SOFONEA 3

₁O malimabe motse oa Jerusalema,

motse oa batlatlapi,

motse oa bafetoheli o silafetseng!

₂Motse ona ha o mamele keletso,

khalemelo le eona ha o e amohele;

esita le Morena ha o mo tšepe,

ha o ikatametse ho Molimo oa oona.

₃Mahosana a oona

ke tau tse purumang,

baahlōli ba oona

ke phiri tse jang bosiu,

ere bo e-sa li be li jele li qetile.

₄Baporofeta ba oona ke baikakasi,

ke banna ba tletseng bolotsana;

baprista ba oona

ba silafalitse Sehalalelo,

molao le oona ba ba ba o tlōla.

₅Ho loka ha Morena

ho teng motseng ona,

ha a ka ke a etsa bokhopo ba letho.

Kamehla ha bo e-sa o liha kahlōlo,

kamehla ha bo e-sa ha a fose,

empa ea khopo

ha a hlajoe ke lihlong.

₆“Machaba 'ohle ke a timelitse,

qhobosheane tsa 'ona ka li heletsa.

Literata tsa 'ona li setse feela,

ha ho le ea mong

ea tsamaeang ho tsona.

Metse ea tsona eohle e ripitliloe,

ha ho sa na le motho,

ha ho sa na moahi.

₇Ka na ka bua

ho baahi ba motse, ka re:

‘Ruri le sa tla be le ntlhomphe,

le qetelle le mametse khalemo ea ka,

e le hore leaho la lōna le se ripitloe,

le kahlōlo tsa ka

li se le oele holimo.’

Empa ba 'na ba hahamala,

ba hahamala ho ea pele,

ba eketsa ketso

tse bolileng tsa bona.

₈Kahoo nkemeleng,”

ho rialo Morena,

“le nkemele ho fihlela ha ke le qōsa.

Ke na le morero

oa ho phutha lichaba,

oa ho li phutha le mebuso ea tsona,

ke hlatsetse khalefo ea ka

holim'a tsona,

e leng bohale ba ka

bo tukang malakabe.

Lefatše lohle

le tla timetsoa ka mollo,

ka mollo oa khalefo ea ka

ea ho boulela.

₉Mohlang oo ke tla felisa

puo tse mpe tsa lichaba,

bohle ba tle ba ipiletse ho Morena,

ba mo sebeletse ba le ntsoeleng.

₁₀Ho tloha ka nq'ane

ho nōka ea Kushe,

chaba sa ka se qhalakaneng

se tla nkhumamela,

se ntlisetse linyehelo.

₁₁Mohl'a tsatsi leo

ha u na ho ba lihlong

ka baka la ho ntšiteloa ha hao.

Ba ithorisang ka boikakaso ba hao

ke tla ba felisa kahare ho uena;

u ke ke ua hlola u ikhōhōmōsa,

u le thabeng ea ka e halalelang.

₁₂Chaba se mosa, se ikokobetsang,

se tla u salla se ntse se phela,

se ntse se phela, se tšepile Morena.

₁₃Masalla a Iseraele

a ke ke a etsa bokhopo,

leha e le hona ho bua mashano;

a ke ke a thetsa ka maleme a 'ona.

Masalla ao a tla fula, a bōthe,

ho se na ea ka hlolang a a

tšosa.”

₁₄Uena Morali oa Sione, bina haholo!

Uena Iseraele, hōoeletsa haholo!

Uena Morali oa Jerusalema,

thaba haholo,

ka pelo ea hao eohle,

nyakalla haholo!

₁₅Morena o felisitse kahlōlo ea hao,

o timelitse le tsona lira tsa hao.

Morena, Khosi ea Iseraele,

o na le uena,

ha u ka ke ua tšoha koluoa.

₁₆Mohl'a tsatsi leo

ba tla re ho Jerusalema:

“Uena Sione, u se ke be ua tšaba,

matsoho a hao a fele a tiee!

₁₇Morena Molimo oa hao,

o na le uena,

ke senatlahali se tla u loanela.

O tla u thabela ka nyakallo,

a u rate ka lerato la sebele,

a hōoeletse, a u hlabele melilietsane,

a e hlabe

sa mohl'a tsatsi la mokete.”

₁₈“Ke tla phutha

ba neng ba llela mekete,

ba llela mekete e halalelang,

e leng ba neng ba le hōle,

hōle le uena,

ba neng ba jere sekhobo sa hao.

₁₉Mohl'a tsatsi leo ke tla otla,

ke otle bohle ba u hateletseng;

ke tla pholosa ba holofetseng,

ke phuthe ba neng ba qhalakane.

Hohle moo ba neng

ba tlontlōlōtsoe teng,

thabo le tlōtla li tla ba aparela.

₂₀Mohl'a tsatsi leo

ke tla le khōbōkanya,

ke le khōbōkanye, le khutlele hae.

Thabo le tlōtla li tla le aparela,

le le har'a chaba tsohle tsa lefatše,

mohla ke le khutlisetsang

ha habo lōna,

ke le khutlisa le ntse le talimile,”