SEFILA SA LIFELA 6

₁Moratuoa oa hao o ile kae,

uena Seilatsatsi

har'a basali ba bang?

Moratuoa oa hao o nkile efe tsela,

re tle re tsebe ho u batlisa eena?

₂Moratuoa o theohetse

ka rapeng sa hae,

ka ratsoaneng se metseng linōko,

ho ithabisa ka serapeng

le ho kha mehalalitoe.

₃Moratuoa ke oa ka,

le 'na ke oa hae,

o fulisa mohlape oa hae,

o o fulisa mehalalitoeng.

₄U motle, moratuoa,

u tšoana le Tiresa,

u rateha joaloka Jerusalema,

u boheha sa mabōtho

a tšoere mekhèlè.

₅Tlohela ho ncheba, u shebe hosele,

mahlo a hao a mpakela pherekano.

Moriri oa hao

o ka mohlape oa lipoli

ha li lepella Thabeng ea Gileade.

₆Meno a hao a ka mohlape oa linku

li nyoloha

moo li tsoa hlatsuoa teng;

thojana ka seng se tsoetse mafahla,

ha ho le se seng sa tsona

se sa tsoalang.

₇Marama a hao

a koahetsoeng ke lesira,

a tšoana le khèkhè ea kharenate.

Kharenate e petsotsoe.

₈Mafumahali

a ka ba mashome a tšelela,

basali ba mafielo

ea e-ba mashome a le robeli,

baroetsana

ea e-ba boieane, ntlhoka-palo;

₉empa leebana la ka,

pabala ea ka, ke lona feela,

ke morali oa 'm'ae

ea tsoetsoeng a le inotši,

thatohatsi ea mosali

ea ileng a 'meleha.

Baroetsana ha ba 'mona

ba re o hlohonolo,

mafumahali le basali ba mafielo

baa mo rorisa.

₁₀Ke mang eo ea hlahang eka mafube,

ea lereli joaloka khoeli,

ea khanyang seka letsatsi,

ea bohehang sa mabōtho

a tšoere mekhèlè?

₁₁Ka theohela ka serapeng

sa fate tsa litholoana,

ho hlahloba

tse melang bocha kahar'a khohlo,

ho bona hore na morara o s'o fupile,

na likharenate tsona li se li thuntse.

₁₂Eare ke e-s'o ka ke ela hloko,

ka ikutloa eka ke moholo

ho feta khosana,

khosana e busang boieane

ba sechaba se eona.

₁₃Khutla! Khutla!

Mosetsan'a Moshulame!

Khutla! Khutla!

Re tsebe ho u talima!

Le talimela'ng

mosetsan'a Moshulame,

sa ha le talima mabōtho

a teanya lithekō?