo ea bohata. 15Ke bua le lōna le le ba bohlale; ke re le ikahlōlele hore na ke re'ng. 16Na senoelo se hlohonolofalitsoeng, seo re se lebohang, hase se re abelang mali a Kreste na? Le bohobe boo re bo ngoathang, na hase mokhoa oa ho abeloa 'mele oa Kreste na? 17Le hoja re le bangata, re 'mele o le mong, hobane bohobe bo bong, 'me bohle re ja bohobe boo bo le bong.
18Bonang Baiseraele ba tsoalo! Na ba jang nama ea mahlabelo, ha ba be le kabelo tšebeletsong e etsoang aletareng? 19Ebe ke bolela'ng? Hore seo bahedene ba se hlabelang melimo ea bohata ke letho? Kapa hore molimo oa bohata ke letho? 20Che, ke bolela hore tseo ba li hlabelang melimo ea bohata ba li hlabela bademona, e seng Molimo. Ha ke lakatse ha le ka ikopanya le bademona. 21Ha le ka ke la noela senoelong sa Morena le senoelong sa bademona. Ha le ka ke la jela tafoleng ea Morena le tafoleng ea bademona. 22Kapa na re ka phephetsa Morena? Na re mo feta ka matla?
Etsang tsohle ho tlotlisa Molimo
23Le re: “Tsohle li lumeletsoe,” empa hase ho re tsohle li na le molemo. E, tsohle li lumeletsoe, empa hase ho re tsohle li na le thuso. 24Ho se be ea ipatlelang tse molemo, empa e mong a batlele e mong tse molemo.
25Le ka ja lijo life le life tse rekisoang tlung ea lijo, ka matsoalo a khutsitseng, le sa botse letho, 26hobane “lefatše ke la Morena, le tsohle tse ho lona.”
27Ha e mong oa bao e seng balumeli a le memela lijong, 'me le rata ho ea, le je tsohle tseo a le fang tsona, ka matsoalo a khutsitseng, le sa botse letho. 28Empa ha e mong a ka re ho lōna: “Sena ke se hlabetsoeng melimo ea bohata,” le se ke la se ja ka baka la eo ea le boleletseng, le ka baka la letsoalo. 29Ha ke bolele letsoalo la hao, ke bolela la eo ea u boleletseng. Empa ke hobane'ng ha bolokolohi ba ka bo laoloa ke letsoalo la e mong? 30Ha ke leboha Molimo ka seo ke se jang, ho ea ka'ng ha ke nyefoleloa ho leboha hoo?
31Ka baka leo, ebang lea ja, kapa lea noa, kapa le etsa eng kapa eng, tsohle le li etsetse ho tlotlisa Molimo. 32Le se khōpise motho, e ka ba Mojuda, kapa molichaba, kapa le kereke ea Molimo, 33joalokaha le 'na ke leka ho thabisa bohle, linthong tsohle. Ha ke ipatlele se molemo ke le mong, ke se batlela le ba bangata, hore ba tle ba pholosoe.
