Se ikhahlise, khahlisa oa heno
1Rōna ba matla tumelong, re tšoanetse ho jarela ba fokolang mefokolo ea bona e seng ho ikhahlisa. 2E mong le e mong oa rōna a khahlise oa habo ka tse isang botleng, ho mo matlafatsa tumelong. 3Le Kreste ha aa ka a ikhahlisa, empa ho bile joalokaha ho ngotsoe, ho thoe:
“Linyefolo tsa ba u nyefolang,
le 'na li nkoetse holimo.”
4Tsohle tse ngotsoeng khale li ngoletsoe ho re ruta, hore ka ho mamella le ho tšelisoa ho fumanoang Mangolong, re tle re be le tšepo.
5Joale Molimo ea re fang mamello le matšeliso a ke a le nee maikutlo a le mang ho ea ka thato ea Kreste Jesu, 6e le hore le tle le tlotlise Molimo, Ntat'a Morena oa rōna Jesu Kreste, le le pelonngoe le ntsoeleng.
Molaetsa o molemo ke oa Bajuda le balichaba
7Ka baka leo, amohelanang, joalokaha Kreste le eena a le amohetse tlotlisong ea Molimo. 8Kea le bolella, ke re, Kreste e bile mosebeletsi oa Bajuda ho bontša hore Molimo o na le 'nete, hore a tiise litšepiso tse etselitsoeng bo-ntat'a rōna, 9'me balichaba ba tle ba tlotlise Molimo ka baka la mohau oa hae, joalokaha ho ngotsoe, ho thoe:
“Ka baka leo,
ke tla u boka har'a balichaba,
ke roke lebitso la hao.”
10Hape ho thoe:
“Nyakallang, lōna balichaba,
'moho le sechaba sa hae.”
11Ho bile ho thoe:
“Rorisang Morena,
lōna balichaba bohle,
mo tlotliseng,
lōna merabe eohle.”
12Esaea le eena o re:
“Ho tla tla setlōhōlō sa Jese,
se tla beoa ho busa balichaba,
'me balichaba ba tla se tšepa.”
13Joale Molimo ea re fang tšepo a ke a le tlatse ka thabo eohle le ka khotso ka baka la ho lumela ho eena, hore le tle le ateloe ke tšepo ka matla a Moea o Halalelang.
Borōmuoa ba Paulosi
14Bana beso, 'na ke kholisehile hore lōna le molemo, le na le tsebo eohle le matla a ho eletsana. 15Empa likarolong tse ling ke le ngoletse ke sa tšabe ho le hopotsa litaba tse ling, ka baka la mohau oo ke o neiloeng ke Molimo, 16oa hore ke be mosebeletsi oa Kreste Jesu har'a balichaba. Ka ho bolela molaetsa o molemo oa Molimo ke phetha mosebetsi oa boprista, hore balichaba e tle e be nyehelo e amohelehang ho Molimo, e halalelitsoeng ke Moea o Halalelang.
17Ka baka leo, nka ithorisa ka Kreste Jesu tšebeletsong ea Molimo. 18Nke ke ka ba sebete ho bua ka letho haese ka tseo Kreste a li sebelitseng ka 'na, ka lipolelo le ka liketso, hore balichaba ba mamele Molimo. 19Tsena li tlile ka matla a mehlolo le a limakatso, ka matla a Moea oa Molimo. Ka tsela eo ke phatlalalitse molaetsa o molemo oa Kreste ka botlalo, ho tloha Jerusalema, ke potoloha, ke ea fihla Ilōrikone. 20Leha ho le joalo, ke ile ka pheella ho bolela molaetsa o molemo moo lebitso la Kreste le e-song ho boleloe teng, hore ke se ke ka haha holim'a mothèo oa e mong, 21empa e le joalokaha ho ngotsoe, ho thoe:
“Ba tla be ba bona
seo ba e-s'ong ho se bolelloe;
seo ba e-s'ong ho se utloe
ba tla se utloisisa.”
Morero oa Paulosi oa ho etela Roma
22Ke lona lebaka le nthibetseng hangata ho le etela. 23Empa joale ke phethile mosebetsi oa ka libakeng tsena, 'me erekaha e se e le lilemo tse ngata ke ntse ke lakatsa ho le etela, 24ke tšepile ho le bona ha ke etela Sepania, le tle le nthuse ho ea teng, ha ke se ke ithabisitse ka ho ba le lōna nako e itseng. 25Hona joale ke sa ea Jerusalema ho ea sebeletsa balumeli ba teng, 26hobane ba Masedonia le ba Akaea ba ikemiselitse ho kenya letsoho thusong e etsetsoang balumeli ba futsanehileng ba Jerusalema. 27Ba ikemiselitse ho etsa joalo, etsoe ba ne ba tlamehile ho etsa joalo, hobane ha Bajuda ba ile ba arolelana tsa moea le balichaba, eka khona le balichaba ba sebeletse Bajuda ka tsa lefatše lena. 28Ha ke se ke phethile hona, 'me ke ba neile koleke eo, ke tla tla feta le ho lōna, ha ke e-ea Sepania. 29Kea tseba hore, mohla ke le etelang, ke tla tla ka mahlohonolo 'ohle a Kreste.
30Bana beso, ka Morena oa rōna Jesu Kreste le ka lerato la Moea, kea le rapela hore le nthuse ka ho nthapella ho Molimo, 31hore ke tle ke sireletsoe ho ba sa lumeleng, ba Judea, 'me lithuso tseo ke li isang Jerusalema li tle li amohelehe ho balumeli. 32Ha ho ka ba joalo, ke tla le etela ke thabile, ke khatholohe le lōna, ha Molimo a rata. 33Joale Molimo ea re fang khotso a ke a be le lōna bohle. A ho be joalo!
