SEFILA SA LIFELA 5

₁Ke tlile rapeng sa ka,

uena khaitseli,

monyaluoa oa ka,

ke ikheletse 'mira,

'moho le linōko tsa ka;

ke jele mahe a linotši,

'moho le khèkhè ea 'ona,

ke noele veine ea ka

le lona lebese la ka.

Jang, le noe, lōna metsoalle,

le noe haholo, lōna baratuoa!

₂Leha ke ne ke robetse,

pelo ea ka e n'e hlobaela,

ka utloa moratuoa

a kokota monyako, a re:

“Mpulele khaitseli, moratuoa oa ka,

leebana la ka, pabala ea ka;

hlooho ea ka e metsi

ke ho laloa ke phōka,

moriri oa ka o mongobo

ke lesoe la bosiu.”

₃“Aparo sa ka ke se ke se hlobotse,

na nka boela ka se apara?

Maoto a ka le 'ona

ke se ke a hlatsoitse,

na nka boela ka a silafatsa?”

₄Ha moratuoa a tšoara lemati,

a le tšoara ho bula,

pelo ea ka ea thanya

ha ke mo hopola.

₅Ka tsoha

ho bulela moratuoa monyako,

'mira o rotha matsohong a ka,

menoana le eona e rotha 'mira,

ha ke tšoara mohele oa lemati

ke bula.

₆Moratuoa oa ka

ka 'mulela monyako,

athe moratuoa o s'a fetile, a ile.

Ha a bua ka khathala matla,

ka 'matla, ka se ke ka mo fumana,

ka 'mitsa, empa a se k'a nkaraba.

₇Balebeli ha ba pota le motse

ba mphumana,

ba nteteka, ba ntlatsa matōma;

balebeli bao ba holim'a marako,

ba ntlhōthōlōtsa seaparo sa ka!

₈Lōna barali ba Jerusalema

kea le laea:

Ha le fumana moratuoa

le tla re'ng ho eena?

'Molelleng hore rato lena

lea nkulisa.

₉Moratuoa oa hao

o feta ba bang ka eng,

uena Seilatsatsi

har'a basali ba bang?

Moratuoa oa hao

o feta ba bang ka eng,

hoo u ka re laeang

ka mokhoa o tjee?

₁₀Moratuoa o lereli,

mali a thōpōhetse letlalong,

ke eena pabala

har'a ba kete li shome;

₁₁hlooho ea hae

e ka khauta e hloekisitsoe,

moriri o ririetse,

o motšo sa mokhoabane.

₁₂Mahlo a hae a mapulutsoana,

sa maebana-khoroana a linōkana,

a lutse pela metsi

e ka a hlatsoitsoe ka lebese.

₁₃Marama a hae

a ka rapa se metse linōko,

rapa sa litlama

li le monko o monate;

melomo ea hae

e ka mehalalitoe,

mehalalitoe

e rothang lero la 'mira.

₁₄Matsoho a hae

a ka mehōlōko ea khauta,

mehōlōko e khabisitsoeng

ka lejoe la Tarashishe;

'mele oa hae

o benya sa manaka a tlou,

manaka a tlou

a khabisitsoe ka lisafire.

₁₅Tlhafu tsa hae

li tšoana le tšiea tsa mahakoe,

tse holim'a tšehetso tsa khauta

e hloekisitsoe;

bōpeho sa hae

se khahleha sa naha ea Lebanone,

se khethehile

joaloka kedare tsa Lebanone.

₁₆Polelo tsa hae

tsona ke tse mathe-maloli,

athe ha e le eena ke tjaka,

oa rateha.

Enoa ke eena moratuoa oa ka,

enoa ke eena motsoalle oa ka,

lōna barali ba Jerusalema.