Molaetsa o eang Saredeise
1“Ngolla moruti oa kereke e Saredeise, u re:
“Tsena li boleloa ke ea nang le meea e supileng ea Molimo, le linaleli tse supileng, o re: Ke tseba mesebetsi ea hao, le hore u tumme ka hore ua phela, athe u shoele. 2Falimeha, 'me u matlafatse se ntseng se u saletse, se e-s'o ka se shoella ruri, hobane ha kea ka ka fihlela mesebetsi ea hao e phethehile mahlong a Molimo oa ka. 3Hopola hè, kamoo u ileng ua amohela seo u se utloileng kateng; se bōlōke, 'me u bake. Haeba u sa falimehe, ke tla tla ho uena joaloka lesholu, 'me ha u ka ke ua tseba nako eo ke tla tla ho uena ka eona.
4“Leha ho le joalo, u sa na le ba seng bakae Saredeise ba sa kang ba silafatsa liaparo tsa bona. Ba tla mphelehetsa ba apere liaparo tse tšoeu, hobane ba lokeloa ke hona.
5“Ea hlōlang ke eena ea tla apesoa liaparo tse tšoeu; ha nka ke ka hlakola lebitso la hae bukeng ea bophelo, 'me ke tla mo paka pel'a Ntate le pel'a mangeloi a hae.
6“Ea nang le litsebe a ke a utloe seo Moea o Halalelang o se bolellang likereke.”
Molaetsa o eang Filadelfia
7“Ngolla moruti oa kereke e Filadelfia, u re:
“Tsena li boleloa ke Ea Halalelang,
ea nang le 'nete,
ea tšoereng senotlolo sa Davida,
ha a butse,
ha ho ea tla koala,
ha a koetse,
ha ho ea tla bula;
8“o re: Ke tseba mesebetsi ea hao. Bona, ke butse monyako kapel'a hao, oo ho seng ea ka o koalang. Ke tseba hore u na le matlanyana feela, empa u ile ua bōlōka lentsoe la ka, 'me ha ua ka ua latola lebitso la ka.
9“Bona, ke tla u neela ba bang bao e leng ba phutheho ea Satane, ba reng ke Bajuda, empa e se bona, ba le leshano. Ke tla etsa hore ba tl'o khumama maotong a hao, 'me ba tla tseba hore ke u ratile. 10Kahobane u ile ua bōlōka lentsoe la ka ka mamello, le 'na ke tla u bōlōka ka nako ea ho lekoa ho tlang ho hlahela lefatše lohle, ho leka baahi ba lefatše.
11“Ke tla tla kapele. Khomarela ho seo u nang le sona, e le hore ho tle ho se be ea ka u amohang mofapahlooho oa hao.
12“Ea hlōlang ke tla mo etsa tšiea ka tempeleng ea Molimo oa ka, 'me ha a ka ke a hlola a e-tsoa ho eona. Holim'a hae ke tla ngola lebitso la Molimo oa ka, le lebitso la motse oa Molimo oa ka, e leng Jerusalema e ncha, e theohang leholimong ho Molimo oa ka, le lebitso la ka le lecha.
13“Ea nang le litsebe a ke a utloe seo Moea o Halalelang o se bolellang likereke.
Molaetsa o eang Laodisea
14“Ngolla moruti oa kereke e Laodisea, u re:
“Tsena li boleloa ke Amen, eo e leng paki e tšepahalang, ea 'nete, mohloli oa tsohle tse bōpiloeng ke Molimo, 15o re: Ke tseba mesebetsi ea hao; ha u bate, ha u chese. Hoja u n'u bata kapa u chesa! 16Erekaha u le fōōfō, u sa bate, u sa chese, ke tla u hlatsa ka molomo oa ka.
17“U re: ‘Ke morui, ke ruile, ha ke hloke letho,’ empa ha u tsebe hore u sōtō, u malimabe, u futsanehile, u foufetse, 'me u feela. 18Joale ke u eletsa hore u ithekele ho 'na khauta e hloekisitsoeng mollong, e le hore u tle u rue. U ithekele le liaparo tse tšoeu, e le hore u ikapese, bofeela ba hao bo lihlong bo tle bo se ke ba bonahala. U ithekele le setlolo sa mahlo, e le hore u tle u boele u bone.
19“Bohle bao ke ba ratang kea ba khalemela, 'me kea ba otla. Cheseha hè, 'me u bake. 20Bona, ke eme monyako, 'me kea kokota. Haeba motho a ka utloa lentsoe la ka, 'me a mpulela, ke tla kena ha hae, ke je le eena, le eena a je le 'na.
21“Ea hlōlang ke tla mo nea tokelo ea ho lula le 'na teroneng ea ka, joalokaha le 'na ke hlōtse, 'me ke lutse le Ntate teroneng ea hae.
22“Ea nang le litsebe a ke a utloe seo Moea o Halalelang o se bolellang likereke.”
