Litaelo tsa Davida mabapi le Tempele
1Davida a khōbōkanya mahosana 'ohle a Iseraele, Jerusalema, le mahosana a merabe, le balaoli ba mabōtho a sebeletsang khosi ka lihlopha tsa 'ona ka ho suthelana, le balaoli ba bahlabani ba likete, le balaoli ba ba makholo, le bahlokomeli ba maruo 'ohle le matlotlo 'ohle a khosi, le bahlokomeli ba bara ba khosi, le bahlanka bohle, le banna ba linatla, le bahale.
2Joale khosi Davida a ema, a re: “'Mameleng, lōna bana beso, le sechaba sa heso. Ke ne ke e-na le maikutlo a ho hahela areka ea selekane sa Morena Tempele, eo e tla lula ka ho eona, le moo Molimo oa rōna a tla namela teng, 'me ke se ke entse litokiso tsa ho e haha. 3Empa Molimo o ile a re ho 'na: ‘U ke ke ua nkhahela Tempele, hobane u bile motho oa lintoa, 'me u tšolotse mali.’
4“Leha ho le joalo, Morena Molimo oa Iseraele, o khethile 'na, ho ba lelapa lohle la ntate, hore ke be khosi ea Iseraele kamehla eohle. O khethile Juda ho ba moetapele, 'me morabeng oa Juda o khethile lelapa leso. Har'a bana beso o ile a khahloa ke 'na, 'me a mpea khosi ea Iseraele eohle. 5Morena o mphile bara ba bangata, 'me har'a bara bohle o khethile Solomone, mora oa ka, ho lula teroneng ea 'muso oa Morena, a buse Iseraele.
6“Morena o ile a re ho 'na: ‘Solomone, mora oa hao, ke eena ea tla nkhahela Tempele, le mabala a eona, hobane ke mo khethile hore e be mora oa ka, 'me 'na ke be ntat'ae. 7Ke tla tiisa 'muso oa hae kamehla eohle, haeba a ka 'na a bōlōka melao ea ka le litemoso tsa ka, joalokaha a ntse a etsa.’
8“Ka baka leo, pontšeng ea Baiseraele bohle, e leng sechaba sa Morena, le moo Molimo oa rōna a ntseng a utloa, batlang, 'me le bōlōke melao eohle ea Morena Molimo oa lōna, e le hore le tle le rue naha ena e ntle, le e siele bana ba lōna, e be ea bona kamehla eohle.
9“Joale uena Solomone, mora oa ka, tseba Molimo oa ntat'ao, u mo sebeletse ka pelo ea hao eohle, le ka maikutlo a hao 'ohle. Morena o lekola lipelo tsohle, 'me o tseba menahano eohle, le mehopolo eohle. Ha u ka 'matla, u tla mo fumana, empa haeba u ka mo furalla, o tla u lahlela ruri! 10Hlokomela he, hobane Morena o u khethetse hore u mo hahele Tempele eo e leng Sehalalelo sa hae. E-ba monna, u etse joalo.”
Davida o nea Solomone setšoantšo sa Tempele
11Joale Davida a nea Solomone, mora oa hae, setšoantšo sa lethule la Tempele, le sa matlo a eona, le sa likamore tsa matlotlo, le sa likamore tse kaholimo, le sa likamore tse kahare, le sa sekoahelo sa tefelo ea sebe. 12A mo nea le setšoantšo sa tsohle tse neng li le mohopolong oa hae, e leng mabala a Tempele ea Morena, le likamore tse a pota-potileng, le likamore tsa matlotlo a Tempele ea Molimo, le likamore tsa limpho tse halalelang.
13Davida a laela Solomone kamoo a tla hlopha baprista le Balevi kateng, hore ba etse mosebetsi oohle oa tšebeletso ea Tempele ea Morena; le kamoo thepa eohle e tla sebelisoa kateng ha ho sebeletsoa ka Tempeleng ea Morena. 14A mo laela le hore na boima ba khauta le ba silefera e tla etsa thepa eohle, e tla sebelisoa, bo be bokae. 15A 'molella le boima ba khauta e tla etsa liluloana tsa mabone, le e tla etsa mabone, le boima ba silefera e tla etsa liluloana tsa mabone, le e tla etsa mabone, ho ea kamoo seluloana ka seng se tla sebelisoa kateng. 16A 'molella le boima ba khauta e tla etsa tafole e 'ngoe le e 'ngoe e tla bea bohobe bo halalelang, le boima ba silefera e tla etsa litafole tsa silefera, 17le boima ba khauta e hloekisitsoeng e tla etsa lifereko, le likotloloana, le likomiki, le boima ba khauta e tla etsa sekotlolo ka seng sa khauta, le boima ba silefera e tla etsa sekotlolo ka seng sa silefera. 18A ba a 'molella le boima ba khauta e hloekisitsoeng, e tla etsa aletare ea ho chesetsa mokubetso, a mo nea le setšoantšo sa kariki, ke ho re sa likerubime tsa khauta, tse tla thathalatsa mapheo, li khurumetse areka ea selekane sa Morena.
19Eaba Davida o re: “Tsena tsohle ke li ngotse, hobane letsoho la Morena le ile la ntataisa, 'me a etsa hore ke utloisise liqaqiso tsohle tsa setšoantšo sena.”
20Davida a boela a re ho mora oa hae Solomone: “E-ba monna, u be sebete, u etse joalo. U se ke ua tšaba, kapa ua tsieleha, hobane Morena Molimo, e leng Molimo oa ka, o tla ba le uena. Ha a ka ke a u lahla, kapa a u furalla, ho fihlela u qeta mosebetsi oohle oa ho haha Tempele ea Morena. 21Lihlopha tsa baprista le tsa Balevi li tla u thusa mosebetsing oohle oa Tempele ea Molimo. Banna bohle ba litsebi ba tla u thusa mesebetsing eohle e batlang tsebo; le mahosana le sechaba sohle se tla mamela taelo ea hao.”
