Litholoana tsa tokafatso
1Joale, erekaha re lokafalitsoe ka tumelo, re na le khotso le Molimo ka Morena oa rōna Jesu Kreste. 2Ke ka eena re bileng le hona ho amoheloa ka baka la tumelo mohaung ona oo re leng ho oona, 'me re motlōtlō ka ho ba le tšepo ea ho abeloa tlōtla ea Molimo. 3Ho feta mona, re motlōtlō le har'a matšoenyeho, ka ho tseba hore matšoenyeho a hlahisa mamello, 4mamello ke bopaki ba hore re amohelehile, ho amoheleha hoo ho hlahisa tšepo, 5'me tšepo eo ha e soabise, hobane lipelo tsa rōna li tlatsitsoe lerato la Molimo ke Moea o Halalelang oo re o neiloeng.
6Efela ha re ne re sa ntse re fokola, Kreste o ile a shoela ba khopo, ka nako e beiloeng. 7Ho thata hore motho a shoele ea lokileng; mohlomong motho a ka beta pelo ho shoela ea molemo, 8empa Molimo o bontšitse lerato la hae ho rōna, ka hore Kreste a re shoele ha re ne re sa le baetsalibe.
9Erekaha joale re lokafalitsoe ka mali a hae, re tla pholosoa ka eena bohaleng ba Molimo ho feta hakaakang! 10Haeba re boelantsoe le Molimo ka lefu la Mora oa hae, ha re ne re sa ntse re le lira tsa Molimo, re tla pholosoa ho feta hakaakang ka bophelo ba Kreste, ha re se re boelantsoe le Molimo! 11Ho feta mona, re ithorisa ka Molimo, ka baka la Morena oa rōna Jesu Kreste, eo joale re fumaneng poelano ka eena.
Adama le Kreste
12Sebe se kene lefatšeng ka motho a le mong, le lefu le kene ka sebe; ka mokhoa o joalo lefu le fetetse ho batho bohle, hobane bohle ba entse sebe. 13Le pele Molao o e-ba teng, sebe se ne se se se le teng lefatšeng, empa sebe ha se baloe e le sebe ha molao o le sieo. 14Leha ho le joalo, lefu le ile la busa ho tloha ho Adama ho fihlela ho Moshe, esita le holim'a ba sa kang ba etsa sebe ka tšito e tšoanang le ea Adama. Adama eo o tšoantša ea neng a tla tla.
15Empa mpho ea mohau ha e joaloka tšito, hobane ha e le moo bohle ba ile ba shoa ka tšito ea motho eo a le mong, mohau oa Molimo le mpho e filoeng bohle ka mohau oa motho a le mong, e leng Jesu Kreste, tsona li kholo ho feta hakaakang! 16Hape mpho eo ha e tšoane le sebe sa motho eo a le mong, Adama, hobane kahlōlo e latetseng sebe seo se le seng e bile kotlo, athe mpho ea mohau e latetseng litšito tse ngata e bile tokafatso. 17Ha e le mona, ka tšito ea motho a le mong, e leng Adama, lefu le qalile ho busa ka baka la motho eo a le mong feela, ba amohelang mohau o mongata le mpho e kholo ea ho loka, bona ba tla busa ho feta hakaakang bophelong, ka baka la motho a le mong, Jesu Kreste!
18Joalokaha bohle ba ahlōtsoe ka baka la tšito ea motho a le mong, ka mokhoa o joalo bohle ba lokafatsoa le ho phelisoa ka ketso e lokileng ea motho a le mong. 19Joalokaha ba bangata ba entsoe baetsalibe ka ho se mamele ha motho a le mong, ka mokhoa o joalo ba bangata ba tla etsoa ba lokileng ka ho mamela ha motho a le mong.
20Molao o ile oa e-ba teng hore tšito e tle e ate, empa moo sebe se atileng teng, mohau o ba mongata ka ho fetisisa. 21Ka baka leo, joalokaha sebe se ile sa busa ka lefu, ka mokhoa o joalo mohau o busa ka ho loka ho isang bophelong bo sa feleng, ka Jesu Kreste, Morena oa rōna.
