1 LIKETSAHALO 17

₁Ha Davida a se a lula tlung ea hae, ka letsatsi le leng a re ho moporofeta Nathane: “Ak'u bone, 'na ke lula tlung e hahiloeng ka lithupa tsa likedare, empa areka ea selekane sa Morena eona e lula har'a masira!”

₂Nathane a re ho Davida: “Etsa tsohle tseo u li hopotseng, hobane Molimo o na le uena.”

₃Hona bosiung boo, lentsoe la Molimo la fihla ho Nathane, la re: ₄“Tsamaea, u e'o bolella mohlanka oa ka Davida, u re: ‘Morena o bua tjena: U ke ke ua nkhahela ntlo eo ke tla lula ho eona. ₅Ho tloha mohla ke nyollang Baiseraele naheng ea Egepeta, ho fihlela kajeno, ha ke e-s'o ka ke lula ka tlung; ke 'nile ka kena tenteng e 'ngoe, ka tsoa, ka kena ho e 'ngoe; ka kena leahong le leng, ka tsoa, ka kena ho le leng. ₆Libakeng tsohle tseo ke tsamaileng ho tsona le Baiseraele bohle, na nkile ka botsa e mong oa baahlōli ba Iseraele, bao ke neng ke ba laele ho lisa sechaba sa ka, ka re: Ke hobane'ng ha u sa nkhahela ntlo ea lithupa tsa likedare?’

₇“Ka baka lena, u tle u bolelle mohlanka oa ka Davida, u re: ‘Morena oa mabōtho o bua tjena: Ke ne ke u late motebong, moo u neng u lisa linku teng, hore u tl'o ba khosi ea sechaba sa ka sa Baiseraele. ₈Ke bile le uena hohle moo u 'nileng ua tsamaea teng, ka timetsa lira tsa hao tsohle. Ke tumisitse lebitso la hao joaloka mabitso a banna ba tumileng ba teng mona lefatšeng. ₉Ke tla khethela sechaba sa ka sa Iseraele sebaka, ke se bee ho sona, 'me se ke ke sa hlola se tšoenyeha. Batho ba khopo ba ke ke ba hlola ba se tšoenya joaloka pele, ₁₀ha ke tla be ke khethele sechaba seo sa ka sa Baiseraele baahlōli. Ke tla hlōla lira tsa hao tsohle. Hape ke u tsebisa hore Morena o tla atisa lelapa la hao.

₁₁“ ‘Ha matsatsi a hao a se a fetile, u se u orohetse ho bo-ntat'ao, ke tla etsa hore e mong oa bara ba hao a u hlahlame, ke tiise 'muso oa hae. ₁₂Ke eena ea tla nkhahela Tempele, 'me ke tla tsitsisa terone ea hae kamehla. ₁₃Ke tla ba ntat'ae, eena e be mora oa ka. Feela nke ke ka khaotsa ho mo rata joalokaha ke ile ka khaotsa ho rata ea bileng teng pele ho uena. ₁₄Ke tla 'mea ho okamela sechaba sa ka le 'muso oa ka kamehla, 'me terone ea hae e tla tsitsa kamehla eohle.’ ”

₁₅Nathane a phetela Davida litaba tsena tsohle, ho ea kahohle kamoo a li senoletsoeng kateng.

₁₆Joale khosi Davida a kena ka Tenteng, a ea lula kapele ho Morena, 'me a re: “Oho, Morena Molimo, ekaba 'na ke mang? Ekaba ntlo ea ka ke eng, ho u mphihlisitseng hōle hakaale? ₁₇Oho, Morena, hoa bonahala hore ho uena tsena e ne e sa le linyane, hobane u boetse u buile ka seo u se reretseng lelapa la mohlanka oa hao, nako e sa le hōle. Oho, Morena Molimo, u se u ntalima joalokaha eka ke motho oa boemo bo phahameng!

₁₈“Ekaba Davida a ka hlola a re'ng ho uena, ha u hlomphile mohlanka oa hao? Ke uena ea tsebang mohlanka oa hao! ₁₉Oho, Morena, ka baka la mohlanka oa hao, le ka baka la ho rata ha hao, u entse ntho ena e kholo, ua etsa hore tsena tsohle tse kholo li tsejoe.

₂₀“Oho, Morena, ha ho ea kang uena; ebile hape ha ho Molimo e mong ntle ho uena, ho ea ka tsohle tseo re li utloileng ka litsebe tsa rōna. ₂₁Ke sechaba sefe moo lefatšeng, se kang sechaba sa hao sa Baiseraele, seo Molimo a kileng a ea se lopolla hore e be sechaba sa hae? U tumisitse lebitso la hao ka ho etsa tse kholo, tse tšabehang, ka ho hleka machaba tseleng ea sechaba sa hao, seo u se lopolotseng Egepeta. ₂₂Sechaba sa hao sa Iseraele u se entse sechaba sa hao kamehla eohle, 'me uena, Morena, u Molimo oa sona.

₂₃“Joale, ka baka leo, Morena, tšepiso eo u e etselitseng mohlanka oa hao, le lelapa la hae, u ke u e phethahatse kamehla eohle, 'me u etse kamoo u buileng kateng. ₂₄Le eona u ke u e phethahatse, lebitso la hao le tle le tumisoe kamehla eohle, batho ba re: ‘Morena oa mabōtho ke Molimo oa Iseraele, ke eena Molimo oa Iseraele.’ Lelapa la Davida, mohlanka oa hao, le ke le tiee kamehla eohle.

₂₅“Uena, Molimo oa ka, u senoletse mohlanka oa hao hore u tla mo hōlisetsa lelapa la hae; ka baka lena, mohlanka oa hao o bile sebete ho u rapela. ₂₆Joale uena, Morena, ke uena feela u leng Molimo, 'me u tšepisitse mohlanka oa hao taba ena e molemo. ₂₇U hlohonolofalitse lelapa la mohlanka oa hao, hore le 'ne le be tlhokomelong ea hao kamehla eohle. Oho, Morena, u le hlohonolofalitse, 'me le tla hlohonolofala kamehla eohle.”