Mafisoana a supileng a tletseng khalefo ea Molimo
1Joale ka utloa lentsoe le phahameng, le tsoang tempeleng le re ho mangeloi a supileng: “Tsamaeang, le e'o qhalla lefatšeng mafisoana a supileng, a tletseng khalefo ea Molimo.”
2La pele la tloha, la qhalla lefisoana la lona lefatšeng, 'me liso tse mpe-mpe tsa bereha batho ba nang le letšoao la sebatana, ba khumamelang setšoantšo sa sona.
3Lengeloi la bobeli la qhalla lefisoana la lona leoatleng, 'me leoatle la fetoha mali a kang a motho ea qetang ho shoa. Eaba lintho tsohle tse phelang leoatleng lia shoa.
4Lengeloi la boraro la qhalla lefisoana la lona linōkeng le lilibeng, 'me metsi a tsona a fetoha mali. 5Ka utloa lengeloi le laolang metsi le re:
“Uena ea leng teng,
ea bileng teng,
Ea Halalelang, u Ea Lokileng,
hobane u ahlōtse tjena.
6Ba tšolotseng mali
a bahalaleli le a baporofeta,
u ba noesitse mali;
hona ho ba loketse.”
7Joale ka utloa aletare e re:
“E, Morena Molimo
ea matla 'ohle,
likahlōlo tsa hao
ke tsa 'nete, li lokile.”
8Lengeloi la bone la qhalla lefisoana la lona holim'a letsatsi, 'me letsatsi la lumelloa ho chesa batho ka lebatama. 9Batho ba chesoa ke lebatama le leholo, 'me ba nyefola lebitso la Molimo ea nang le matla holim'a likotlo tsena, empa ha baa ka ba baka, hore ba tle ba mo tlotlise.
10Lengeloi la bohlano la qhalla lefisoana la lona holim'a terone ea sebatana, 'me 'muso oa sona oa fifala; batho ba itōma maleme ke ho hlōkōfatsoa. 11Ba nyefola Molimo oa leholimo ka baka la mahlōkō le liso tsa bona, empa ha baa ka ba bakela mesebetsi ea bona.
12Lengeloi la botšelela la qhalla lefisoana la lona holim'a nōka e kholo ea Euferatese. Metsi a eona a e-psha, hore likhosi tse tsoang bochabela li lokisetsoe tsela. 13Ka molomong oa khanyapa, le ka molomong oa sebatana, le ka molomong oa moporofeta oa bohata, ka bona ho e-tsoa meea e meraro, e litšila, e kang lihohoana. 14Meea ena ke bademona ba etsang mehlolo, ba eang ho bōkella likhosi tsa lefatše lohle, ho tla ntoeng ea letsatsi le leholo la Molimo ea matla 'ohle.
15“Bonang, ke tla joaloka lesholu. Ho lehlohonolo ea falimehang, ea sa hlōbōleng liaparo tsa hae, hore a tle a se ke a tsamaea a le feela, 'me batho ba bona tse lihlong tsa hae.”
16Eaba likhosi li bōkelloa sebakeng se bitsoang Haremagedone ka Seheberu.
17Lengeloi la bosupa la qhalla lefisoana la lona moeeng, 'me lentsoe le phahameng, le tsoang teroneng e ka tempeleng, la re: “Ho phethahetse.” 18Ha e-ba le mahalima, le melumo, le letōlō, le tšisinyeho e kholo ea lefatše. Tšisinyeho e kholo hakaalo e ne e e-s'o ka e e-ba teng haesale batho ba e-ba teng lefatšeng. 19Motse o moholo oa aroha likoto tse tharo, 'me metse ea balichaba ea oa. Molimo a hopola Babilona e kholo, a e noesa senoelo sa joala ba khalefo ea hae e tukang. 20Lihlekehleke tsohle tsa baleha; le lithaba ha lia ka tsa hlola li e-ba teng. 21Eaba sefako se linaka, se boima ba likilo tse mashome a mahlano, se theoha holimo, se ruthutha batho. Batho ba nyefola Molimo ka baka la kotlo ea sefako, hobane kotlo eo e ne e le kholo ka ho fetisisa.
