Boipiletso ba hore sechaba se bake
1“Lōna chaba se hlabisang lihlong,
phuthehang, le khōbōkane,
2nako e boletsoeng e e-s'o fihle,
tsatsi leo le le fefōla sa 'mōkō;
pele khalefo ea Morena e le fihlela,
tsatsi la khalefo ea Morena
le le chabela.
3Lōna ba ikokobetsang ba lefatše,
lōna ba mamelang taelo ea Morena,
batlang Morena, le 'matlisise.
Batlang ho loka,
le batle boikokobetso;
mohlomong le ka sireletseha
mohl'a tsatsi la khalefo ea Morena.”
Morena o tla otla Bafilesita
4“Baahi ba Gasa ba tla e baleha,
Ashekelone e sale e le masupi.
Baahi ba Ashedode
ba tla phalalisoa,
ba phalalisoe
har'a motšeare oa lengeta,
Ekerone eona ebe ea ripitloa.
5Le malimabe lōna
ba ahileng bōpong la leoatle,
le malimabe lōna chaba sa Bakerete!
Morena ke eena ea u qōsang,
uena Kanana, naha ea Bafilesita,
ke tla u ripitla,
ho b'o hlokoe le masalla.
6Naha e bōpong la leoatle
e tla ba makhulo,
e tla ba ea balisa le ea meraka.
7E tla ba ea masalla
a ba ntlo ea Juda,
moo a alosetsang
mehlape ea 'ona teng.
Mantsiboea a tla botha
ka matlung a Ashekelone,
Morena Molimo oa 'ona,
a a baballe,
a a buseletse boiketlo ba 'ona.”
Kahlōlo ea Bamoabe le Baamone
8“Mahlapa a Bamoabe ke a utloile,
nyefōlo tsa Baamone
le tsona ka li utloa,
ka utloa ha ba hlapaola chaba sa ka,
ba ithorisetsa
ho kena meeling ea sona.
9Ka baka leo, kea hlapanya,”
ho rialo Morena oa mabōtho, Morena Molimo oa Iseraele.
“Moabe e tla ba joaloka Sodoma,
Amone eona e be joaloka Gomora,
naha e tletseng bobatsi
le macheko a letsoai,
naha e fetohileng nanaola
ea mehla eohle.
Masalla a chaba sa ka a tla e lobela,
ba phonyohileng ba chaba sa ka
ba e hape.
10Ona ke moputso
oa boikhōhōmōso ba bona,
kaha ba hlapaotse chaba
sa Morena oa mabōtho,
ba se hlapaola ba ba ba ithorisa.
11Ho bona Morena o tla tšabeha,
a felise melingoana eohle ea lefatše.
Chaba tsohle tse mabōpong
li tla mo khumamela,
motho ka mong
a mo khumamele a le ha habo.”
Kahlōlo ea Bakushe
12“Le lōna Bakushe
le tla timetsoa,
sabole ea Morena e le bolaee.”
Kahlōlo ea Baasiria
13Morena o tla otlolla tsoho la hae,
a le otlollele lebōea,
a le otlolle, a timetse Asiria,
a timetse Ninife, e fetohe nanaola,
e sale e omeletse e ka lehoatata.
14Mohlape o tla bōtha hona moo,
le phoofolo tsa naha
ka mefuta ea tsona.
Sephōōkō le sephōōkoana
li tla robala teng,
li robale kaholim'a litšiea,
tšiea tse ntseng li eme;
bo-makhohlo ba hihitse
ba le lifesetereng,
kupukupu ea mobu
e thibile menyako,
hobane kedare tsa eona
li tla be li oele.
15Ke oona motse oane o motlehali,
o neng o ituletse ka khotso,
o neng o ikhōhōmōsa ka ho re:
“Ke 'na feela, ha ho na e mong.”
O fetohile lesupi le lekaakang!
O fetohile letsaba la libatana!
Bo-mofeta-ka-tsela baa o makalla,
ba letsa mololi, ba opa liatla!
