Areka ea selekane e tlosoa Kiriate-Jearime
1Davida a rerisana le balaoli ba bahlabani ba likete, le ba ba makholo, le mookameli e mong le e mong oa mabōtho. 2Eaba o re ho sechaba sohle sa Iseraele: “Haeba le rata, eba le Morena Molimo oa rōna oa rata, a re rōmeleng molaetsa hohle naheng ea Iseraele, moo bana babo rōna ba ahileng teng; re o rōmele le ho baprista, le ho Balevi ba metseng le metsaneng, hore ba phuthehele koano. 3Joale re boele re late areka ea Molimo oa rōna, re e tlise koano, hobane mehleng ea Saule ha rea ka ra e natsa.” 4Sechaba sohle sa re se tla etsa joalo, hobane se ne se bona hore hoo ho lokile.
5Eaba Davida o khōbōkanya Baiseraele bohle, ho tloha nōkeng ea Shihore e Egepeta, ho ea fihla khorong ea Hamate, hore ba e'o lata areka ea Molimo, Kiriate-Jearime. 6Joale Davida le Baiseraele bohle ba nyolohela Baala, e leng hona Kiriate-Jearime e Juda, ho ea lata areka ea Morena Molimo, ea lutseng holim'a likerubime, e leng areka eo a tla khumamelloa ho eona.
7Ba bea areka ea Molimo holim'a kariki e ncha, ba e ntša ka tlung ea Abinadabe. Bo-Usa le Ako ba qhōba kariki eo. 8Davida le bohle ba ntlo ea Iseraele ba etsa motjeko ka sefutho se seholo, ba le kapele ho Molimo. Ba letsa liharepa, le likatara, le merōpa, le matlheretlhere, le literompeta.
9Ha ba fihla seotlong sa Kidone, Usa a nanabetsa letsoho, a tšoara areka, hobane lipholo li ne li khōthōmetseha. 10Bohale ba Molimo ba tlōkōmela Usa, 'me Morena a 'molaea, hobane o ne a ile a ama areka. A shoela hona moo, kapele ho Molimo.
11Davida a tšoenyeha haholo, hobane Morena o ne a bolaile Usa; ka baka leo, eaba sebaka seo se reoa lebitso la Kotlo ea Usa, 'me le kajeno-ea-bokajeno se ntse se bitsoa joalo.
12Ka lona letsatsi leo, Davida a tšaba Molimo, 'me a re: “Ekaba areka ea Molimo ke tla e isa joang ha ka?” 13Eaba Davida ha a sa isa areka eo ha hae, Motseng oa Davida, o se a e isa tlung ea Obede-Edomo oa Mogate. 14Areka eo ea Molimo ea qeta khoeli tse tharo e le moo ha Obede-Edomo, ka tlung ea hae. Morena a hlohonolofatsa lelapa la Obede-Edomo le tsohle tseo a neng a e-na le tsona.
