SAKARIEA 7

₁Ka selemo sa bone sa puso ea khosi Dariuse, Morena a boela a bua ho Sakariea. E ne e le ka letsatsi la bone la khoeli ea borobong, e leng ea Pulungoana. ₂Baahi ba Bethele ba ne ba ile ba rōma bo-Saresere le Regeme-Meleke, ba e-na le batho ba bona, ho ea rapela Morena, ₃le ho ea botsa baprista ba Tempele ea Morena oa mabōtho, le baporofeta, ba re: “Na re tšoanela ho lla le ho itima lijo ka khoeli ea bohlano, joalokaha re 'nile ra etsa ka lilemo tse ngata-ngata?”

₄Eaba Morena oa mabōtho o bua ho 'na, o re: ₅“Ak'u botse sechaba sohle sa naha ena, le baprista, u re: ‘Ha le ne le itima lijo, le bina koli-ea-malla ka khoeli ea bohlano le ea bosupa, ka lilemo tse mashome a supileng, na le ne le hlile le itima ka baka la ka? ₆Na ha le ne le e-ja, le enoa, le ne le sa itjelle le ho inoella e le lōna? ₇Na see hase sona seo Morena a neng a se bolele ka baporofeta ba boholo-holo, mehleng ea ha Jerusalema e sa na le baahi, 'me e atetsoe ke nala, eona le metse e e pota-potileng, le naha e ka Boroa le e liphuleng?’ ”

₈Morena oa mabōtho a boela a bua ho Sakariea, a re: ₉“Morena oa mabōtho o bua tjena: ‘Ahlōlelanang ka toka, le be mosa, 'me le utloelane bohlōkō. ₁₀Le se ke la hatella mohlolohali, leha e le khutsana, molichaba kapa mofutsana. Motho a se ke a rèrèla ngoan'abo bokhopo.’

₁₁“Empa sechaba se ile sa hana ho 'mamela; sa e-ba manganga; sa ithiba litsebe. ₁₂Sa thatafatsa lipelo tsa sona joaloka lejoe la moralla, e le hore se se ke sa utloa molao le lipolelo tseo Morena oa mabōtho a neng a se boleletse tsona ka Moea oa hae, ka baporofeta ba mehleng ea boholo-holo. Kahoo Morena oa mabōtho o ile a halefa haholo.

₁₃“ ‘Joalokaha ba sa ka ba mamela ha ke ne ke ba bitsa, le 'na ha kea ka ka ba mamela ha ba ipiletsa ho 'na,’ ho rialo Morena oa mabōtho. ₁₄‘Ka sefefo ke ile ka ba qhalanyetsa linaheng lisele, moo ba sa tsejoeng. Ba siea naha ea bona e le nanaola, e se na baahi. Naha ea bona e ntle ea fetoha nanaola joalo.’ ”