Molimo ke moahlōli
1Pesalema ea Asafo. Taelo ho motsamaisi oa libini: E binoe ka 'mino oa sefela sa “U se ke ua senya”. Sefela.
2Rea u boka Molimo, rea u boka,
rōna ba rapelang lebitso la hao,
ba bolelang limakatso tsa hao.
3“Ka nako eo ke e beileng,”
ho rialo Molimo,
“ke 'na ea tla ahlōla ka ho loka.
4Leha lefatše le ka thōthōmela
le bohle ba ahileng ho lona,
ke 'na ea tiisitseng litšiea tsa lona.
5Ke itse ho baikakasi:
‘Le se ke la ikakasa,’
ho ba khopo ka re:
‘Le se ke la khantša matla;
6le se ke la khantša matla hakaalo,
kapa la bua le satalalitse melala.’ ”
7Kahlōlo ha e tsoe bochabela,
kapa ha e tsoe bophirimela,
leha e le lehoatateng
kapa lithabeng.
8Ke Molimo ea ahlōlang:
O kokobetsa e mong,
a phahamise e mong.
9Ka letsohong
Morena o tšoere mohope
o phōphōmang veine
e lomosehileng.
O qhatsetsa bohle ba khopo
ba lefatše;
baa noa, ba minyeletsa le maritsa.
10Empa 'na ke tla mo fapha kamehla,
ke roke Molimo oa Jakobo.
11O tla felisa matla 'ohle a ba khopo,
'me ba lokileng ba tla matlafala.
