Ho tšoauoa ba 144 000 ba bana ba Iseraele
1Kamorao ho tsena ka bona mangeloi a mane a eme liqoleng tse 'ne tsa lefatše, a thibile meea e mene ea lefatše, e le hore ho tle ho se be moea o fokang lefatšeng, kapa leoatleng, kapa sefateng sefe kapa sefe. 2Eaba ke bona lengeloi le leng le nyoloha bochabela, le tšoere letšoao la Molimo ea phelang. Ka lentsoe le phahameng la hōoeletsa mangeloi a mane a neiloeng matla a ho senya lefatše le leoatle, 3la re: “Le se ke la senya lefatše, kapa leoatle, kapa lifate, re e-s'o ka re tšoaea bahlanka ba Molimo oa rōna liphatleng tsa bona.” 4Ka utloa ho boleloa palo ea ba tšoailoeng e le ba likete tse lekholo le mashome a mane a metso e mene, ba tsoang melōkong eohle ea bana ba Iseraele.
5Lelōkong la Juda ho ne ho tšoailoe
ba likete tse leshome le metso e 'meli;
lelōkong la Rubene, ba likete tse
leshome le metso e 'meli;
lelōkong la Gade, ba likete tse
leshome le metso e 'meli;
6lelōkong la Asere, ba likete tse
leshome le metso e 'meli;
lelōkong la Nafthali, ba likete tse
leshome le metso e 'meli;
lelōkong la Manase, ba likete tse
leshome le metso e 'meli;
7lelōkong la Simeone, ba likete tse
leshome le metso e 'meli;
lelōkong la Levi, ba likete tse
leshome le metso e 'meli;
lelōkong la Isakare, ba likete tse
leshome le metso e 'meli;
8lelōkong la Sebulone, ba likete tse
leshome le metso e 'meli;
lelōkong la Josefa, ba likete tse
leshome le metso e 'meli;
lelōkong la Benjamine, ba likete tse
leshome le metso e 'meli.
Letšoelehali le tsoang lichabeng tsohle
9Kamorao ho tsena ka talima, 'me ka bona letšoelehali leo ho neng ho se motho ea ka le balang. E ne e le ba mefuta eohle, le ba melōko eohle, le ba lichaba tsohle, le ba lipuo tsohle, ba eme kapele ho terone le kapele ho Konyana, ba apere liaparo tse tšoeu, ba tšoere makala a lipalema matsohong a bona. 10Ba ne ba hōoa ka mantsoe a phahameng, ba re:
“Tlhōlo ke ea Molimo oa rōna
ea lutseng teroneng,
le ea Konyana.”
11Mangeloi 'ohle a neng a eme, a pota-potile terone, le baholo, le libōpuoa tse 'ne tse phelang, a itihela fatše ka lifahleho, a khumamela Molimo, 12a re:
“Amen. Thoriso, le tlōtla,
le bohlale, le teboho, le hlompho,
le borena, le matla
li ke li be ho Molimo oa rōna
kamehla le mehla! Amen.”
13Joale e mong oa baholo a mpotsa, a re: “Ke bo-mang baa ba apereng liaparo tse tšoeu? Ba tsoa kae?”
14Ka mo araba, ka re: “Monghali, ho tseba uena.”
A re ho 'na: “Ke ba tsoang matšoenyehong a maholo. Ba hlatsoitse liaparo tsa bona, 'me ba li soeufatsa ka mali a Konyana.
15“Ke ka lebaka leo ba emeng
kapele ho terone ea Molimo,
'me ba mo sebeletsa
motšeare le bosiu
ka tempeleng ea hae.
Ea lutseng teroneng
o tla ba sireletsa
leahong la hae.
16Ha ba ka ke ba hlola ba lapa
kapa ba nyoroa;
ha ba sa tla chesoa ke letsatsi,
kapa lebatama lefe kapa lefe,
17hobane Konyana
e bohareng ba terone
e tla ba lisa,
e ba ise lilibeng
tsa metsi a bophelo.
Molimo o tla hlakola
meokho eohle mahlong a bona.”
