SEFILA SA LIFELA 2

₁'Na ke palesa ea Sharone,

mohalalitoe o melang likhohlong.

₂Ha moratuoa a le har'a baroetsana,

o ka mohalalitoe har'a meutloa.

₃Ha moratuoa a le har'a bahlankana,

o ka fate sa apole

har'a fate tsa meru.

Ke thabela ho phomola

moriting oa hae;

tholoan'a hae ea hlabosa

ha ke e latsoa.

₄O nkisitse tlung ea boithabiso,

tlung ea lino,

a ntšireletsa ka mokhele

oa lerato la hae.

₅'Matlafatseng

ka mangangajane a morara,

le nkhatholose

ka ho mpha liapole,

hoba rato ke lena

le mphokolisitse.

₆Ke samme tsoho la hae

le letšehali,

ka tsoho la hae le letona

o nkopile.

₇Lōna barali ba Jerusalema

kea le laea,

ke le laea ka litšèpè

le ka likhama tsa naha:

Le se tsose moratuoa oa ka

kapa la mo sisinya,

ho fihlela eena

a ka rata ho tsoha.

₈Ke utloa lentsoe la moratuoa,

lentsoe ke leo!

Ke eo a e-tla

a tlōla holim'a lithaba,

a nts'a laqōma holim'a maralla.

₉Moratuoa o tšoana le tšèpè

kapa namane ea khama;

'moneng ke eo

a eme kamora' lerako,

a shebile ka fesetere,

a hloelisa le ka liphēra.

₁₀Joale moratuoa o bua le 'na, o re:

“Ema, uena moratuoa oa ka,

uena botlenyana oa ka,

itlèlè re tsamaee.

₁₁Bona, mariha a s'a fetile,

pula le tsona li khaolitse.

₁₂Palesa li fupuhile har'a mohlaba,

nako ea ho bina e s'e fihlile,

kunkuru ea maebana-khoroana,

e utloahala naheng ea heso.

₁₃Sefate sa feiee

se beha tholoana tsa sona,

morara oa thunya,

ho nkha hamonate.

Ema, uena moratuoa oa ka,

uena botlenyana oa ka,

itlèlè re tsamaee.”

₁₄Uena leebana la ka

le ipatileng mafarung,

le ipatileng methating,

tsullung tsa lithaba,

ak'u mpontše fahleho sa hao,

ntsoe la hao le lona ke le utloe,

ntsoe la hao ho 'na lea hohela,

hoba fahleho sa hao

ho 'na sea rateha.

₁₅Re tšoasetseng liphokojoe

le liphokojoana,

tsona tse senyang

masimo a rōna a morara,

hoba joale morara oa rōna

o thuntse.

₁₆Moratuoa ke oa ka,

le 'na ke oa hae,

o fulisa mohlape oa hae,

o o fulisa mehalalitoeng.

₁₇Tsatsi le e-s'o chabe,

meriti e e-s'o honyele,

khutla, uena moratuoa,

u tlōle joaloka tšèpè,

kapa namane ea khama

har'a lithaba tse matsaranka.