1 LIKETSAHALO 23

₁Ha Davida a se a hōlile, e se e le mobu, a bea mora oa hae Solomone hore e be khosi ea Baiseraele.

₂Davida a phutha mahosana 'ohle a Baiseraele, le baprista, le Balevi. ₃Ha baloa Balevi ho tloha ka ba lilemo tse mashome a mararo, ho ea holimo. Palo ea bona, ha ba baloa ka bomong, ea e-ba likete tse mashome a mararo a metso e robeli. ₄Ba likete tse mashome a mabeli a metso e mene ba bona ba beoa ho okamela mesebetsi ea Tempele ea Morena; ba likete tse tšeletseng bona ea e-ba batsamaisi ba litaba tsa naha ea Iseraele le baahlōli. ₅Ba likete tse 'ne ea e-ba balebeli ba menyako, 'me ba likete tse 'ne hape ba rorisa Morena ka liletsa tseo Davida a neng a laele hore li etsoe.

₆Davida a ba arola lihlopha tse tharo, ho ea ka bara ba Levi, e leng Gereshone, le Kohate, le Merari.

₇Bara ba Gereshone e ne e le Ladane le Shimei. ₈Bara ba Ladane ba ne ba le bararo: Letsibolo e ne e le Jehiele, a hlahlangoa ke Setame, le Joele. ₉Bara ba Shimei le bona ba ne ba le bararo, e le Shelomite, le Hasiele, le Harane. Bana e ne e le lihlooho tsa lelapa la Ladane. ₁₀Bara ba Shimei ba ne ba le bane, e le Jahate, le Sisa, le Jeushe, le Beriea. ₁₁Jahate e ne e le eena hlooho, a hlahlangoa ke Sisa. Jeushe le Beriea ha baa ka ba e-ba le bana ba bangata; ka baka leo, ba balelloa 'moho ho phetha mosebetsi o le mong.

₁₂Bara ba Kohate ba ne ba le bane, e le Amorame, le Isihare, le Heborone, le Usiele. ₁₃Bara ba Amorame e ne e le Arone le Moshe. Bo-Arone le bara ba hae ba khetheloa hore kamehla eohle ba hlokomele lintho tse halalelang haholo, ba chesetse Morena mokubetso, ba mo sebeletse, ba hlohonolofatse sechaba ka lebitso la hae kamehla. ₁₄Bara ba Moshe, mohlanka oa Molimo, bona ba ile ba balelloa le ba morabe oa Levi. ₁₅Bara ba Moshe e ne e le Gereshome, le Eleesere. ₁₆Hlooho ea bara ba Gereshome e ne e le Shebuele; ₁₇ea bara ba Eleesere e le Rehabeea. Eleesere o ne a se na bara ba bang, empa bara ba Rehabeea ba ne ba le bangata haholo. ₁₈Hlooho ea bana ba Isihare e ne e le Shelomite. ₁₉Letsibolo la Heborone e ne e le Jeriea, mora oa bobeli e le Amariea, oa boraro e le Jahasiele, oa bone e le Jekameame. ₂₀Ho bara ba Usiele letsibolo e ne e le 'Mika, oa bobeli e le Jeshia.

₂₁Bara ba Merari e ne e le Mahele le Mushi; ba Mahele e le Eleasare le Kishe. ₂₂Eleasare a shoa a se na bara, a e-na le barali feela. Bana babo bona, e leng bara ba Kishe, ba ba nyala. ₂₃Bara ba Mushi ba ne ba le bararo, e le Mahele, le Edere, le Jeremote.

₂₄Bana ke bara ba Levi, ho ea ka malapa a bo-ntat'a bona. E ne e le lihlooho tsa malapa a bo-ntat'a bona, 'me ba ngotsoe ka bomong bukeng ea mabitso. Ba ne ba sebeletsa ka Tempeleng ea Morena, ho tloha ha ba le lilemo tse mashome a mabeli ho ea holimo. ₂₅Davida o ne a re: “Morena Molimo oa Iseraele, o phomolitse sechaba sa hae, e le hore se tle se ahe Jerusalema kamehla.” ₂₆Ho tloha nakong eo, ha se ke ha hlola ho sa hlokahala hore Balevi ba jare Leaho le tsohle tseo ho neng ho sebeletsoa ka tsona. ₂₇Ka taelo ea ho qetela ea Davida, ha baloa Balevi ba lilemo tse mashome a mabeli ho ea holimo.

₂₈Mosebetsi oa bona e ne e le ho thusa litlōhōlō tsa Arone ha li sebeletsa ka Tempeleng ea Morena, le mabaleng a eona, le ka likamoreng tsa eona, le ka ho hloekisa lintho tsohle tse halalelang, le ka ho etsa mosebetsi ofe kapa ofe oa Tempele ea Morena. ₂₉Ba ne ba hlokomela le bohobe bo halalelang, ba hlokomela le phofo e thumisehileng ea nyehelo ea lijo, le likuku tse sa lomosoang, le tsohle tsa lipane, le tse neng li halikoa, le tsohle tse neng li sebelisoa ha ho lekanngoa bongata kapa boholo ba ntho. ₃₀Hape mosebetsi oa bona e ne e le ho tsoha hoseng ba leboha Morena, 'me ba mo rorisa, ba etsa joalo le mantsiboea; ₃₁leha ho etsetsoa Morena linyehelo tsohle tsa secheso ka matsatsi a Sabatha, le ka mekete ea ho thoasa ha khoeli, le ka mekete e khethehileng. Ba ne ba etsa joalo kapele ho Morena, ho ea ka palo eo ba e beetsoeng ka molao.

₃₂Ka tsela ena ba ne ba hlokomela Tente ea Morena, le Sehalalelo, 'me ba thusa bara ba Arone, e leng bana babo bona, ho hlokomela litšebeletso tsa Tempele ea Morena.