LIPESALEMA 88

₂Morena, uena Molimo,

ke uena mopholosi oa ka,

ke lla ho uena motšeare le bosiu.

₃Thapelo ea ka e ke e fihle ho uena,

u sekehele sello sa ka tsebe.

₄Moea oa ka

o tetelitsoe ke tse bohlōkō,

bophelo ba ka bo lintšing,

lintšing tsa Qalo ea Bafu.

₅Ke se balelloa

har'a ba theohelang lebitleng,

ke feletsoe ke matla ho hang.

₆Ke rapaletse har'a bafu,

ke joaloka babolauoa

ba robetseng ka lebitleng,

bao u seng u sa ba hopole,

bao u seng u sa ba thuse

ka letsoho la hao.

₇U ntheoletse botebong ba lebitla,

mohohlong o motšo-motšo!

₈Khalefo ea hao e nkimetse,

maqhubu 'ohle a hao a mpupelitse.

₉U suthisitse balekane ba ka,

ua ba suthisetsa hōle le 'na

u mphetotse manyala

mahlong a bona;

ke hlahletsoe

moo ke sitoang ho tsoa,

₁₀mahlo a ka a motela ke bohlōkō.

Morena, ke ipiletsa ho uena,

ke ipiletsa ho uena

ka letsatsi le letsatsi,

ke phahamisetsa

matsoho a ka ho uena.

₁₁Na bafu u ka ba etsetsa limakatso?

Na ba shoeleng ba ka tsoha,

ba u rorisa?

₁₂Na mohau oa hao o tla boleloa,

o boleloe ke ba ka mabitleng,

botšepehi ba hao bo tla boleloa,

bo boleloe ke ba leng timelong?

₁₃Na limakatso tsa hao li tla tsejoa,

li tsejoe ke ba leng lefifing,

le ho loka ha hao ho tsejoe,

ho tsejoe fatšeng la ba lebetsoeng?

₁₄Empa 'na ke lla ho uena Morena,

thapelo ea ka e fihla ho uena

e sa le hoseng.

₁₅Morena, u ntahletse'ng na?

Ke'ng ha u mpatetse

sefahleho sa hao?

₁₆Esale ke le malimabe,

ke batla ke e-shoa,

ho tloha bocheng ba ka;

ke jere kotlo tsa hao tse tšabehang,

ke tsiapane.

₁₇Khalefo ea hao ea nkoela holimo,

ka felisoa ke kotlo tsa hao

tse tšosang;

₁₈ka matsatsi 'ohle li mpota-potile,

li mpota-potile joaloka metsi,

kaofela ha tsona li nkopetse hare.

₁₉U suthisitse metsoalle ea ka

le bona balekane ba ka

u ba suthisitse,

ua ba suthisetsa hōle le 'na,

lefifi e se e le motsoalle oa ka.