1Ha selemo se thoasa, e leng nako eo likhosi li tloaetseng ho futuha ka eona, Joabe a tsoa le mabōtho, 'me a ripitla naha ea Baamone. Kamorao ho moo a ea etsetsa motse oa Raba thibella. Ha e le Davida eena o ne a setse Jerusalema. Joabe a hlōla motse oa Raba, 'me a o timetsa.2Davida a rōlisa khosi ea bona mofapahlooho oa eona oa khauta, oo boima ba oona e neng e le likilo tse mashome a mararo a metso e mene. O ne o khabisitsoe ka mahakoe a bohlokoa, 'me ba o roesa Davida. A tsoa motseng oo a haharile khapo e ngata, 3a bile a hapile le baahi ba motse oo; a ba sebelisa ka lisakha, le ka lipeke, le ka lilepe. Metse eohle ea Baamone o ne a ee a e etse joalo. Eaba Davida o khutlela Jerusalema le bahlabani bohle.
4Kamorao ho mona, ntoa ea qhōma Gesere, pakeng tsa Baiseraele le Bafilesita. Sibekai oa Mohusha a bolaea Sipai, eo e neng e le seqhobane, 'me Bafilesita ba hlōloa.
5Ntoa ea boela ea qhōma pakeng tsa Baiseraele le Bafilesita. Elehanana, mora oa Jaire, a bolaea Lahemi, ngoan'abo Goliate oa Mogate, eo thekō ea lerumo la hae e neng e le kaalo ka mofeng oa mochine o ohlang.
6Ntoa e 'ngoe ea boela ea qhōma Gate, moo ho neng ho e-na le safōla ea monna. Le leng le le leng la matsoho a hae le maoto a hae le ne le e-na le menoana e tšeletseng, kaofela e le e mashome a mabeli a metso e mene. Le eena e ne e le seqhobane. 7Jonathane, mora oa Shima, ngoan'abo Davida, a 'molaea, hobane o ne a ile a nyelisa Baiseraele.
8Batho bana ba ne ba tsoetsoe ke liqhobane tsa Gate; feela ba ile ba bolaoa ke Davida le bahlanka ba hae.
