Selelekela le tumeliso
1Tsena ke tseo Jesu Kreste a re senoletseng tsona, a li neiloe ke Molimo, hore a tle a bontše bahlanka ba hae tse tšoanelang ho etsahala haufinyane. Kreste o ile a li tsebisa mohlanka oa hae Johanne, ka ho mo rōmela lengeloi. 2Johanne ke eena ea pakileng tsohle tseo a li boneng, a li paka e le lentsoe la Molimo le bopaki ba Jesu Kreste. 3Ho lehlohonolo ea balang, ea mamelang mantsoe a boporofeta bona, 'me ea bōlōkang tse ngotsoeng, hobane nako ea tsona e se e atametse.
4'Na Johanne, ke lumelisa likereke tse supileng tse Asia, ke re: Le ke le neoe mohau le khotso ke ea leng teng, ea bileng teng, ea tlang ho tla; le ke meea e supileng e emeng kapele ho terone ea hae; 5le ke Jesu Kreste, eo e leng eena paki e tšepahalang, oa pele ea tsohileng bafung, le 'musi oa likhosi tsohle tsa lefatše.
Ho ea re ratileng, ea re hlatsoitseng libe ka mali a hae, 6ea re entseng 'muso le baprista ba sebeletsang Molimo Ntat'ae, e be tlōtla le matla, kamehla le mehla. A ho be joalo!
7Ke eo a e-tla a le har'a maru,
'me mahlo a bohle a tla 'mona,
esita le bona ba mo hlabileng,
'me melōko eohle ea lefatše
e tla mo llela.
E! A ho be joalo!
8“Ke 'na Alfa le Omega,” ho rialo Morena Molimo, ea leng teng, ea bileng teng, ea tlang ho tla, ea matla 'ohle.
Kreste o bonoa ponong
9'Na Johanne, ngoan'abo lōna, ke le molekane oa lōna ho Jesu matšoenyehong, le 'musong, le tiisetsong, ke ne ke le sehlekehlekeng se bitsoang Patamose, ka baka la ho bolela lentsoe la Molimo le ho paka Jesu. 10Ka letsatsi la Morena, ka tlaloa ke Moea oa Molimo, 'me kamora' ka ka utloa lentsoe le phahameng, le kang molumo oa terompeta, 11le reng: “Seo u se bonang, u se ngole bukeng, 'me u e rōmelle likereke tse supileng, e leng e Efese, e Semirna, e Peregamose, e Thiatira, e Saredeise, e Filadelfia, le e Laodisea.”
12Ka reteleha ho bona hore na ke mang ea buang le 'na, 'me hoba ke etse joalo, ka bona liluloana tsa mabone tsa khauta tse supileng. 13Har'a liluloana tsena ka bona e mong ea kang Mor'a Motho, ea apereng seaparo se phuphuthang, a itlamme sefubeng ka leqhama la khauta. 14Hlooho le moriri oa hae li ne li le tšoeu joaloka boea bo bosoeu, le joaloka lehloa, 'me mahlo a hae a ne a le joaloka malakabe a mollo. 15Maoto a hae a ne a benya joaloka lethose le hloekisitsoeng sebōping. Lentsoe la hae le ne le le joaloka molumo oa metsi a leoatle. 16Ka letsohong la hae le letona o ne a tšoere linaleli tse supileng. Ka molomong oa hae ho ne ho e-tsoa sabole e bohale, e sehang kamahohle. Sefahleho sa hae se ne se le joaloka letsatsi ha le khanya haholo.
17Eare ha ke 'mona, ka oela maotong a hae joalokaha eka ke shoele. Eaba eena o bea letsoho la hae le letona holim'a ka, o re: “Se tšabe, ke 'na Oa Pele le Oa ho Qetela, 18ke 'na ea phelang. Ke ne ke shoele, empa ke 'na enoa ke phela kamehla le mehla. Ke tšoere linotlolo tsa lefu le tsa Qalo ea Bafu.
19“Ka baka leo, ngola tseo u li boneng, tse seng li etsahetse, le tse tlang ho etsahala kamorao ho tsena. 20Ha e le sephiri sa linaleli tse supileng, tseo u li boneng ka letsohong la ka le letona, le sa liluloana tsa mabone tsa khauta tse supileng, ke sena: Linaleli tse supileng ke baruti ba likereke tse supileng, le liluloana tsa mabone tse supileng ke likereke tseo tse supileng.”
