1 LIKETSAHALO 4

₁Bana ke bara ba Juda: Perese, le Heserone, le Karimi, le Hure, le Shobale. ₂Reaea, mora oa Shobale, a tsoala Jahate, Jahate a tsoala Ahumai le Lahade. Ena ke eona merabe ea Basora. ₃Bana ke bara ba Etame: Jesereele, le Jishema, le Jidebashe. Lebitso la khaitseli ea bona ke Haseleleponi. ₄Penuele a tsoala Gedore. Esere a tsoala Husha. Bana ke bona bara ba Hure, letsibolo la Eferata, ea ileng a thea Betlelehema.

₅Ashehure ea ileng a thea Tekōoa, o ne a e-na le basali ba babeli, e leng Hela le Naara. ₆Naara a mo tsoalla Ahusame, le Hefere, le Temeni, le Hahashatari. Bana ke bara ba Naara. ₇Bara ba Hela ke Serete, le Sohare, le Etenane, ₈le Kose, ea ileng a tsoala Anube, le Hasobeba, le ba morabe oa Aharahele, mora oa Harume.

₉Hasobeba o ne a hlompheha ho feta bana babo. 'M'ae o ne a ile a mo rea lebitso la Jabese, hobane o ne a re: “Ke ile ka 'meleha ka mahlaba a maholo.”

₁₀Jabese a ipiletsa ho Molimo oa Iseraele, a re: “Kea u rapela: U ke u nthlohonolofatse, u nkekeletse naha, u mpaballe, u ntšireletse, 'me ke se ke ka hlōkōfatsoa.” Molimo a mo nea seo a se kōpileng.

₁₁Kelōbe, ngoan'abo Shuha, a tsoala Mehire, Mehire a tsoala Eshetone, ₁₂Eshetone a tsoala Bete-Rafa, le Paseea, le Tehina, Tehina a tsoala Ire-Nahashe. Bana ke bona baahi ba Reka.

₁₃Bana ke bara ba Kenase: Oteniele, le Seraea. Bara ba Oteniele ke Hatate le Meonotai. ₁₄Meonotai a tsoala Ofera. Seraea a tsoala Joabe. Joabe a thea motse o bitsoang Khohlo ea Litsebi, hobane baahi ba oona e ne e le litsebi tsa mesebetsi ea matsoho.

₁₅Bana ke bara ba Kalebe, mora oa Jefune: Iru, le Ela, le Naame. Mora oa Ela ke Kenase. ₁₆Bana ke bara ba Jehalelele: Sife, le Sifa, le Tiriea, le Asarele. ₁₇Bana ke bara ba Esera: Jetere, le Merede, le Efere, le Jalone. Merede a nyala Bitiea, morali oa Faro, 'me a mo tsoalla morali ea bitsoang Meriama, le bara ba babeli, Shamai le Jisheba. Jisheba ke eena mothei oa Eshetemoa. ₁₈Mosali oa hae oa Mojuda a tsoala Jerede ea ileng a thea Gedore, le Hebere ea ileng a thea Soko, le Jekutiele ea ileng a thea Sanōoa. ₁₉Bara ba mosali oa hae Hodiea, khaitseli ea Nahama, ke Keila oa Mogarimi, le Eshetemoa oa Maaka. ₂₀Bara ba Shimone ke Amanone, le Rina, le Bene-Hanane, le Tilone. Bara ba Ishi ke Sohete, le Bene-Sohete.

₂₁Bana ke bara ba Shela, mora oa Juda: Ere ea ileng a thea Leka, le Lada ea ileng a thea Maresha, le ba merabe ea ba neng ba etsa masela a lene, mane Bete-Ashebea, ₂₂le Jokime, le baahi ba Koseba, le Jōoashe, le Sarafa, e leng ba neng ba busa Moabe le Jashobi-Leheme. Tsena li tsoa lingoliloeng tsa boholo-holo. ₂₃Bana e ne e le libōpi tse neng li ahile Netaime le Kedera, li sebeletsa khosi.

₂₄Bana ke bara ba Simeone: Nemuele, le Jamine, le Jaribe, le Sera, le Shaule. ₂₅Shaule a tsoala Shalōme, Shalōme a tsoala Mibesame, Mibesame a tsoala Mishema. ₂₆Bara ba Mishema ke Hamuele, Hamuele a tsoala Sakure, Sakure a tsoala Shimei.

₂₇Shimei o ne a e-na le bara ba leshome le metso e tšeletseng le barali ba tšeletseng, empa bana babo ba ne ba se na bana; ka lebaka lena morabe oa bona oa se ke oa ata joaloka morabe oa Juda.

₂₈Ba ne ba ahile Beeresheba, le Molada, le Hasere-Shuale, ₂₉le Bileha, le Eseme, le Tolada, ₃₀le Bethuele, le Horema, le Sikelage, ₃₁le Bete-Marakabote, le Hasere-Susime, le Bete-Biri, le Shaaraime. Ena e bile metse ea bona ho fihlela pusong ea Davida. ₃₂Metsana e ba pota-potileng e ne e le Etame, le Aine, le Rimone, le Tokene, le Ashame, e ne e le metsana e mehlano, ₃₃le metsana eohle e neng e pota-potile metse eo, ho ea fihla Baalate. Ena ke eona metse eo ba neng ba phela ho eona.

₃₄Lenane la tlhatlhamano ea bona ke lena: Meshobabe, le Jameleke, le Josha, mora oa Amasiea, ₃₅le Joele, le Jehu, mora oa Joshibiea, setlōhōlō sa Seraea, setlōhōloana sa Asiele, ₃₆le Eleunai, le Jaakoba, le Jeshohaea, le Asaea, le Adiele, le Jesimiele, le Benaea, ₃₇le Sisa, mora oa Shifi, setlōhōlō sa Alone, ea tsoetsoeng ke Jedaea, Jedaea ea tsoetsoeng ke Shimeri, Shimeri ea tsoetsoeng ke Shemaea.

₃₈Banna bana ba boletsoeng kaholimo e ne e le mahosana a merabe eabo bona. Malapa abo bona a ata. ₃₉Ba 'na ba tsamaea ho ea fihla kantle ho meeli ea Gedore, le ho ea fihla bochabela ho khohlo, ba ntse ba batlela mehlape ea bona makhulo. ₄₀Ba fumana makhulo a matle, a nonneng, le naha e namileng, e nang le khotso, e khutsitseng. Baahi ba eona ba pele e ne e le Bahame.

₄₁Banna bana ba boletsoeng ka mabitso ba ne ba fihle mehleng ea Hesekiea, khosi ea Juda. Ba futuhela liahelo tsa Bahame le tsa Bameune ba neng ba ahile moo, ba ba ripitla ho hang, joalokaha ho ntse ho bonahala le kajeno-ea-bokajeno. Joale ba aha naheng eo ea bona, hobane mehlape ea bona e ne e fumane makhulo. ₄₂Banna ba ka bang makholo a mahlano, ba morabe ona oa Simeone, ba futuhela Thaba ea Seire ba eteletsoe pele ke Pelatiea, le Neareea, le Refaea, le Usiele, bara ba Ishi. ₄₃Ba bolaea masalla a Baamaleke a ileng a phonyoha, 'me ba aha naheng eo ea bona ho fihlela kajeno-ea-bokajeno.