1Baiseraele ba tla le areka ea Molimo, ba e bea bohareng ba tente eo Davida a e hlometseng eona. Ba etsetsa Molimo linyehelo tsa secheso, le linyehelo tsa teboho. 2Ha Davida a qetile ho etsa linyehelo tsa secheso le linyehelo tsa teboho, a hlohonolofatsa sechaba ka lebitso la Morena. 3Eaba o abela monna e mong le e mong, le mosali e mong le e mong oa Moiseraele senkhoa sa bohobe, le leqahali la nama, le liphaphatha tsa mangangajane a morara.
4Davida a khetha ba bang ba Balevi ho sebeletsa kapele ho areka ea Morena, ho ipiletsa ho Morena, le ho leboha, le ho boka Morena Molimo oa Iseraele. 5Asafo ea e-ba eena hlooho, a hlahlangoa ke Sekariea. Bo-Jeiele, le Shemiramote, le Jehiele, le Matiteea, le Eliabe, le Benaea, le Obede-Edomo, le Jeiele, bona ba ne ba letsa likatara, le liharepa, athe Asafo eena o ne a letsa matlheretlhere. 6Baprista, bo-Benaea le Jahasiele, bona ba ne ba letsa literompeta ka nako tsohle, kapele ho areka ea selekane sa Molimo.
Sefela sa Davida sa teboho
7Ka lona letsatsi leo, Davida a laela Asafo le bana babo, 'me e le khetlo la pele, hore ba boke Morena ka sefela sena:
8Lebohang Morena,
le ipiletse ho eena,
phatlalatsang ketso tsa hae
har'a lichaba.
9'Mineleng, 'mineleng lifela,
le bolelise
mesebetsi ea hae eohle e hlollang.
10Ithoriseng ka lebitso
le halalelang la hae:
Pelo tsa bohle ba batlang Morena
li nyakalle.
11Ipatleleng Morena le matla a hae,
le ipatlele eena le sa khaotse.
12Hopolang mesebetsi e hlollang
eo a e entseng,
limakatso tsa hae
le kahlōlo tsa hae,
13lōna bana ba Iseraele,
mohlanka oa hae,
lōna bana ba Jakobo,
mokhethoa oa hae.
14Ke eena Morena Molimo oa rōna,
ke eena ea ahlolang lefatše lohle.
15Kamehla o hopola selekane sa hae,
lentsoe leo a le laetseng
melōko e sekete;
16selekane seo a se entseng,
a se etsa le Aborahama,
kano eo a e etselitseng Isaka,
17a ba a tiisetsa Jakobo
hore ke molao,
ke selekane sa hae le Iseraele
sa mehla eohle.
18A re: “Ke tla u nea
naha ea Kanana,
e be lefa leo u le abetsoeng.”
19Ha ba ne ba sa le 'maloana,
e le balichaba naheng eo;
20ha ba ntse ba lelera
har'a lichaba,
ba tloha 'musong o mong
ba e-ea ho o mong,
21Molimo ha aa ka a lumella motho
hore a ba tube,
'me ka baka la bona
a khalemela likhosi.
22A re: “Le se ke
la ama batlotsuoa ba ka,
le se ke
la etsa baporofeta ba ka hampe.”
23Lōna ba lefatše lohle
le ke le binele Morena,
ka letsatsi le letsatsi le phatlalatse
tsa ho pholosa ha hae.
24Bolelang tsa tlōtla ea hae
har'a lichaba,
le makatso tsa hae
har'a merabe eohle.
25Morena o moholo,
o lokeloa ke thoriso e kholo,
o tšabeha ho feta melimo eohle.
26Melimo eohle ea lichaba
ke ea bohata,
athe Morena eena o entse,
o entse maholimo.
27Tlōtla le hlompho li teng ho eena,
matla le khanya
li Sehalalelong sa hae.
28Thōhōletsang Morena,
lōna lichaba tsa mefuta-futa,
thōhōletseng tlōtla
le matla a Morena.
29Thōhōletsang tlōtla
e lokelang lebitso la Morena,
tloong kapele ho eena
le mo nyehelleng,
khumamelang Morena
le khabile ka tse halalelang.
30Lefatše lohle le thōthōmele
kapele ho eena!
O tiisitse lefatše,
le ke ke la sisinyeha.
31Maholimo a thabe,
fatše le nyakalle,
har'a machaba ho thoe:
“Morena ke eena khosi!”
32Leoatle le hoase,
le tsohle tse ka ho lona,
naha e nyakalle,
le tsohle tse ho eona.
33Joale lifate, merung, le tla bina,
li binela Morena ho tla,
ha a e-tla ho ahlōla lefatše.
34Bokang Morena, hobane o molemo,
mohau oa hae
ke oa kamehla eohle.
35E-reng:
“Molimo, mopholosi oa rōna,
ak'u re pholose;
ak'u re phuthe,
ho balichaba u re namolele,
re tle re lebohe
lebitso le halalelang la hao,
ho boka uena
e be motlōtlō oa rōna.
36Ho bokoe Morena
Molimo oa Iseraele,
a bokoe joale, le kamehla eohle.”
Sechaba sohle sa re: “A ho ke ho be joalo! Bokang Morena!”
37Eaba Davida o bea Asafo le bana babo kapele ho areka ea selekane sa Morena, hore ba 'ne ba sebeletse teng, ho ea kamoo mosebetsi oa letsatsi ka leng o leng kateng. 38A bea Obede-Edomo le bana babo ba mashome a tšeletseng a metso e robeli hore ba ba thuse. Bo-Obede-Edomo, mora oa Jedutune, le Hosa ea e-ba balebeli ba monyako.
39Kapele ho tente ea Morena, pel'a aletare e sebakeng sa borapeli se Gibeone, Davida a bea moprista Sadoke le baprista ba bang ba habo hona teng, 40hore ba 'ne ba etsetse Morena linyehelo tsa secheso holim'a aletare ea nyehelo ea secheso hoseng le mantsiboea; ba etse tsohle tse ngotsoeng Molaong oa Morena, oo a neng a o laele Baiseraele. 41Ba ne ba e-na le Hemane le Jedutune, le bohle ba neng ba khethoe, ba boleloa ka mabitso, hore ba boke Morena, “hobane mohau oa hae ke oa kamehla eohle.” 42Bo-Hemane le Jedutune e ne e le bona ba okametseng baletsi ba literompeta, le ba matlheretlhere, le ba liletsa tse ling, tse neng li letsetsoa ho binela Molimo lifela. Bara ba Jedutune e ne e le balebeli ba monyako.
43Sechaba sohle sa qhalana, motho ka mong a ikela lapeng ha hae. Davida le eena a tsamaea ho ea hlohonolofatsa ba lelapa la hae.
